پنجاب لیبر کوڈ 2026

نوٹ: پنجاب لیبر کوڈ 2026 کا یہ ترجمہ سرکاری ترجمہ نہیں ہے، اسے صرف عوام کی واقفیت کے لیے یہاں پیش کیا جا رہا ہے۔ اسے کورٹ میں استعمال نہیں کیا جا سکتا۔

پنجاب ایکٹ نمبر IX مجریہ 2026 [10 فروری 2026]

پنجاب لیبر کوڈ 2026

بمراد اِس امرکے کہ ورکرز کے حقوق سے متعلق قوانین کو یکجا، سادہ اور معقول بنانے اور پنجاب میں جبری اور لازمی مشقت کی تمام اقسام کے خاتمے کے لیےقانون وضع کیا جائے۔

بمراداِس امر کے کہ کام سے متعلق بنیادی حقوق جیسے کہ انجمن سازی کی آزادی اور اجتماعی سودا کاری کے حق کو مؤثر طور پر تسلیم کرنا، جبری یا لازمی مشقت کی تمام اقسام کا خاتمہ، چائلڈ لیبر کا مؤثر خاتمہ، روزگار اور پیشے سے متعلق امتیاز کا خاتمہ، اور کام کرنے کے لیے محفوظ و صحت مند ماحول مہیا کرنا؛ ورکرز کے روزگار، کم از کم اجرتوں اور معاوضۂ کار کی ادائیگی سے متعلق ضوابط؛ کام کے اوقات کار کاانضباط؛ مخصوص اقسام کے ورکرز کے کام کی شرائط کا تعین؛ ورکرز کی فلاح و بہبود؛ تنازعات کے حل کے طریق کار؛ اور اس سے منسلکہ ضمنی امور سے متعلق قوانین کو یکجا، سادہ اور معقول بنایا جائے۔

لہذا صوبائی اسمبلی پنجاب کی جانب سے درج ذیل قانون وضع کیا جاتا ہے :

1۔ مختصر عنوان،وسعت اور آغاز نفاذ۔(1) قانونِ ہذا کوپنجاب لیبر کوڈ 2026 سے موسوم کیا جائے گا۔(2) یہ پورے پنجاب پر نافذ العمل ہوگا۔(3) یہ اس تاریخ سے نافذ العمل ہوگا جو حکومت سرکاری گزٹ میں بذریعہ نوٹیفکیشن مقرر کرے گی۔

2۔ اطلاق اور آپریشن کا خلاصہ:۔(1) اس کوڈ کا اطلاق تمام ورکرز، آجروں، پرنسپلز، قابضین (آکو پائیرز)، اور تمام شعبہ جات میں پنجاب کے تمام کام کی جگہوں پرہوگا، سوائے مندرجہ ذیل کے:(اے) سول سرونٹس، جو سول سرونٹس ایکٹ پنجاب 1974 (8بابت 1974) کے تحت ریگولیٹ کیے جاتے ہیں؛(بی) پاکستان کی دفاعی سروسز اور وہ سروسز یا تنصیبات جو دفاعی سروسز سے مکمل طور پر منسلک یا متعلقہ ہوں؛ اور(سی) پولیس سروس، بشمول قانون نافذ کرنے والے ادارے اور سویلین آرمڈ فورسز۔

(2) یہ کوڈپنجاب میں کام کرنے والے تمام اداروں پر لاگو ہوگا۔(3) یہ کوڈ حکومت کی ملکیتی کام کی جگہوں اور پنجاب کی حدود میں موجود دیگر تمام کام کی جگہوں پر بھی لاگو ہوگا۔

3۔ اس کوڈ کو معاہدے یا معاہداتی شرائط سے خارج نہیں کیا جا سکتا:۔(1) کسی بھی معاہدے، انٹرنل ورک ریگولیشنز، اجتماعی معاہدے یا کسی دیگر معاہدے کی وہ شق، خواہ وہ اس کوڈ کے نفاذ سے پہلے یا بعد میں بنائی گئی ہو، اس حد تک کالعدم ہوگی جس حد تک اس کا مقصد یہ ہو کہ وہ:(اے) اس کوڈ کے کسی حکم کے اطلاق کو خارج یا محدود کرے؛ اور

(بی) کسی فرد کو اس کوڈ کے تحت قائم کردہ تنازعات کے حل کے فورم کے روبرو کارروائی کرنے سے روکے۔

(2) ایسا کوئی معاہدہ، انٹرنل ورک ریگولیشنز، اجتماعی معاہدہ یا دیگر معاہدہ، خواہ وہ اس کوڈ کے نفاذ سے پہلے یا بعد میں ہو، جس کے تحت کوئی ورکراس کوڈ کے تحت دیا گیا کوئی حق ترک کرتا ہے، وہ اس حد تک کالعدم اور باطل ہوگا جس حد تک اس کا مقصد اس ورکر کو مذکورہ حق سے محروم کرنا ہو۔

(3) اس کوڈمیں کچھ بھی ایسا مذکورنہیں ہے جو فریقین کو ایسے معاہدے، انٹرنل ورک ریگولیشنز، اجتماعی معاہدے، یا دیگر معاہدے کرنے سے روکے جس میں اس کوڈ کی شرائط سے زیادہ فائدہ مند شرائط شامل ہوں۔

4۔ "ورکر" اور "اجرت" کے معنی:۔(1) اس کوڈ کے مقاصد کے لیے"ورکر" سے مراد :(اے) وہ شخص ہےجو بلاواسطہ یا بالواسطہ طور پر کسی آجر، پرنسپل یا قابض (آکو پائیر)کے لیے کام سرانجام دینے کی غرض سے انگیج کیا گیا ہو؛ یا(بی)وہ شخص جو بصورتِ دیگر خودمختار حیثیت میں کام کرتا ہو (سیلف ایمپلائڈ)۔

(2) ذیلی دفعہ (1) کے تحت ایک شخص "ورکر" تصور ہوگا، قطعِ نظر اس کے کہ انگیجمنٹ کی معاہداتی بنیاد کیا ہے، اور اس میں درج ذیل شامل ہوں گے:(اے) ملازم؛(بی)ٹھیکیدار یا ذیلی ٹھیکیدار (کنٹریکٹر یا سب کنٹریکٹر)؛(سی) کسی ٹھیکیدار یا ذیلی ٹھیکیدار کا ملازم(کنٹریکٹر یا سب کنٹریکٹر کا ملازم)؛(ڈی)ایجنسی میں یا معاہدہ پر کام کرنے والاورکر(ایجنسی ورکر یا کنٹریکٹ ورکر)؛(ای) خود روزگار ورکر(سیلف ایمپلائڈ)؛(ایف) اپرنٹس یا انٹرن؛(جی) عارضی یا وقتی طور پر کام کرنے والا شخص؛(ایچ) وہ شخص جو ڈیجیٹل لیبر پلیٹ فارم کے ذریعے کام پر رکھا گیا ہو؛(آئی) رضاکار (صرف حصہ دوم اور حصہ ششم کے حوالے سے)۔

(3) ذیلی دفعہ (1) کے تحت ایک شخص "ورکر" تصور ہوگا، خواہ اس کا کام کسی بھی نوعیت کا ہو، اور کام کی تعریف میں درج ذیل شامل ہوں گے مگر انہی تک محدود نہ ہوں گے:(اے) ہنر مند، غیر ہنر مند، ذہنی، کلیریکل، پیشہ ورانہ، انتظامی، اداراتی اور ہر نوعیت کا کام؛(بی)آن لائن کام یا ایسا کام جو الیکٹرانک ذرائع یا الگورتھم کے ذریعے انجام دیا جائے یا کروایا جائے؛(سی) رسمی و غیر رسمی شعبہ جات میں کام؛(ڈی)تعمیراتی کام؛(ای) گھریلو کام (ڈومیسٹک ورک)؛(ایف) ہوم بیسڈ ورک؛(جی) زرعی کام (ایگریکلچرل ورک)۔

(4) کسی شخص کی شہریت سے قطع نظر، وہ "ورکر" تصور ہوگا۔(5) حصہ ششم کے مقاصد کے لیے، وہ شخص بھی "ورکر" ہوگا جس کا معاہدہ ختم کیا جا چکا ہو۔(6) اس کوڈکے تحت "اجرت" سے مراد ہر وہ معاوَضہ ہے جو مالی صورت میں قابل اظہار ہو، اور جو ملازمت کے صریح یا ضمنی معاہدے کی شرائط پوری ہونے کی صورت میں کسی ملازم شخص کو اس کی ملازمت یا ایسی ملازمت میں کیے گئے کام کے عوض اداکیاجانا ہو، تاہم اس میں درج ذیل شامل نہیں ہوں گے:(اے) آجر کی جانب سے سماجی تحفظ یا پنشن/پراویڈنٹ فنڈکی مد میں کی جانے والی ادائیگی؛(بی)سفری الاؤنس یا کسی سفری رعایت کی مالیت؛(سی) وہ رقم جو ملازم کو ملازمت سے متعلق خاص اخراجات کی تلافی کے لیے دی جائے؛(ڈی)کوئی قانونی بونس یا دیگر کسی مد میں دی گئی رقم؛(ای) ملازمت کے خاتمے پر قابلِ ادائیگی کوئی گریجویٹی؛(ایف) کوئی انعام، انعامی رقم، یا کسی خاص موقع یا کارکردگی پر دی گئی سہولت یا اس کا نعم البدل۔

5۔ "ملازم"کے معنی:۔(1) اس کوڈکے تحت "ملازم" سے مراد وہ شخص ہے:(اے) جو کسی آجر کے ساتھ معاہدۂ ملازمت کے تحت کسی قسم کا کام، اجرت یا کسی اور معاوضے کے عوض انجام دیتا ہو، بشمول اپرنٹس، سپروائزرز، انتظامی یا اداراتی ملازمین؛(بی)حکومت یا مقامی حکومت کے وہ افسران و ملازمین جو پنجاب سول سرونٹس ایکٹ 1974 (8 بابت 1974)یا کسی دیگر صوبائی قانونی سروس قواعد کے تحت نہیں آتے؛(سی) کوئی شخص یا اشخاص کا گروہ جسے حکومت سرکاری گزٹ میں بذریعہ نوٹیفکیشن نامزد کرے۔

(2) اس کوڈکے مقاصد کے لیے "انتظامی یا اداراتی ملازم" سے مراد ایسا ملازم ہے جس کے معاہدۂ ملازمت میں درج ہو یا اس کو اختیار ہو کہ وہ دیگر ملازمین کی بھرتی، تبادلہ، ترقی، معطلی، لے آف، برطرفی، انعام، نظم وضبط یا شکایات کا فیصلہ کر سکے یا آجر کو ان پر براہ راست مشورہ دے۔

6۔ "معاہدۂ ملازمت" کے معنی:۔(1) معاہدۂ ملازمت سے مراد آجر اور ملازم کے درمیان ایسا معاہدہ ہے جس کے ذریعے دفعہ 134 کے تحت ملازمت کا تعلق قائم ہوتا ہے۔(2) معاہدۂ ملازمت ایک قانونی طور پر لازم العمل خدمت کا معاہدہ ہے۔(3) معاہدۂ ملازمت صریح یا ضمنی ہو سکتا ہے اور، دفعہ 140 کے تابع، زبانی یا تحریری شکل میں ہو سکتا ہے۔(4) آقا اور خادم (master and servant) کے قانونی تعلق اور "آقا اور خادم کےمتعلقہ اصول" (rule of master and servant) کو منسوخ کیا جاتا ہے۔

7۔ ’’آجر‘‘،’’پرنسپل‘‘اور ’’قابض‘‘کے معنی:۔(1)اس کوڈکے مقاصد کیلئے ’’آجر‘‘ وہ شخص ہے جو کسی ملازم کو معاہدۂ ملازمت کے تحت ملازمت پر رکھتا ہے۔(2) اس کوڈ کے مقاصد کیلئے ’’پرنسپل" وہ شخص ہے جو اپنے زیرِ انتظام کسی تجارت، کاروبار، پیشے یا ادارے کے سلسلے میں کسی دوسرے شخص کو معاہدۂ ملازمت کے علاوہ، بشمول معاہدۂ خدمات کے تحت:

(اے) کسی منفعت یا معاوضے کے عوض محنت فراہم کرنے کے لیے؛ یا(بی) کسی منفعت یا معاوضے کے عوض کوئی کام انجام دینے کے لیے؛

کام پر مامور کرے، اور اس میں ایسا شخص بھی شامل ہے جو کسی ٹھیکیدار یا ذیلی ٹھیکیدار (کنٹریکٹر یا سب کنٹریکٹر) کو کام پر مامور کرے۔

(3) اس کوڈ کے مقاصد کے لیے ذیلی دفعات (1) اور (2) میں "شخص" سے مراد حقیقی شخص اور ہر وہ ادارہ ہے جو قانونی شخص ہو، خواہ وہ باقاعدہ تشکیل شدہ (انکارپوریٹڈ) ہو یا نہ ہو، اس میں ڈیجیٹل لیبر پلیٹ فارم بھی شامل ہے۔

(4) اگر کوئی پرنسپل کسی ٹھیکیدار کے ذریعے ورکررکھتا ہے تو اسے آجر تصور کیا جائے گا، اگر:(اے) اس بندوبست کا مقصد ورکر کو پرنسپل کے ملازم کے طور پر جائز قانونی حقوق اور فوائدسے محروم کرنا ہو؛ یا(بی) کنٹریکٹر نے ورکر کوپرنسپل کی بنیادی سرگرمیوں (کور آپر یشنز) کے لیے تعینات کیا ہو؛ یا(سی) پرنسپل کام کے ان ذرائع اور طریق کار پر کنٹرول برقرار رکھتا ہو یا سنبھال چکا ہو جس کے ذریعے کنٹریکٹر نے کام کرنا ہے۔

(5) اس کوڈکے مقاصد کے لیے "قابض"(آکو پائیر)سے مراد وہ حقیقی شخص ہے جو کام کی جگہ کے کسی حصے یا پوری کام کی جگہ کا نگران ہو یا اس کا انتظام یا کنٹرول رکھتا ہو، چاہے:(اے) اپنی طرف سے ہو یا کسی اور کے ایجنٹ کے طور پر؛(بی) وہ کام کی جگہ کا مالک ہو یا نہ ہو؛ اور(سی) وہ کام کی جگہ کاآجر یا پرنسپل ہو یا نہ ہو۔

(6) قابض (آکو پائیر) میں درج ذیل اشخاص شامل ہو سکتے ہیں:(اے) ایساشخص جس کےپاس فیکٹری کےمعاملات کا حتمی کنٹرول ہو؛(بی)کسی تعمیراتی سائٹ پر بلڈر، پرنسپل کنٹریکٹر یا سب کنٹریکٹر؛(سی) شاپنگ سینٹر یا کسی بڑی تنصیب کا منیجر؛(ڈی)ایسا فرنچائزر جو فرنچائز حاصل کرنے والوں کے اداروں کو، کلی یا جزوی طور پر، کنٹرول کرتا ہو؛(ای) ہسپتال، اسکول، ٹریننگ انسٹیٹیوٹ، کالج، یونیورسٹی یا کسی دیگر سرکاری ادارے کا چیف ایگزیکٹو؛(ایف) کسی کان یا اس کے کسی حصے کے انتظام کے سلسلے میں مالک کے نمائندے کے طور پر مقرر کردہ یا کام کرنے والا ایجنٹ؛(جی) کسی سرکاری محکمے کا سربراہ؛ اور(ایچ)کسی ڈیجیٹل لیبر پلیٹ فارم کا انچارج شخص۔

(7) اگر ایک سے زائد اشخاص کے پاس کسی کام کی جگہ کا چارج، مینجمنٹ یا کنٹرول ہو توایک سے زیادہ افراد کو ایک ہی جگہ پر قابض (آکو پائیر) قرار دیا جا سکتا ہے۔(8) جہاں کسی کام کی جگہ(ورک پلیس) کا چارج، مینجمنٹ یا کنٹرول رکھنے والا ادارہ ایک کمپنی ہو، تووہ کمپنی کسی انسپکٹر کو اطلاع دے کر اپنے کسی ڈائریکٹر، یا نجی کمپنی کی صورت میں کسی شیئر ہولڈر، کو، جو دونوں صورتوں میں پاکستان میں مقیم ہو، اس کوڈ کے مقاصد کے لیے اس کام کی جگہ کا قابض (آکو پائیر) نامزد کر سکتی ہے؛ اور ایسا ڈائریکٹر یا شیئر ہولڈر، جب تک وہ پاکستان میں مقیم رہے، اس کوڈ کے مقاصد کے لیے اس کام کی جگہ کا قابض (آکو پائیر) متصور کیا جائے گا، تاوقتیکہ انسپکٹر کو اس نامزدگی کی منسوخی کی مزید اطلاع موصول نہ ہو جائے یا وہ ڈائریکٹر یا شیئر ہولڈر نہ رہے۔(9) اگر ذیلی دفعہ (8)کےتحت کوئی نامزدگی نہ کی جائے تو کسی بھی ڈائریکٹر یا پرائیویٹ کمپنی کی صورت میں، شیئر ہولڈر کوایسی قانونی خلاف ورزی، جس کے لیے قابض (آکو پائیر) قابلِ سزا ہو، کی صورت میں جواب دہ ٹھہرا کر اس کے خلاف مقدمہ چلایا جا سکتا ہے۔

8۔ "(Engaged)"انگیج کے معنی:۔ایک شخص ورکر کو"انگیج" کرتا ہے اگر:(اے) وہ آجر ہو اور ورکر کے ساتھ معاہدۂ ملازمت کرے؛(بی)وہ شخص پرنسپل ہو اور ورکر کے ساتھ معاہدۂ خدمات کرے؛ یا(سی) وہ شخص بصورتِ دیگر ورکر کے ساتھ ایسا انتظام کرے جس کے تحت ورکر اس کے لیے کام انجام دے، خواہ اس انتظام کی معاہداتی نوعیت کچھ بھی ہو۔

9۔ آجر، پرنسپل اور قابض (آکو پائیر) سے متعلق افراد کی قانونی ذمہ داری:۔(1) اس کوڈ کے تحت کسی آجر، پرنسپل یاقابض (آکو پائیر) کے حقوق و فرائض درج ذیل اشخاص کے ذریعے استعمال اور ادا کیے جائیں گے:(اے) اگر آجر، پرنسپل یاقابض (آکو پائیر) حقیقی شخص ہو تو وہی شخص؛(بی)اگر آجریا پرنسپل قانونی شخص (ادارہ) ہو تو وہ تمام افراد جو ادارے کے معاملات کے انچارج ہوں اورادارے کے امور کےانعقاد کے لیےقانونی شخص کےسامنے ذمہ دار ہوں۔

(2) ذیلی دفعہ (1) کی شق (اے) میں مذکور شخص میں، حسب صورت، ایسے شخص یا ادارے کا وارث، جانشین یا منتقل الیہ (اسائنی) بھی شامل ہوگا۔(3) ذیلی دفعہ (1) کی شق (بی) میں مذکور "شخص" میں درج ذیل شامل ہوں گے:

(اے) ایسی اسٹیبلشمنٹ کے حوالے سے جوکسی باڈی کارپوریٹ کے تحت چلائی جا رہی ہو، کمپنی کا کوئی ڈائریکٹر، منیجر یا دیگر افسر؛

(بی) ایسی اسٹیبلشمنٹ کے حوالے سے جو کسی شراکت داری (پارٹنرشپ) کے تحت چلائی جا رہی ہو، کوئی شریک (پارٹنر)؛(سی)ایسی اسٹیبلشمنٹ کے حوالے سے جو کسی سرکاری محکمہ کے تحت یا اس کے اختیار سے چلائی جا رہی ہو، اس مقصد کے لیے مقرر کردہ مجاز اتھارٹی، یا اگر کوئی اتھارٹی مقرر نہ کی گئی ہو تو اُس محکمہ کا سربراہ؛(ڈی) ایسی اسٹیبلشمنٹ کے حوالے سے جو کسی مقامی حکومت (لوکل اتھارٹی) کے تحت یا اس کی جانب سے چلائی جا رہی ہو، اس مقصد کے لیے مقرر کردہ افسر، یا اگر کوئی افسر مقرر نہ کیا گیا ہو تو اُس اسٹیبلشمنٹ کا چیف ایگزیکٹو آفیسر؛(ای)کسی ایسے قانونی شخص(ادارے) کے حوالے سے جس کا ذکر شقات (اے) تا (ڈی)میں نہ ہو، وہ شخص جو اُس ادارے کے کاروبار کے تمام یا کسی بڑے حصے کو متاثر کرنے والے فیصلے کرتا ہو یا اُن میں حصہ لیتا ہو؛ اور(ایف) کوئی ایجنٹ۔

(3) ذیلی دفعہ (1) میں مذکور شخص پر یہ لازم ہے کہ وہ اس کوڈکے تحت اپنی ذمہ داریوں کے سلسلے میں مستعدی سے کام کرے تاکہ آجر کی جانب سے دفعہ 413 کے مطابق فرائض کی تکمیل کو یقینی بنایا جا سکے۔

10۔ ایسی صورت میں ذمہ داریاں جہاں ایک سے زیادہ افراد پر فرائض عائد ہوں:۔جہاں کوڈ، یا اس کے تحت بنائے گئے کسی قاعدہ، ضابطہ، ایوارڈ، اجتماعی معاہدے یا حکم کے تحت ایک سے زیادہ افراد پر ذمہ داریاں عائد کی گئی ہوں، وہاں ہر فرد اس کی تعمیل کو یقینی بنانے کا مشترکہ اور انفرادی طور پر ذمہ دار ہوگا، اور خلاف ورزی کی صورت میں مشترکہ اور انفرادی طور پر جوابدہ ہوگا۔

11۔ "کنٹریکٹر" اور "سیلف ایمپلائیڈ" کی تعریف:۔(1) کوڈکے مقاصد کے لیے "کنٹریکٹر" سے مراد کوئی بھی شخص ہے، خواہ وہ حقیقی ہو، قانونی ہو یا کوئی ادارہ، خواہ وہ باقاعدہ تشکیل شدہ (انکارپوریٹڈ) ہو یا نہ ہو، جو کسی پرنسپل سے معاہدہ کرتا ہے تاکہ وہ اس کام کو مکمل طور پر یا جزوی طور پر انجام دےجو پرنسپل نے اپنی تجارت یا کاروبار کے دوران یا اس کے مقاصد کے لیے اپنے ذمہ لیا ہو، اس میں ذیلی ٹھیکیدار (سب کنٹریکٹر) بھی شامل ہیں، خواہ وہ شخص دیگر افراد کو ملازم رکھتا ہو یا نہ رکھتا ہو۔

(2) پنجاب لیبر کوڈ کے مقاصد کے لیے "سیلف ورکر" سے مراد ایسا فرد ہے جو کسی ملازمت کے معاہدے کے بغیر، ذاتی طور پر اجرت یا کسی اور مالی فائدے کے بدلے میں کام کرتا ہے یا خدمات فراہم کرتا ہے، جس میں فری لانسر بھی شامل ہے۔

12۔ "کام کی جگہ"، "احاطہ" اور "اسٹیبلشمنٹ" کے معنی:۔(1) اس کوڈ کے مقاصد کے لیے "کام کی جگہ" (ورک پلیس) سے مراد کوئی ادارہ یا احاطہ ہے جہاں ایک یا زیادہ افراد کام سرانجام دیتے ہیں، اور اس میں ایسا احاطہ شامل ہے:(اے) جہاں ورکر کو ادائیگی کی جاتی ہو، جہاں وہ آرام کا وقفہ کرتا ہو یا بیت الخلاء کی سہولیات استعمال کرتا ہو؛(بی)کام سے متعلقہ دوروں، سفر، تربیت، تقریبات یا سماجی سرگرمیوں کے لیے استعمال ہونے والا احاطہ؛(سی) جہاں معلوماتی یا مواصلاتی ٹیکنالوجی کے ذریعے کام کیا جاتا ہے؛(ڈی)رہائش گاہ جو آجر، پرنسپل یا قابض (آکو پائیر) کی طرف سے فراہم کی گئی ہو؛ یا(ای)اوزار، مشینری، آلات، یا مواد رکھنے کی جگہ۔

(2) ماسوا اس کے کہ اِس کوڈ میں کہیں اور اس کے برعکس مذکور ہو، کسی بھی شخص کوہر اس مقام پر کام کی جگہ میں موجود تصور کیا جائے گا جہاں وہ کام انجام دے سکتا ہو، بشمول وہ جگہیں جن سے وہ گزرتا ہو۔

(3) اس کوڈکے مقاصد کے لیے "احاطہ" (premises)سے مراد کوئی بھی جگہ اور اس کے ملحقہ حصے ہیں، اور اس میں شامل ہیں:

(اے) زمین کا کوئی حصہ، کوئی عمارت یا کسی عمارت کا کوئی حصہ؛(بی) کوئی گاڑی؛(سی) زمین پر کوئی تنصیب، بشمول ساحلی کنارہ اور ایسی دیگر زمینیں جو وقتاً فوقتاً پانی سے ڈھک جاتی ہوں، اور ایسی کوئی اور تنصیب جو تیر رہی ہو یا کسی پانی سے ڈھکی ہوئی زمین یا اس کی زیرِ زمین سطح پر قائم ہو؛ اور(ڈی) کسی بھی قسم کا کوئی قابل انتقال سٹرکچر یا خیمہ۔

(4) اس کوڈ کے مقاصد کے لیے"ادارہ" (اسٹیبلشمنٹ)سے مراد کوئی بھی ادارہ، کان، کاروبار، تجارت، پیشہ، خدمت، ذریعۂ معاش یا کوئی دوسری سرگرمی ہے، خواہ وہ منافع یا نفع کے حصول کے لیے انجام دی جا رہی ہو یا بصورتِ دیگر، اور اس میں ہر نوعیت کی فلاحی تنظیمیں شامل ہیں، نیز وہ تمام ادارے بھی شامل ہیں جنہیں حکومت بذریعہ نوٹیفکیشن شامل کرے۔

13۔ دیگر تعریفات:۔ (1) اس کوڈ میں، درج ذیل اصطلاحات کے معنی یہ ہوں گے:

(اے) " حادثہ" سے مراد کوئی ایسا واقعہ ہے جو غیر متوقع اور غیر ارادی طور پر پیش آئے اور اس کے نتیجے میں نقصان یا ضرر واقع ہو؛

(بی) " تنازعہ کا متبادل حل" سے مراد وہ طریق کار ہے جس کے ذریعے تنازعات کو عدالتی فیصلے کے بغیر حل کیا جاتا ہے، اور اس میں عدالتی سطح سے باہر مصالحت اور میڈی ایشن (مفاہمت کاری) شامل ہیں؛

(سی) "ثالث " سے مراد وہ شخص ہے جسےکوڈ کے تحت بطور ثالث مقرر کیا جائے؛

(ڈی) "اتھارٹی " سے مراد اس کوڈ کے تحت قائم کردہ اجرت کی ادائیگی سے متعلق اتھارٹی (پیمنٹ آف ویجز اتھارٹی) ہے؛

(ای) "ایوارڈ" سے مراد لیبر کورٹ، ثالث یا ٹربیونل کی جانب سے کسی اجتماعی حقوق کے تنازعہ یا اس سے متعلق کسی معاملے پر دیا گیا فیصلہ ہے، اور اس میں عبوری ایوارڈ بھی شامل ہے؛

(ایف) "زبردستی"سے مراد، قانونِ معاہدہ، 1872 (9 بابت 1872) کی دفعہ 15 میں دی گئی تعریف کے علاوہ، ہر قسم کی پُرتشدد یا غیر پُرتشدد دھمکی ہے جس کے ذریعے کسی فریق کو اس کی مرضی کے خلاف کسی طریقے سے عمل کرنے پر مجبور کیا جا سکے، اور اس میں، بلا تحدید، درج ذیل شامل ہو سکتے ہیں:

(i) کسی شخص کو نقصان پہنچانے یا جسمانی طور پر مقید کرنے کی دھمکی؛(ii) ایسا منصوبہ، اسکیم یا طریقۂ کار جو کسی شخص کو اس یقین میں مبتلا کرے کہ کسی عمل سے گریز کی صورت میں اسے یا کسی اور کو شدید نقصان یا جسمانی قید کا سامنا ہوگا؛(iii) کسی شخص کی کمزور یا غیر محفوظ حیثیت کے باعث دی جانے والی دھمکی؛(iv) نفسیاتی دباؤ؛ اور(v) جان بوجھ کر یا لاپرواہی سے معاوضۂ کار میں کٹوتی کرنا یا اسے روک لینا؛

(جی) "اجتماعی معاہدہ"سے مراد ایسا تحریری معاہدہ ہے جو انگیجمنٹ کی شرائط و ضوابط اور باہمی مفاد کے کسی دیگر معاملے سے متعلق ہو، اور جو ایک طرف آجر یا پرنسپل، آجران یا پرنسپلز کا کوئی گروہ، یا ان کی ایک یا ایک سے زیادہ تنظیموں اور دوسری طرف ایک یا ایک سے زیادہ ٹریڈ یونینز کے مابین طے پائے؛

(ایچ) "اجتماعی سودا کاری" سے مراد وہ تمام مذاکرات ہیں جو:

(i) ایک جانب کسی آجر یا پرنسپل، آجروں یا پرنسپلز کے کسی گروہ، یا آجروں یا پرنسپلز کی ایک یا زیادہ تنظیموں؛ اور(ii) دوسری جانب ایک یا زیادہ ٹریڈ یونینوں؛

کے درمیان کام کے حالات اور ملازمت کی شرائط کے تعین، آجروں یا پرنسپلز اور ورکرز کے مابین تعلقات کے انضباط کے لیے ہوں؛ اور اس میں دفعہ 99 میں مقررہ سطحوں پر کی جانے والی سودا کاری بھی شامل ہے؛

(آئی) "اجتماعی سودا کاری کا ایجنٹ (سی بی اے)" سے مراد وہ ٹریڈ یونین ہے جو دفعہ 100 کے تحت، ادارے یا اداروں کے گروہ میں اجتماعی سودا کاری کے معاملے میں ورکرز کی مصدقہ نمائندہ ہو؛

(جے) "اجتماعی سودا کاری کی اکائی" سے مراد وہ ورکرز یا ورکرز کا گروہ ہے جن کی ملازمت کی شرائط و ضوابط اجتماعی سودا کاری کا موضوع ہوں، یا مناسب طور پر بن سکتی ہوں؛

(کے) "چیف انسپکٹر" سے مراد ڈائریکٹر جنرل لیبر ویلفیئر اور کمشنر مائنز لیبر ویلفیئر ہیں، جو پنجاب لیبر کوڈ کے تحت اپنی متعلقہ حدودِ اختیار میں مقرر کیے گئے ہوں؛

(ایل) "مجاز فورم"سے مراد وہ ادارے ہیں جن کا ذکر ابواب 6.1 اور 6.2 میں کیا گیا ہے اور جو کسی شکایت سے متعلق دائرہ اختیار رکھتے ہیں؛

(ایم) "مصالحتی کارروائی" سے مراد مصالحت کار کے روبرو کوئی کارروائی ہے؛

(این) "مصالحت کار" سے مراد کوڈ کے باب 6.1 کے تحت مصالحت کار مقرر کیا گیا شخص ہے؛

(او) "کونسل" سے مراد کوڈ کے باب 3.7 کے تحت قائم کردہ ورکس کونسل ہے؛

(پی) "عدالت" سے مراد کوڈ کے تحت قائم کردہ لیبر کورٹ ہے؛

(کیو) "محکمہ" سے مراد، اپنے اپنے دائرۂ اختیار میں، حکومتِ پنجاب کا محکمہ محنت و انسانی وسائل یا محکمہ معدنیات و کان کنی ہے؛

(آر) "امتیاز" سے مراد کسی ممنوعہ بنیاد پر کیا گیا کوئی فرق، اخراج یا ترجیح ہے جس کا اثر روزگار یا پیشے میں مساوی مواقع یا مساوی سلوک کو ختم یا متاثر کرنا ہو، اور اس میں درج ذیل شامل ہیں:

(i) کسی شخص کو ملازمت پر رکھنے سے انکار کرنا؛(ii) کسی شخص کو برطرف کرنا؛(iii) تعلیم، پیشہ ورانہ رہنمائی اور تربیت تک رسائی سے انکار کرنا؛(iv) کمتر شرائط و ضوابط پر ملازمت فراہم کرنا؛(v) کسی بھی اور طریقے سے کسی فرد کی مواقع تک رسائی کو محدود کرنا یا اسے نقصان پہنچانا؛(vi) ترقی اور کیریئر میں آگے بڑھنے کے مواقع کو محدود کرنا؛

اس تعریف میں، "روزگار اور "پیشہ" کی اصطلاحات میں معاوضہ، پیشہ ورانہ تربیت تک رسائی، روزگار تک رسائی، مخصوص پیشوں تک رسائی، اور روزگار کی شرائط و ضوابط شامل ہیں۔

(ایس) "ضروری خدمات" سے مراد ایسی خدمات ہیں، خواہ وہ کسی بھی شخص کی جانب سے فراہم کی جائیں اور خواہ وہ حکومت کو فراہم کی جائیں یا کسی اور شخص کو، جن میں تعطل سے آبادی کے مکمل یا جزوی حصے کی زندگی، صحت یا ذاتی سلامتی کو خطرہ لاحق ہو، جیسا کہ شیڈول 4 میں بیان کیا گیا ہے؛

(ٹی) "ایگزیکٹو" (مجلس عاملہ) سے مراد وہ باڈی ہے، خواہ اسے کسی بھی نام سے پکارا جائے، جسے کسی ٹریڈ یونین کے آئین کے تحت اس کے امور کی نگرانی و انتظام کی ذمہ داری سونپی گئی ہو؛

(یو) "استحصال" سے مراد جسم فروشی، فحش مواد کی تیاری یا تقسیم، جنسی استحصال کی دیگر اقسام، غلامی، جبری یا لازمی مشقت یا خدمات، یا اس نوعیت کے دیگر افعال کے ذریعے فائدہ حاصل کرنا ہے، جن کا نتیجہ جبری وصولی کی صورت میں نکلے، خواہ متعلقہ شخص نے اس پر رضامندی ظاہر کی ہو یا نہیں؛

(وی) "فیکٹری" سے مراد کوئی احاطہ، بشمول اس کی حدود، ہے جہاں پانچ یا اس سے زیادہ ورکرز کام کر رہے ہوں یا گزشتہ بارہ ماہ میں کسی دن کام کر چکے ہوں، اور جس کے کسی حصے میں بجلی کی مدد سے یا اس کے بغیر کوئی پیداواری عمل جاری ہو یا معمول کے طور پر جاری رکھا جاتا ہو؛ تاہم اس تعریف میں وہ کان شامل نہیں جو اس وقت نافذ مائنز ایکٹ، 1923 (4بابت 1923) کے تحت آتی ہو؛

(ڈبلیو) "سست رفتاری" (گو سلو) ہڑتال کی ایک صورت ہے، جس سے مراد ورکرز کے کسی گروہ کی جانب سے مشترکہ طور پر معمول کی پیداوار کو منظم، دانستہ اور بامقصد طور پر سست کرنا، یا کام کے معیار کو جان بوجھ کر گرا دینا ہے؛ بشرطیکہ یہ عمل مشترکہ طور پر کیا جائے؛ تاہم وہ سست رفتاری یا معیار کی کمی اس میں شامل نہیں جو ایسے حالات کی وجہ سے ہو جو ورکرز کے اختیار سے باہر ہوں؛

(ایکس) "حکومت"سے مراد حکومتِ پنجاب ہے؛

(وائی) "اداروں کا گروہ" سے مراد ایسے ادارے ہیں جو ایک ہی آجر یا پرنسپل کی ملکیت میں ہوں اور ایک ہی شعبے سے تعلق رکھتے ہوں؛

(زیڈ) "صنعت"(انڈسٹری) سے مراد کوئی بھی کاروبار، تجارت، پیداواری سرگرمی، پیشہ، خدمات، ملازمت یا ایسا پیشہ ہے جو اشیاء کی پیداوار یا خدمات کی فراہمی سے متعلق ہو، اور اس میں غیر منافع بخش مقاصد کے لیے قائم سرگرمیاں بھی شامل ہیں؛

(اےاے) "انسپکٹر" سے مراد وہ انسپکٹر ہے جوکوڈ کے باب 6.4 کے تحت مقرر کیا گیا ہو؛

(بی بی) "اس مقصد کے لیے مجاز انسپکٹر" سے مراد ڈائریکٹر ہے، اور اگر ڈویژن، ریجن یا ضلع میں ڈائریکٹر موجود نہ ہو، تو ڈپٹی ڈائریکٹر، اسسٹنٹ ڈائریکٹر لیبر، یا محکمہ معدنیات و کان کنی کے متعلقہ دائرہ اختیار میں کام کرنے والے افسران مراد ہوں گے؛

(سی سی) "ضرر" سے مراد بیماری، عارضہ، چوٹ یا ان کا مجموعہ ہے، اور اس میں کام سے متعلق کسی واقعے، نظام یا طرزِ عمل کے نتیجے میں پہنچنے والا جسمانی یا ذہنی ضرر بھی شامل ہے؛

(ڈی ڈی)"خطرہ" سے مراد کوئی سرگرمی، انتظام، صورتحال، واقعہ، مظہر، عمل، حالت یا مواد ہے، خواہ وہ کام کی جگہ پر پیدا ہوا ہو یا وہاں استعمال کیا گیا ہو، جو حقیقتاً یا ممکنہ طور پر نقصان کا باعث بنے یا بن سکتا ہو؛

(ای ای) "لیبر کورٹ" سے مراد کوڈ کے باب 6.2 کے تحت قائم کردہ لیبر کورٹ ہے؛

(ایف ایف) "لاک آؤٹ" سے مراد کسی ملازمت کی جگہ یا اس کے کسی حصے کو بند کرنا، یا آجر یا پرنسپل کی طرف سے کام کو مکمل یا جزوی طور پر معطل کرنا، یا آجر یا پرنسپل کی طرف سے کسی بھی تعداد میں ورکرز کو انگیج رکھنے سے مکمل یا مشروط انکار کرنا ہے، بشرطیکہ یہ صورت کسی صنعتی تنازعہ سے منسلک ہو؛

(جی جی) "میڈی ایشن (مفاہمت کاری)" سے مراد رازداری کے ساتھ چلایا جانے والا ایسا عمل ہےجس میں میڈی ایٹر (مفاہمت کار) (وساطت کار)، صنعتی تنازعہ کے علاوہ کسی تنازعہ یا اختلاف کے بارے میں فریقین کو مذاکرات کے ذریعے معاہدے تک پہنچنے میں فعال معاونت فراہم کرتا ہے؛ تصفیے کے فیصلے اور اس کی شرائط پر حتمی اختیار فریقین کے پاس رہتا ہے، جبکہ میڈی ایٹر (مفاہمت کار) کو فیصلہ سازی کا اختیار یا فریقین پر حل مسلط کرنے یا انہیں تصفیے پر مجبور کرنے کا اختیار حاصل نہیں ہوتا؛

(ایچ ایچ) "معدنی ادارہ یا کان" سے مراد کوئی ایسی کھدائی ہے جہاں معدنیات کی تلاش یا حصول کے مقصد سے کوئی کارروائی کی گئی ہو یا کی جا رہی ہو، اور اس میں کان سے متعلق یا اس کے ملحقہ تمام تعمیرات، مشینری، ٹرام ویز اور سائڈنگز، خواہ سطحِ زمین سے اوپر ہوں یا نیچے، شامل ہیں:

بشرطیکہ اس میں ایسے احاطے کا کوئی حصہ شامل نہیں ہوگا جہاں پیداواری عمل جاری ہو، سوائے اس صورت کے کہ ایسا عمل کوک سازی یا معدنیات کی تیاری و صفائی سے متعلق ہو؛

(آئی آئی) "پیشہ ورانہ تحفظ و صحت کی کونسل" سے مراد پنجاب کونسل برائے پیشہ ورانہ تحفظ و صحت ہے جو پنجاب لیبر کوڈ کی دفعہ ‎311 کے تحت تشکیل دی گئی ہو؛

(جےجے) "عہدیدار"سے مراد کسی ٹریڈ یونین کے ایگزیکٹو کا کوئی رکن ہے، تاہم اس میں آڈیٹر یا قانونی مشیر شامل نہیں ہوگا؛

(کےکے) "تنظیم"سے مراد ورکرز، آجران یا پرنسپلز کی ایسی کوئی تنظیم ہے جو ورکرز یا آجران یا پرنسپلز کے مفادات کے تحفظ اور فروغ کے لیے قائم کی گئی ہو؛

(ایل ایل) "مصرحہ" سے مراد وہ طریق ہے جو پنجاب لیبر کوڈ کے تحت بنائے گئے قواعد کے ذریعے صراحت کیا گیا ہو؛

(ایم ایم) "عوامی سہولت کی خدمت" سے مراد وہ خدمات ہیں جنہیں شیڈول 3 میں بیان کیا گیا ہے؛

(این این) "رجسٹرڈ ٹریڈ یونین"سے مراد وہ ٹریڈ یونین ہے جو پنجاب لیبر کوڈ کے تحت رجسٹرڈ ہو؛

(اواو) "رجسٹرار"سے مراد وہ رجسٹرار ہے جو پنجاب لیبر کوڈ کے باب 6.3- ایف کے تحت مقرر کیا گیا ہو؛

(پی پی) "ضوابط" سے مراد وہ ضابطے ہیں جو پنجاب لیبر کوڈ کے تحت مرتب کیے گئے ہوں؛

(کیوکیو) "معاوضہ" سے مراد وہ عام اجرت یا تنخواہ اور کسی بھی اضافی مالی فوائد ہیں جو براہِ راست یا بالواسطہ، نقد، قابلِ انتقال دستاویز یا اشیاء کی صورت میں کسی ادارے کی طرف سے کسی ملازم کو اس کی ملازمت یا اس میں سرانجام دیے گئے کام کے بدلے ادا کیے جائیں، اور جنہیں مالی قدر میں ظاہر کیا جا سکتا ہو، اور جو قابلِ ادائیگی ہوں، یا اگر معاہدۂ ملازمت، صریح یا ضمنی، کی شرائط پوری ہوں تو قابلِ ادائیگی ہوں:

مگر شرط یہ ہے کہ کسی رہائش، روشنی، پانی، طبی سہولت یا کسی اور سہولت کی قیمت، یا ایسی کسی سروس کی جو محکمہ کی جانب سے عام یا مخصوص حکم کے ذریعے خارج کی گئی ہو؛ کسی سفری الاؤنس یا سفری رعایت کی قیمت؛ اور وہ رقم جو کسی ملازم کو ایسی خاص نوعیت کے اخراجات پورے کرنے کے لیے دی جائے جو ملازمت کی نوعیت کی وجہ سے لازم ہوں، معاوضہ میں شامل تصور نہیں ہوگی؛

(آر آر)"رسک (اندیشۂ ضرر)"سے مراد کسی چوٹ یا نقصان کے واقع ہونے کا امکان یااندیشہ ہے؛

(ایس ایس) "قواعد" سے مراد وہ قواعد ہیں جو پنجاب لیبر کوڈ کے تحت وضع کئے گئے ہوں؛

(ٹی ٹی) "تحفظ و صحت کا نمائندہ"سے مراد وہ نمائندہ ہے جو دفعہ ‎53 کے تحت منتخب کیا گیا ہو؛

(یو یو) ""تحفظ و صحت کے قواعد" سے مراد وہ قواعد ہیں جو دفعہ ‎70 کے تحت مرتب کیے گئے ہوں؛

(وی وی) "موسمی ادارہ" سے مراد ایسا ادارہ ہے، جس میں دس یا اس سے زیادہ ملازمین کام کرتے ہوں، اور جو کیلنڈر ائیر میں 180دن یا اس سے کم مسلسل مدت کے لیے کام کرتا ہو، اور اس میں درج ذیل سمیت مگر ان تک محدود نہ ہو:

(i) کوئی فیکٹری جو بنیادی طور پر درج ذیل پیداواری عمل میں مصروف ہو: روئی کی جننگ، مونگ پھلی کی چھلائی، چینی (بشمول گُڑ) کی تیاری؛(ii) مقامی یا برآمدی مقاصد کے لیے پھلوں کی صفائی؛(iii) موسم گرما کے تفریحی کیمپ؛(iv) ایسے ریزورٹس جو کسی مخصوص موسم میں کام کرتے ہوں؛(v) سیاحتی سرگرمیاں؛ اور(vi) دیگر ایسے ادارے جن کی قواعد میں صراحت کی جائے؛

(ڈبلیو ڈبلیو) "شعبہ" سے مراد معیشت کا کوئی بھی شعبہ ہے، جس میں درج ذیل شامل ہیں مگر ان ہی تک محدود نہیں:

(i) زراعت؛ باغات؛ دیہی شعبہ جات؛(ii) بنیادی دھات سازی؛(iii) کیمیائی صنعتیں؛(iv) تجارت؛(v) تعمیرات؛(vi) تعلیم؛(vii) مالیاتی خدمات؛ پیشہ ورانہ خدمات؛(viii) ماہی گیری؛(ix) خوراک؛ مشروبات؛ تمباکو؛(x) جنگلات؛ لکڑی؛ گودا اور کاغذ؛(xi) صحت کی خدمات؛(xii) ہوٹل؛ سیاحت؛ کیٹرنگ؛(xiii) کان کنی (کوئلہ یا دیگر کان کنی)؛(xiv) مکینیکل اور الیکٹریکل انجینئرنگ؛(xv) میڈیا؛ ثقافت؛ طباعت و اشاعت؛(xvi) تیل و گیس کی پیداوار؛ تیل کی صفائی؛(xvii) ڈاک اور ٹیلی کمیونیکیشن سروسز؛(xviii) پبلک سروس؛(xix) ٹیکسٹائل؛ ملبوسات؛ چمڑا؛ جوتے؛(xx) نقل و حمل؛(xxi) نقل و حمل کے آلات کی تیاری؛(xxii) یوٹیلیٹیز؛ اور(xxiii) دیگر شعبہ جات، جو مقرر کیے جائیں؛

(ایکس ایکس) "ہڑتال" سے مراد کام کرنے سے مکمل یا جزوی اجتماعی انکار یا دانستہ سست روی ہے، جو ورکرز کی طرف سے اپنے مفادات کے دفاع میں کیا جائے، اور جو صنعتی تنازع کا موضوع بن سکتا ہو؛

(وائی وائی) "ٹریڈ یونین" سے مراد ورکرز کی ایسی تنظیم ہے جس کا مقصد اپنے اراکین کے معاشی اور سماجی مفادات کو فروغ دینا اور ان کا تحفظ کرنا ہو، بشمول ورکرز اور انہیں ملازمت دینے والوں کے مابین تعلقات کو منظم کرنے کی کوشش؛ اور اس میں دو یا دو سے زیادہ ٹریڈ یونینز کے اتحاد (فیڈریشن) یا دو یا زیادہ فیڈریشنز کے کنفیڈریشن شامل ہیں؛

(زیڈزیڈ) "ٹربیونل" سے مراد وہ لیبر اپیلٹ ٹربیونل ہے جو پنجاب لیبر کوڈ کے باب 6.2 کے تحت قائم کیا گیا ہو؛

(اےاے اے) "غیر قانونی لاک آؤٹ" سے مراد وہ لاک آؤٹ ہے جو پنجاب لیبر کوڈ کی دفعہ ‎122 کے تحت غیر قانونی ہو؛

(بی بی بی) "غیر قانونی ہڑتال" سے مراد وہ ہڑتال ہے جو پنجاب لیبر کوڈ کی دفعہ ‎122 کے تحت غیر قانونی ہو؛

(سی سی سی) "تشدد اور ہراسانی" سے مراد مندرجہ ذیل ہیں:

(i) ایسے رویے اور عمل یا ان کی دھمکیاں جو ناقابلِ قبول ہوں،(ii) چاہے وہ ایک دفعہ کا واقعہ ہوں یا بار بار دہرائے جائیں، جن کا مقصد جسمانی، نفسیاتی، جنسی یا معاشی نقصان پہنچانا ہو، یا جو اس کا باعث بنتے ہوں یا بننے کا امکان رکھتے ہوں، اور جو متعلقہ شخص کی عزت نفس کی خلاف ورزی کرتے ہوں یا ایک خوفزدہ، دشمنانہ، ذلیل کرنے والا، شرمندہ کرنے والا یا غیر آرام دہ ماحول پیدا کرتے ہوں، اور جن میں صنفی بنیاد پر تشدد اور ہراسانی بھی شامل ہے؛

" تعریف ہذاکے مقاصد کے لیے، "صنفی بنیاد پر تشدد اور ہراسانی" سے مراد وہ تشدد اور ہراسانی ہے جو افراد کو ان کی جنس یا صنف کی بنیاد پر نشانہ بناتی ہے، یا کسی خاص جنس یا صنف کے افراد کو غیر متناسب طور پر متاثر کرتی ہے، اور اس میں جنسی ہراسانی بھی شامل ہے؛

تعریف ہذاکے مقاصد کے لیے، "جنسی ہراسانی" سے مراد ہے:(اے) کوئی بھی ناپسندیدہ جنسی پیش کش، جنسی فوائد کی درخواست، یا جنسی نوعیت کا کوئی بھی زبانی، تحریری یا جسمانی رویہ یا جنسی طور پر رسوا کرنے والا رویہ؛(بی)ایک خوفزدہ، دشمنانہ یا قابل اعتراض کام کا ماحول پیدا کرنا؛ اور(سی) شکایت کنندہ کو ایسی درخواست ماننے سے انکار پر سزا دینے کی کوشش، یا ایسی درخواست کی تعمیل کو ملازمت کی شرط بنانا۔

14۔ اس حصہ کا مقصد:۔ (1) اس حصے میں کام کے بنیادی اصول و حقوق بیان کیے گئے ہیں اور اس کا مقصد بین الاقوامی ادارۂ محنت (ILO) کے بنیادی دستاویزات کو نافذ کرنا ہے جو مندرجہ ذیل امور سے متعلق ہیں:(اے) آزادیِ تنظیم اور اجتماعی سودا کاری کے حق کا موثر اعتراف؛(بی) تمام اقسام کی جبری یا لازمی مشقت کا خاتمہ؛(سی) بچوں کی مزدوری(چائلڈ لیبر) کا مؤثر خاتمہ؛(ڈی) روزگار اور پیشے میں امتیاز ختم کرنا؛ اور(ای) ایک محفوظ اور صحت مند کام کرنے کا ماحول۔

(2) یہ حصہ پنجاب لیبر کوڈ کے اطلاق میں آنے والے تمام افراد اور کام کی جگہوں پر لاگو ہوتا ہے، جن میں آجر، پرنسپل، قابض، ٹھیکیدار، ذیلی ٹھیکیدار، اور باب 1.2 میں تعریف شدہ ورکرشامل ہیں، مگر ان تک محدود نہیں۔

15۔ تعریفات:۔باب ہذا میں، اگر کسی جملے یاسیاق و سباق میں تضاد نہ ہو:

(اے) "ادھار" سے مراد وہ پیشگی ادائیگی ہے، خواہ نقد ہو یا جنس کی صورت میں، یا جزوی طور پر نقد اور جزوی طور پر جنس کی صورت میں، جو ایک شخص، جسے یہاں بعد میں قرض دہندہ کہا جائے گا، دوسرے شخص کو، جسے یہاں بعد میں قرض دار کہا جائے گا، باب ہذا کے تحت دیتا ہے؛

(بی) "بانڈڈ قرض" سے مراد وہ ادھار ہے جو ایک بانڈڈ ورکرکو بانڈڈ مزدوری کے نظام کے تحت یا اس کی پیروی میں حاصل ہوا ہو یا حاصل کرنے کا تصور کیا جائے:

تاہم، پنجاب لیبر کوڈ کی دفعہ ‎18 میں تعریف شدہ ادھار کو بانڈڈ قرض نہیں سمجھا جائے گا؛

(سی) "بانڈڈلیبر"سے مراد وہ مزدوری یا خدمات ہیں جو بانڈڈ مزدوری کے نظام کے تحت انجام دی جاتی ہیں؛

(ڈی) "بانڈڈ ورکر"سے مراد وہ ورکرہے جس نے بانڈڈ قرض لیا ہو یا لیا ہوا ہو یا لینے کا تصور کیا جائے، اور جو بانڈڈ مزدوری انجام دیتا ہو؛

(ای) "بانڈڈ لیبرسسٹم"سے مراد وہ نظام ہے جس کے تحت جبری یا جزوی جبری مزدوری ہوتی ہے، اور جس کے تحت قرض دار ایک معاہدہ کرتا ہے، یا کرتا ہوا سمجھا جاتا ہے، قرض دہندہ کے ساتھ، اس مفہوم کا کہ:

(i) قرض دار نے چاہے دستاویز کے ذریعے ثبوت دیا ہو یا نہ دیا ہو، کوئی ادھار حاصل کیا ہو اور اس ادھار پر سود، اگر ہو، ادا کرنا ہو؛ یا

(ii) کسی رواجی یا سماجی ذمہ داری کے تحت؛ یا

(iii) قرض دار کو کوئی اقتصادی فائدہ حاصل ہو؛

تو قرض دار:

(اے) خود یا اپنے انحصار کرنے والے کسی شخص کے ذریعے قرض دہندہ کے لیے، یا قرض دہندہ کے فائدے کے لیے، مخصوص یا غیر مخصوص مدت کے لیے بغیر معاوضہ یا قابلِ اطلاق کم از کم اجرت سے کم معاوضۂ کار پر مزدوری یا خدمات انجام دے گا؛ یا

(بی) مخصوص یا غیر مخصوص مدت کے لیے روزگار کی آزادی یا دوسرا ذریعہ معاش اپنانے کا حق کھو دے گا؛ یا(سی) جگہ سے جگہ آزادانہ نقل و حرکت کا حق کھو دے گا؛ یا

(ڈی) اپنے یا اپنے انحصار کرنے والے کسی شخص کی ملکیت یا محنت کے حاصل کردہ مال کو مارکیٹ قیمت پر مناسب طریقے سے فروخت کرنے یا استعمال کرنے کا حق کھو دے گااور اس میں وہ نظام بھی شامل ہے جس کے تحت قرض دار کی طرف سے ضمانت دینے والا قرض دہندہ کے ساتھ معاہدہ کرتا ہے، یا کرتا ہوا سمجھا جاتا ہے، کہ اگر قرض دار قرض کی واپسی میں ناکام ہو تو ضمانت دہندہ قرض دار کی طرف سے بانڈڈمزدوری انجام دے گا۔

(ایف) "جبری یا لازمی مشقت" سے مراد ہر وہ کام یا خدمت ہے جو کسی شخص سے جابرانہ اور استحصالی طریق کار کے ذریعے، سزا کے خدشے کے تحت لی جائے اور جس کے لیے اس شخص نے خود کو رضاکارانہ طور پر پیش نہ کیا ہو۔ جبری مشقت کی درج ذیل اقسام ہو سکتی ہیں:

(i) بانڈڈ لیبر؛(ii) عام حد سے زیادہ جبری اضافی اوقاتِ کار، جیسا کہ باب 2.2 میں بیان کیا گیا ہے، ماسوائے ناگزیر حالات یا ہنگامی صورتحال کے؛(iii) کسی بچے کو اُن بدترین اقسام کی چائلڈ لیبر میں مشغول کرنا جیسا کہ باب 2.3 کی دفعہ ‎25 میں بیان کیا گیا ہے؛(iv) غیر رضاکارانہ خدمت، غلامی یا غلامی سے ملتے جلتے طریقے۔

مگر شرط یہ ہے کہ درج ذیل کو جبری یا لازمی مشقت تصور نہیں کیا جائے گا:

(i) وہ کام یا خدمت جو لازمی فوجی سروس کے قوانین کے تحت صرف فوجی نوعیت کے کام کے لیے لی جائے؛(ii) وہ کام یا خدمات جو شہریوں کی معمول کی شہری ذمہ داریوں کا حصہ ہوں؛(iii) وہ کام یا خدمات جو کسی عدالت کی طرف سے سزا کے نتیجے میں کسی شخص سے لی جائیں؛(iv) وہ کام یا خدمات جو ہنگامی حالات میں لی جائیں، مثلاً جنگ، قدرتی آفات یا ان کے خطرات جیسے کہ آگ، سیلاب، قحط، زلزلہ، مہلک وبائیں یا مویشیوں کی وبائی بیماریاں، جانوروں، کیڑوں یا نباتاتی آفات کا حملہ، اور عمومی طور پر وہ تمام حالات جو کسی آبادی یا اس کے کسی حصے کی بقاء یا فلاح و بہبود کو خطرے میں ڈال دیں؛(v) معمولی نوعیت کی اجتماعی خدمات جو کسی کمیونٹی کے افراد کی طرف سے براہ راست اس برادری کے مفاد میں انجام دی جائیں؛

مگر شرط یہ ہے کہ اس طرح کی خدمات کی ضرورت کے حوالے سے کمیونٹی کے افراد یا ان کے براہ راست نمائندوں سے مشاورت کا حق حاصل ہوگا۔

(جی) "رضاکارانہ طور پر" سے مراد کسی صاحبِ عقل فرد کی جانب سے کسی دوسرے کی تجویز یا خواہش پر، کسی فریب، جبر یا دھمکی کے بغیر، آزادانہ اور خوش دلی سے اتفاق کرنا ہے۔

16۔ جبری مشقت کی ممانعت:۔(1) کوئی شخص کسی ورکر کو جبری یا لازمی مشقت کے تحت انگیج نہیں کرے گا۔(2) کوئی شخص کسی دوسرے شخص کو جبری یا لازمی مشقت کے لیے کسی کو بھرتی کرنے یا استعمال کرنے میں معاونت نہیں کرے گا۔

17۔ بانڈڈ لیبر سسٹم کا خاتمہ:۔ (1) کسی بھی صورت میں بانڈڈ لیبر ممنوع ہو گی۔(2) کوئی شخص کسی ورکر کو بانڈڈ لیبر کے تحت انگیج نہیں کرے گا۔(3) کوئی شخص کسی دوسرے شخص کو بانڈڈ لیبرکے لیے کسی کو بھرتی کرنے یا استعمال کرنے میں معاونت نہیں کرے گا۔(4) کوئی بھی رسم، روایت یا رواج، یا کوئی کنٹریکٹ، معاہدہ یا دیگر دستاویز، خواہ وہ پنجاب لیبر کوڈ کے نافذ ہونے سے پہلے یا بعد میں کی گئی ہو یا اس پر عمل درآمد کیا گیا ہو، جس کے تحت کسی شخص سے بطور بانڈڈ ورکر کوئی کام یا خدمت لی جائے، کالعدم اور غیر مؤثر تصور کی جائے گی۔

18۔ ایڈوانس کا انضباط:۔ کوئی آجر کسی ملازم کو صرف درج ذیل شرائط کے مطابق پیشگی ادائیگی کر سکتا ہے:

(اے) پیشگی رقم بغیر سود کے قرض کی صورت میں دی جا سکتی ہے، بشرطیکہ یہ رقم غیر ہنر مند ورکرز کے لیے حکومت کی جانب سے وقتاً فوقتاً بذریعہ نوٹیفکیشن مقرر کردہ کم از کم اجرت کی تین گنا حد سے زائد نہ ہو؛(بی) پیشگی رقم کی واپسی کی اقساط ورکر کے معاوضے کے پانچویں حصے (20%) سے زیادہ نہیں ہوں گی؛(سی) آجر، پرنسپل یا قابض (آکو پائیر) ہر ورکرکے لیے پیشگی ادائیگی اور اس کی وصولی کا علیحدہ باقاعدہ ریکارڈ مقررہ طریقۂ کار کے مطابق رکھے گا؛(ڈی)پیشگی رقم کی ادائیگی اور اس کی وصولی بینکنگ ذرائع بشمول ڈیجیٹل لین دین کے ذرائع سے کی جائے گی:مگر شرط یہ ہے کہ اگر کوئی ادائیگی بینکنگ ذرائع کے علاوہ کی گئی ہو تو اسے دفعہ ہذاکے تحت پیشگی ادائیگی تصور نہیں کیا جائے گا بلکہ وہ پنجاب لیبر کوڈ کی خلاف ورزی میں غیر قانونی ادائیگی شمار ہو گی اور اس پر سزا عائد کی جا سکتی ہے؛(ای)جب تک پچھلی پیشگی رقم مکمل طور پر واپس نہ کر دی جائے، اس وقت تک کوئی نئی پیشگی رقم نہ دی جائے گی اور نہ ہی لی جائے گی۔

19۔ بانڈڈ قرض واپس کرنے کی ذمہ داری کا خاتمہ:۔ (1) پنجاب لیبر کوڈ کے نافذ العمل ہونے پر، ہر بانڈڈ ورکر کی یہ ذمہ داری، اگر کوئی ہو، کہ وہ کوئی بانڈڈ قرض یا اس قرض کا کوئی ایسا حصہ جو نافذ العمل ہونے سے قبل غیر ادا شدہ ہو، واپس کرے، ختم ہو جائے گی۔

(2) پنجاب لیبر کوڈ کے نافذ ہونے کے بعد، کسی بھی بانڈڈ قرض یا اس کے کسی بھی حصے کی وصولی کے لیے کسی بھی دیوانی عدالت، ٹربیونل یا کسی دوسرے اختیار دار فورم میں کوئی دعویٰ یا کارروائی دائر نہیں کی جا سکے گی۔

(3) اگر پنجاب لیبر کوڈ کے نفاذ سے قبل، کسی قرض دہندہ نے بانڈڈ قرض کی وصولی کے لیے کسی ورکر یا اس پر انحصار کرنے والے کسی شخص کی جائیداد زبردستی ضبط کر لی ہو، تو ایسی جائیداد فوری طور پر اصل مالک کو واپس کی جائے گی جس سے وہ ضبط کی گئی تھی۔

20۔ رہائشی مکان سے بے دخلی:۔ (1) کسی دیگر قانون میں شامل کسی امر کے باوجود، اگر کوئی ورکر خواہ وہ رہا کیا گیا ہو، استعفیٰ دیا ہو، ریٹائر ہوا ہو، چھانٹی، فارغ، برطرف یا برخاست کیا گیا ہو یا کسی اور وجہ سے ملازمت ختم ہو گئی ہو ایسے رہائشی مکان میں مقیم ہو جو اسے فراہم کیا گیا تھا، تو اُسے مذکورہ بالا صورتوں میں سے کسی کے وقوع پذیر ہونے کی تاریخ سے دو ماہ کی مدت تک بے دخل نہیں کیا جائے گا۔اگر اس مدت کی خلاف ورزی کی جائے، تو آجر، پرنسپل یا قابض، کسی دیگر قانونی ذمہ داری کے علاوہ، ورکر کو ایسی شرح کے مطابق معاوضہ ادا کرے گا جو مقرر کی جائے۔

(2) اگر متعلقہ شخص اپنی ذمہ داریاں ادا نہ کرے، یا ورکر مصرحہ مدت جیسا کہ ذیلی دفعہ (1) میں درج ہےکے بعد رہائشی مکان خالی نہ کرے، تو متعلقہ شخص یا ورکر، حسبِ حال، مجسٹریٹ اول درجہ کے روبرو، جو اس علاقے کا دائرہ اختیار رکھتا ہو جہاں وہ رہائشی مکان واقع ہے، شکایت درج کرا سکتا ہے۔

(3) مجسٹریٹ، فریقین کو سننے کے بعد، کسی بھی دیگر قانون کی کسی بھی شرط کے باوجود، مقدمے کا سرسری سماعت کے ذریعے فیصلہ کر سکتا ہے، اور متعلقہ شخص کو ورکر کو معاوضہ ادا کرنے کا یا ورکر کو عدالت کی طرف سے مقرر کردہ وقت میں مکان خالی کرنے کا حکم دے سکتا ہے۔

(4) اگر وہ ورکر جسے متعلقہ شخص کی طرف سے رہائش فراہم کی گئی ہو، فوت ہو جائے، تو ذیلی دفعات (1)، (2)، اور (3) میں مذکورہ احکام، ضروری ترامیم کے ساتھ، متوفی ورکر کے زیرِ کفالت افراد پر بھی لاگو ہوں گے، بشرطیکہ وہ افراد مذکورہ رہائش میں مقیم ہوں۔

21۔ مجاز افسر کا نوٹیفکیشن اور فرائض:۔ (1) محکمہ، بورڈ آف ریونیو اور محکمہ داخلہ سے مشاورت کے بعد، بذریعہ نوٹیفکیشن، کسی ضلع میں ایسے محکموں کے گریڈ BS-17 یا اس سے اعلیٰ درجے کے افسران کو مجاز قرار دے گا تاکہ وہ اس باب کی دفعات پر مؤثر عمل درآمد کے لیے درکار اختیارات استعمال کر سکیں اور فرائض انجام دے سکیں۔

(2) مجاز افسر اپنے ماتحت کسی بھی افسر کو، جو اس کے دائرۂ اختیار میں ہو، باب ہذا کے مقاصد کے لیے، اپنے فرائض اور ذمہ داریاں ادا کرنے کے لیے شامل کر سکتا ہے۔

(3) مجاز افسر، جہاں تک ممکن ہو، ان افراد کی فلاح و بہبود کے لیے ضروری اقدامات کرے گا جو بانڈڈ یا جبری مشقت سے آزاد کیے گئے ہوں، اور ان کے معاشی مفادات کے تحفظ اور استحکام کو یقینی بنائے گا۔

(4) مجاز افسر کی ہدایت پر، شریک افسر، اپنے دائرۂ اختیار میں کسی بھی شخص یا اس کی جانب سے یا اس کی طرف سے کیے گئے بانڈڈ، جبری یا لازمی مشقت کے استعمال کی تفتیش کرے گا، اور اگر وہ کسی بھی صورت میں ایسی مشقت کی اطلاع پائے، تو وہ فوری طور پر معاملہ مجاز افسر کو کارروائی کے لیے رپورٹ کرے گا۔

(5) انسپکٹر:

(اے) کسی بھی ایسے مقام میں داخل ہوگا جس کے متعلق اسے معقول بنیاد پر یقین ہو کہ وہ معائنہ کے دائرے میں آتا ہے؛ اور(بی) کام کی جگہ کے معائنہ کے دوران، اپنے دائرۂ اختیار میں کسی بھی شخص یا اس کی جانب سے کیے گئے بانڈڈ، جبری یا لازمی مشقت کے استعمال کے بارے میں تفتیش کرے گا، اور اگر وہ ایسی کسی بھی صورت کو پائے، تو فوری طور پر مجاز افسر کو کارروائی کے لیے رپورٹ کرے گا۔(6) مجاز افسر، سماعت کا موقع فراہم کرنے کے بعد، معاملے کو متعلقہ پولیس اسٹیشن کو مجموعہ ضابطۂ فوجداری، 1898 (XLV بابت 1898) کے تحت ابتدائی اطلاعاتی رپورٹ (FIR) درج کرانے کے لیے بھجوا سکتا ہے اور ضلعی نگرانی کمیٹی کو بھی اس کی اطلاع دے سکتا ہے۔

22۔ تعریفات:۔باب ہذا میں:(اے) "بچہ" سے مراد ایسا شخص ہے جس کی عمر 16 سال سے کم ہو؛(بی) "خاندان" سے مراد، کسی آجر، پرنسپل یا قابض (آکو پائیر) کے حوالے سے، اس کا شریکِ حیات، بیٹا، بیٹی یا بہن/بھائی ہیں۔(سی) "خطرناک کام" سے مراد ایسا کام ہے جو اپنی نوعیت یا انجام دہی کے حالات کے باعث نو عمر افراد کی صحت، حفاظت یا اخلاقیات کو نقصان پہنچانے کا امکان رکھتا ہو، اور جو شیڈول 2 میں درج ہے۔(ڈی) "ہلکا کام" سے مراد ایسا کام ہے جو:(i) بچے کی صحت یا نشوونما کے لیے مضر نہ ہو؛ اور(ii) ایسا نہ ہو جو بچے کی اسکول حاضری، حکومت سے منظور شدہ پیشہ ورانہ تربیت یا رہنمائی کے پروگراموں میں شمولیت یا حاصل کردہ تعلیم سے مستفید ہونے کی صلاحیت کو متاثر کرے۔(ای) "نو عمر فرد" سے مراد ایسا شخص ہے جس نے 16 سال کی عمر مکمل کر لی ہو مگر 18 سال کی عمر مکمل نہ کی ہو۔(ایف) "چائلڈ لیبر کی بدترین اقسام"سے مراد، پنجاب لیبر کوڈ کے مقاصد کے لیے، درج ذیل شامل ہیں:(i) غلامی کی تمام اقسام یا غلامی سے مشابہ طریق کار، مثلاً بچوں کی خرید و فروخت، اسمگلنگ، بیگار، اور بچوں کی مسلح تنازعات میں جبری بھرتی؛(ii) کسی بچے کا جسم فروشی، فحش مواد کی تیاری یا فحش حرکات کے لیے استعمال، حصول یا پیش کش؛(iii) کسی بچے کا غیر قانونی سرگرمیوں، بالخصوص منشیات کی تیاری اور اسمگلنگ جیسا کہ متعلقہ بین الاقوامی معاہدات میں بیان کیا گیا ہےکے لیے استعمال، حصول یا پیش کش؛(iv) قرض کی بنیاد پر مشقت اور جبری یا لازمی مشقت؛ اور(v) وہ کام جو اپنی نوعیت یا انجام دہی کے حالات کے لحاظ سے بچوں کی صحت، حفاظت یا اخلاقیات کو نقصان پہنچا سکتا ہو۔

23۔ کم از کم عمر برائے ملازمت:۔ (1) کسی بھی بچے کو کسی پیشے یا عمل (پراسیس) میں کام پر نہیں رکھا جائے گا اور نہ ہی اسے کام کرنے کی اجازت دی جائے گی۔

(2) دفعہ ہذاکا اطلاق ان کاموں پر نہیں ہوگا جو بچے اور نو عمر افراد اسکولوں میں عمومی، پیشہ ورانہ یا فنی تعلیم کے لیے یا دیگر تربیتی اداروں میں سرانجام دیتے ہیں، بشرطیکہ یہ کام ان شرائط کے مطابق انجام دیا جائے جو حکومت نے آجران، پرنسپلز اور ورکرز کی متعلقہ تنظیمات سے، جہاں وہ موجود ہوں، مشاورت کے بعد مقرر کی ہوں، اور یہ کام درج ذیل میں سے کسی ایک کا جزو لازم ہو:(اے) تعلیم یا تربیت کا وہ کورس جس کی بنیادی ذمہ داری اسکول یا تربیتی ادارے پر ہو؛ یا

(بی) ایسا تربیتی پروگرام جو بنیادی طور پر یا مکمل طور پر کسی ادارے (انڈرٹیکنگ) میں دیا جائے اور جسے حکومت نے منظور کیا ہو؛ یا(سی) ایسا رہنمائی یا تعارفی پروگرام جو کسی پیشے یا تربیتی شعبے کے انتخاب میں سہولت فراہم کرنے کے لیے ترتیب دیا گیا ہو۔(3) محکمہ، آجران یا پرنسپلز اور ورکرز کی متعلقہ تنظیمات سے مشاورت کے بعد، باب ہذاکے اطلاق سے مخصوص اقسام کے کاموں کو مستثنیٰ قرار دے سکتا ہے جن پر باب ہذاکا اطلاق خصوصی اور اہم عملی مشکلات پیدا کرتا ہو، جیسے کہ خاندانی کاروبار میں کیا جانے والا کام، یا ایسے چھوٹے پیمانے کی زرعی سرگرمیاں جو مقامی استعمال کے لیے پیداوار کرتی ہوں اور جن میں باقاعدہ اجرتی ورکرملازم نہ ہوں۔

(4) آجر، پرنسپل یا قابض (آکو پائیر) اس بات کو یقینی بنائے گا کہ کام کے اوقات اس تعلیمی یا تربیتی ادارے کے اوقاتِ کار سے متصادم نہ ہوں جہاں بچہ یا نو عمر فرد داخل ہو۔

(5) ایسا بچہ جو لازمی تعلیم حاصل کر رہا ہو، محکمہ کی پیشگی اجازت سے ہی فلم بندی، اشتہارات، فنّی مظاہروں یا اس سے مشابہہ ثقافتی سرگرمیوں اور کھیلوں کے مقابلوں میں اجرت کے بدلے شرکت کر سکتا ہے، بشرطیکہ ایسی شرکت اس کی صحت، حفاظت، اخلاقیات، تعلیم یا نشوونما کے لیے نقصان دہ نہ ہو۔

(6) ذیلی دفعہ(2)میں مذکور اجازت محکمہ کی طرف سے بچے کے قانونی نمائندے کی درخواست پر جاری کی جائے گی۔

24۔ بچے کو ہلکے کام میں مشغول کرنا:۔ ایسا بچہ جس کی عمر 14 سال سے کم نہ ہو، ہلکے کام کے لیے مشغول کیا جا سکتا ہے، بشرطیکہ:(اے) وہ یومیہ زیادہ سے زیادہ چار گھنٹے اور ہفتہ وار بیس گھنٹے کام کرے؛(بی) اسکول کے اوقاتِ کار کے دوران اسے کام پر نہ لگایا جائے؛ اور(سی) وہ صرف ایسے کاموں میں مشغول ہو جن کی وضاحت شیڈول 1 میں کی گئی ہو۔

25۔ چائلڈ لیبر کی بدترین اقسام کی ممانعت:۔ (1) کسی بھی دیگر قانون کے کسی حکم کے باوجود، کسی بھی شخص کو یہ اجازت نہیں ہوگی کہ وہ کسی بچے یا نو عمر فرد کو ایسی سرگرمی میں مشغول کرے، استعمال کرے، حاصل کرے یا پیش کرے جو چائلڈ لیبر کی بدترین اقسام میں شمار ہوتی ہو، یا ایسا کام جس میں ملازمت کی کم از کم عمر کی خلاف ورزی ہو۔

(2) چائلڈ لیبر کی بدترین اقسام کے تمام مقدمات، جیسا کہ دفعہ 22 کی شق (ایف) کی ذیلی شقوں (i)، (ii) اور (iii) میں بیان کیا گیا ہے، انسپکٹر کی جانب سے فوری طور پر متعلقہ سرکاری محکمے اور ایجنسی کو مزید تفتیش اور قانونی کارروائی کے لیے بھیجے جائیں گے۔

26۔ خطرناک کام کی ممانعت:۔ (1) کسی شخص کو یہ اجازت نہیں ہوگی کہ وہ کسی بچے یا نو عمر فرد کو ایسے ادارے میں خطرناک کام پر لگائے یا لگانے کی اجازت دے، جیسا کہ شیڈول 2 میں ذکر کیا گیا ہے۔

(2) اگر انسپکٹر کسی بچے یا نو عمر فرد کو خطرناک یا استحصالی کام میں مشغول پائے، تو وہ ایسے بچے یا نو عمر فرد کو فوری طور پر اس کام سے علیحدہ کرے گا اور اسے ایسے ادارے میں منتقل کرے گا جہاں اس کی تعلیم کے لیے موزوں ماحول فراہم کیا گیا ہو۔

27۔ کام کے اوقات پر پابندی:۔ (1) کسی نو عمر فرد کا کل دورانیۂ کار، جس میں ایک گھنٹے کا لازمی وقفۂ آرام شامل ہو، ایک دن میں سات گھنٹے سے زیادہ نہیں ہوگا۔

(2) کسی نو عمر فرد کا کام کرنے کا دورانیہ، کم از کم ایک گھنٹے کے وقفۂ آرام سے پہلے، تین گھنٹے سے زیادہ نہیں ہوگا۔

(3) ہر نو عمر فرد کو روزانہ کم از کم بارہ مسلسل گھنٹے بلا تعطل آرام کا وقت دیا جائے گا۔

(4) جو شخص کسی نو عمر فرد کو کام کے لیے انگیج کرے، وہ:

(اے) اسے شام سات بجے سے صبح آٹھ بجے کے درمیان، یا اوور ٹائم، ہفتہ وار تعطیلات اور عوامی تعطیلات کے دوران کام پر نہیں لگائے گا؛ اور

(بی) اسے اس دن کسی بھی ادارے میں کام پر نہیں لگائے گا جس دن وہ پہلے ہی کسی دوسرے ادارے میں کم از کم چھ گھنٹے کام کر چکا ہو۔

28۔ عمر کے تنازعہ کا حل:۔ اگر کسی بچے یا نو عمر فرد کی عمر کے بارے میں کوئی تنازعہ پیدا ہو، جو کسی ادارے میں ملازمت پر ہے یا کام کرنے کی اجازت رکھتا ہے، تو اس کا فیصلہ نادرا کی جانب سے جاری کردہ فارم "ب" یا کسی مجاز اتھارٹی کی جانب سے جاری کردہ پیدائش کے سرٹیفکیٹ کی بنیاد پر کیا جائے گا۔ تاہم، اگر ایسے دستاویزات موجود نہ ہوں، تو انسپکٹر معاملہ کسی مقررہ طبی اتھارٹی کو بھجوائے گا جو عمر کا تعین کرے گی، اور اس اتھارٹی کا فیصلہ بچے یا نو عمر فرد کی عمر کے تعین کے لیے حتمی ثبوت ہوگا۔

29۔ طبی معائنہ کروانے کا اختیار:۔ (1) اگر کسی انسپکٹر کی یہ رائے ہو کہ:

(اے) کوئی شخص جو کسی ادارے میں بغیر فٹنس سرٹیفکیٹ کے کام کر رہا ہے، ایک نو عمر فرد ہے؛ یا(بی) کوئی نو عمر فرد جو کسی فٹنس سرٹیفکیٹ کے ساتھ ادارے میں کام کر رہا ہے، اب اس حیثیت میں کام کرنے کے قابل نہیں رہا؛

تو انسپکٹر، قابض (آکو پائیر) کو نوٹس جاری کر سکتا ہے جس میں یہ ہدایت دی جائے گی کہ ایسا شخص یا نو عمر فرد کسی تصدیق کنندہ سرجن یا پنجاب لیبر کوڈ کے تحت مجاز میڈیکل پریکٹیشنر سے طبی معائنہ کروائے، اور اگر انسپکٹر حکم دے تو، ایسے شخص یا نو عمر فرد کو جب تک معائنہ نہ ہو جائے اور اسے موزونیت (فٹنس) کا سرٹیفکیٹ یا، حسبِ صورت، نیا سرٹیفکیٹ نہ مل جائے، کسی بھی ادارے میں کام کرنے کی اجازت نہیں دی جائے گی۔

(2) طبی معائنہ کے اخراجات قابض (آکو پائیر) خود برداشت کرے گا۔

30۔ رجسٹر رکھنا:۔ قابض (آکو پائیر) کو ان نو عمر افراد کے بارے میں ایک رجسٹر رکھنا ہو گا جو ادارے میں کام کر رہے ہوں یا کام کرنے کی اجازت رکھتے ہوں، اور وہ رجسٹر کسی بھی وقت انسپکٹر کے معائنہ کے لیے دستیاب ہونا چاہیے، جس میں درج ذیل معلومات شامل ہوں:

(اے) ہر نو عمر فرد کا نام اور تاریخِ پیدائش؛(بی) ان افراد کے کام کے اوقات اور وقفے؛(سی) نو عمر فرد کے کام کی نوعیت؛ اور(ڈی) ایسی دیگر تفصیلات جو مقرر کی جائیں۔

31۔ انسپکٹر کو اطلاع:۔ ہر ادارہ کا قابض، جہاں کوئی نو عمر فرد ملازم ہو یا کام کرنے کی اجازت رکھتا ہو، پنجاب لیبر کوڈ کے نفاذ یا نو عمر فرد کی ملازمت، جو بھی بعد میں ہو، کے تیس دن کے اندر انسپکٹر کو، جس کے دائرۂ اختیار میں ادارہ واقع ہو، تحریری یا الیکٹرانک طریقے سے اطلاع دے گا جس میں درج ذیل معلومات شامل ہوں گی:

(اے) ادارے کا نام، مقام اور پتہ؛(بی) اس شخص کا نام جو ادارے کے انتظام کا اصل ذمہ دار ہو؛(سی) نو عمر فرد کا نام، عہدہ، تنخواہ اور دیگر تفصیلات؛ اور(ڈی) ادارے میں انجام دیے جانے والے پیشے یا عمل کی نوعیت۔

32۔ کام کرنےکا قیاس:۔ (1) ذیلی دفعہ (2) کے تابع، اگر کوئی بچہ یا نو عمر فرد کسی کام کی جگہ کے احاطے میں موجود پایا جائے، تو یہ قیاس کیا جائے گا کہ وہ بچہ یا نو عمر فرد اس ادارے میں کام کر رہا ہے یا اسے کام کی اجازت دی گئی ہے۔

(2) دفعہ ہذا کا اطلاق ان طلبہ پر نہیں ہوگا جو کسی تعلیمی ادارے کی ہدایت یا نگرانی میں تعلیمی مقاصد کے لیے ادارے کا دورہ کر رہے ہوں۔

(3) اگر معائنہ کے دوران کسی انسپکٹر کو کوئی بچہ لیبر کوڈ کے برخلاف ملازمت پر رکھا ہوا ملے تو انسپکٹر اس بچے کو فوری طور پر کام سے ہٹوائے گا۔

(4) انسپکٹر بچے کی ذہنی اور جسمانی حالت کا ابتدائی جائزہ لے گا، اور حسبِ صورت والدین یا قانونی سرپرست کی رضامندی کے ساتھ یا اس کے بغیر، بچے کو کسی تعلیمی یا فلاحی ادارے کے سپرد کر سکے گا۔

33۔ امتیاز کے خلاف ذمہ داریاں:۔(1) کوئی بھی آجر، پرنسپل یا قابض (آکو پائیر) کسی ورکر کے ساتھ امتیازی سلوک نہیں کرے گا۔(2) کوئی ورکر دوسرے ورکر کے ساتھ امتیازی سلوک نہیں کرے گا۔(3) یہ جانچتے وقت کہ آیا کسی امتیاز، استثناء یا ترجیح کا امتیازی اثر ہے، یہ بات غیر متعلقہ ہوگی کہ:(اے) آیا اس اثر کا ارادہ کیا گیا تھا یا نہیں؛ اور(بی) آیا یہ اثر کسی فعل یا ترکِ فعل کا نتیجہ تھا۔(4) کسی خاص ملازمت کے لازمی تقاضوں کی بنیاد پر دیا گیا امتیاز، استثناء یا ترجیح امتیاز تصور نہیں کیا جائے گا۔(5) مساوات کو فروغ دینے یا حاصل کرنے کے لیے مخصوص حفاظتی اور امدادی اقدامات کو امتیاز نہیں سمجھا جائے گا۔

34۔ بلاواسطہ اور بالواسطہ امتیاز:۔(1) دفعہ 33 میں دی گئی ذمہ داریاں براہ راست اور بالواسطہ دونوں قسم کے امتیاز کو شامل کرتی ہیں۔(2) براہ راست امتیاز اس وقت ہوتا ہے جب کم سازگار سلوک واضح یا ضمنی طور پر ایک یا زیادہ ممنوعہ بنیادوں پر مبنی ہو اور اس میں جنسی یا دیگر قسم کی ہراسگی بھی شامل ہے۔(3) بالواسطہ امتیاز اس وقت ہوتا ہے جب کوئی شخص بظاہر غیر جانبدار شرط، تقاضا یا طریق کار عائد کرتا ہے یا عائد کرنے کا ارادہ رکھتا ہے جو:(اے) ممنوعہ بنیاد کی وجہ سے افراد کو غیر متناسب نقصان پہنچانے والا ہو یا ایسا ہونے کا امکان ہو؛ اور(بی) ملازمت کے لازمی تقاضوں کے پیش نظر مناسب نہ ہو۔(4) اس بات کا ثبوت دینے کی ذمہ داری کہ:(اے) کم سازگار سلوک امتیاز سے متعلق نہیں ہے؛ اور(بی) ذیلی دفعہ (3) کی شق (بی) میں مذکور شرط، تقاضا یا طریق کار مناسب ہے، آجر، پرنسپل یا قابض (آکو پائیر) پر ہوگی۔

35۔ ممنوع بنیادیں:۔(1) باب ہذا میں ممنوع بنیادیں درج ذیل ہوں گی:(اے) نسل؛(بی)رنگ؛(سی) جنس و صنف؛(ڈی)حمل؛(ای) عمر؛(ایف)خاندانی ذمہ داریاں؛(جی)مذہب بشمول فرقہ اور عقیدہ؛(ایچ)سیاسی رائے؛(آئی)قومی اصل؛(جے)نسلی شناخت؛(کے) معاشرتی پس منظر بشمول ذات؛(ایل) ٹریڈ یونین کی سرگرمیوں میں شرکت یا عدم شرکت؛(ایم) زبان بشمول لہجہ؛(این) معذوری؛ اور(او) ظاہری شکل و صورت۔(2) باب ہذا کے لیے "خاندانی ذمہ داریاں" سے مراد ہیں:(اے) مرد اور خواتین ورکرجن کی زیر انحصار بچوں کے حوالے سے ذمہ داریاں ہوں، بشمول زچگی کی رخصت اور پدری رخصت کے دوران؛ اور(بی) مرد اور خواتین ورکرز جن کی قریبی خاندان کے دیگر اراکین کے حوالے سے ذمہ داریاں ہوں جنہیں واضح طور پر ان کی دیکھ بھال یا تعاون کی ضرورت ہو۔(3) آجر، پرنسپل یا قابض (آکو پائیر) کے بارے میں یہ نہیں سمجھا جائے گا کہ اس نے خاندانی ذمہ داریوں کی بنیاد پر کسی دوسرے شخص کے ساتھ امتیازی سلوک کیا ہے محض اس وجہ سے کہ اس نے معقول کاروباری وجوہات کی بنا پر اس شخص کی خاندانی ذمہ داریوں سے متعلق کسی درخواست کو قبول کرنے سے انکار کیا ہو۔

(4) پنجاب لیبر کوڈ کے لیے، "معذوری" کا مطلب وہی ہے جو قانون معذور افراد کو بااختیار بنانا پنجاب 2022(42بابت 2022) میں درج ہے۔

(5) آجر، پرنسپل یا قابض (آکو پائیر) کے بارے میں یہ سمجھا جائے گا کہ اس نے معذوری کی بنیاد پر کسی دوسرے شخص کے ساتھ امتیازی سلوک کیا ہے اگر وہ معقول سہولتیں فراہم کرنے میں ناکام رہے، جن میں ضروری امدادی آلات و سازوسامان شامل ہیں جو معذور شخص کو اپنی ذمہ داریاں انجام دینے کے لیے معقول طور پر درکار ہوں۔

36۔ مساوی اجرت کی ذمہ داری:۔ (1) کوئی آجر، پرنسپل یا قابض، مساوی قدر کے کام کے لیے تمام اصناف کے ورکرز کو برابر معاوضہ ادا کرے گا۔

(2) مساوی قدر کے کام کے لیے مساوی معاوضۂ کار سے مراد وہ اجرتی شرحیں ہیں جو صنفی امتیاز کے بغیر مقرر کی گئی ہوں۔

(3) ذیلی دفعہ (1) کے مقاصد کے لیے، "معاوضے" میں یوٹیلیٹی الاؤنس اور ہنگامی (کنٹیجنٹ) الاؤنس شامل ہوں گے۔

(4) ورکرز کے درمیان ایسی مختلف شرحیں جو صنف کو مدنظر رکھے بغیر، کسی معروضی جاب اپریزل کی بنیاد پر انجام دیے گئے کام کے فرق کو ظاہر کرتی ہوں، مرد و خواتین ورکرز کے لیے مساوی قدر کے کام کے مساوی معاوضۂ کار کے اصول کی خلاف ورزی تصور نہیں ہوں گی۔

(5) یہ تعین کرنے کے لیے کہ آیا ذیلی دفعہ (1) کے تحت کوئی کام مساوی قدر رکھتا ہے، درج ذیل عوامل کو مدنظر رکھا جائے گا لیکن یہ ان تک محدود نہیں ہوں گے: پیشہ ورانہ قابلیت اور مہارت، کام کی کوشش، ذمہ داریاں اور کام کرنے کا ماحول۔

(6) ذیلی دفعہ (4) کے لیے "جاب اپریزل" سے مراد ایسا طریقۂ کار ہے جس کے ذریعے جابز کا معروضی موازنہ کیا جاتا ہے تاکہ تنخواہ یا اجرت کے پیمانے میں ایک جاب کی دوسرے کے مقابلے میں نسبتی حیثیت طے کی جا سکے۔ جاب اپریزل کا طریق کار صنف سے قطع نظر جابز کی درجہ بندی فراہم کرے گا اور مساوی قدر کے کام کے لیے مساوی معاوضۂ کار کے اصول کو یقینی بنائے گا۔

(7) حکومت، ورکرز اور آجروں کے نمائندگان سے مشاورت کے بعد، دفعہ ہذا سے متعلق معاملات کے لیے رہنما اصول تیار کرے گی۔

37۔ پنجاب لیبر کوڈ کے تحت بنائی گئی دستاویزات میں مساوی معاوضۂ کار کا لحاظ:۔ پنجاب لیبر کوڈ کے تحت دیا گیا کوئی بھی ایوارڈ، فیصلہ، عدالتی فیصلہ، تصفیہ، اجتماعی معاہدہ، ضابطہ، قاعدہ یا کوئی دوسری دستاویز، جہاں تک وہ معاوضۂ کار سے متعلق ہو، اس میں مرد و خواتین کو مساوی قدر کے کام کے لیے مساوی معاوضہ دینے کے اصول کو لاگو کیا جائے گا۔

38۔ تعریفات:۔باب ہذا میں،’’مصرحہ‘‘ یا مقررہ" سے مراد سیفٹی اینڈ ہیلتھ کے قواعد میں مقرر کردہ ہے۔

اے۔کام کی جگہ پر سیفٹی اور صحت سے متعلق ذمہ داریاں۔

39۔ خطرات کا نظم و نسق:۔ کسی شخص پر عائد سیفٹی اور صحت کو یقینی بنانے کی ذمہ داری اس بات کی متقاضی ہے کہ وہ:

(اے) جہاں تک معقول حد تک ممکن ہو، سیفٹی اور صحت سے متعلق خطرات کو ختم کرے؛ اور(بی) اگر خطرات کو مکمل طور پر ختم کرنا معقول طور پر ممکن نہ ہو، تو جہاں تک معقول حد تک ممکن ہو، ان خطرات کو کم سے کم کرے۔

40۔ "معقول حد تک ممکن" کا مفہوم:۔ سیفٹی اور صحت کو یقینی بنانے کی ذمہ داری کے حوالے سے "معقول حد تک ممکن" سے مراد وہ اقدام ہے جو کسی مخصوص وقت میں، تمام متعلقہ عوامل کو مدِنظر رکھتے ہوئے، معقول طور پر کیا جا سکتا ہو، جن میں درج ذیل شامل ہیں:(اے) متعلقہ خطرے یا خطرناک صورت حال کے وقوع پذیر ہونے کا امکان؛(بی) اس خطرے یا ضرر سے ہونے والے ممکنہ نقصان کی شدت؛(سی) متعلقہ شخص کو جو علم ہے یا معقول طور پر ہونا چاہیے، اس بارے میں:(i) اس خطرے یا ضرر کے بارے میں؛ اور(ii) اس خطرے کو ختم یا کم کرنے کے طریقوں کے بارے میں؛(ڈی) خطرے کو ختم یا کم کرنے کے طریقوں کی دستیابی اور موزونیت؛ اور(ای) خطرے کی شدت اور اس کو ختم یا کم کرنے کے دستیاب طریقوں کا جائزہ لینے کے بعد، ان طریقوں پر آنے والی لاگت، بشمول یہ کہ آیا یہ لاگت خطرے کے مقابلے میں انتہائی غیر متناسب تو نہیں۔

41۔ بیک وقت اور باہم متداخل ذمہ داریاں:۔ (1) کسی شک و شبہ سے بچنے کے لیے یہ واضح کیا جاتا ہے کہ کسی ایک وقت میں کوئی شخص باب ہذا کے تحت عائد کردہ کسی ذمہ داری کے حوالے سے دو یا زیادہ حیثیتیں رکھ سکتا ہے، جیسے:(اے) آجر؛(بی)پرنسپل؛(سی) کام کی جگہ کا قابض؛(ڈی)ٹھیکیدار؛(ای) ذیلی ٹھیکیدار؛(ایف)سیلف ورکر؛(جی) کام کے لیے استعمال ہونے والی مشینری، سازوسامان یا خطرناک مواد کا ڈیزائنر، صنعتکار یا فراہم کنندہ؛(ایچ) مشینری یا سازوسامان کا نصب کرنے والا، لگانے والا یا اس میں ترمیم کرنے والا؛(آئی) ایسی مشینری جو مکینیکل پاور سے چلتی ہو اس کا مالک، کرایہ پر لینے والا یا لیز پر لینے والا، یا ایسا شخص جو کام کے دوران اس مشینری کی دیکھ بھال کرتا ہو:اور پنجاب لیبر کوڈ متعلقہ شخص پر فرائض یا ذمہ داریاں عائد کر سکتا ہے۔(2) ہر ذمہ دار فرد پر یہ لازم ہے کہ وہ پنجاب لیبر کوڈ میں درج معیارات کے مطابق اپنی ذمہ داری پوری کرے، اگرچہ کوئی دوسرا فرد بھی وہی ذمہ داری رکھتا ہو۔کسی شخص پر پنجاب لیبر کوڈ کے تحت عائد کردہ کوئی ذمہ داری یا واجب الادا امر اس بنیاد پر کم یا متاثر نہیں ہوگا کہ وہی ذمہ داری ایک یا زیادہ دیگر افراد پر بھی عائد ہو، خواہ وہ ایک ہی حیثیت میں ہوں یا مختلف حیثیتوں میں۔(3) اگر کسی ایک ہی کام کی جگہ میں ایک سے زیادہ افراد کسی معاملے کے حوالے سے ذمہ داری رکھتے ہوں، تو ہر فرد:

(اے) اس معاملے سے متعلق اپنی ذمہ داری کا خود ذمہ دار ہوگا؛ اور(بی) اس حد تک اپنی ذمہ داری نبھائے گا، جس حد تک وہ فرد اس معاملے پر اثر انداز ہونے یا اسے کنٹرول کرنے کی صلاحیت رکھتا ہو، یا یہ صلاحیت رکھ سکتا تھا اگر کوئی معاہدہ یا انتظامی بندوبست اس صلاحیت کو محدود یا ختم کرنے کا باعث نہ بنتا۔

(4) جب بھی ذیلی دفعہ (1) میں درج ایک سے زیادہ افراد ایک ہی وقت میں ایک ہی کام کی جگہ پر سرگرم ہوں، تو ان پر لازم ہوگا کہ وہ باب ہذا کے تحت اپنی اپنی ذمہ داریاں ادا کرنے کے لیے آپس میں تعاون کریں۔

42۔ فرائض، سیفٹی اینڈ ہیلتھ رولز اور دیگر مواد کے درمیان باہمی تعامل:۔ (1) باب ہذا میں درج ایک یا زائد ذمہ داریاں ادا کرتے وقت، ہر شخص پر لازم ہوگا کہ وہ دفعہ 70 کے تحت بنائے گئے سیفٹی اینڈ ہیلتھ رولز کی پابندی کرے۔

(2) باب ہذا میں بیان کردہ ذمہ داریاں، سیفٹی اینڈ ہیلتھ رولز کی غیر موجودگی میں بھی، ہر شخص پر لاگو ہوں گی۔

(3) ہر شخص پر یہ بھی لازم ہوگا کہ وہ حکومت کی جانب سے وقتاً فوقتاً عائد کی جانے والی اضافی ذمہ داریوں کی تعمیل کرے، اور حکومت کی جانب سے جاری کردہ معیارات، ہدایات، اور ضابطۂ عمل کی پیروی کرے۔

43۔ آجر، پرنسپل اور قابض (آکو پائیر) کی ذمہ داریاں:۔ (1) ہر شخص پر یہ لازم ہوگا کہ، جہاں تک معقول حد تک ممکن ہو،درج ذیل ورکرز کی کام کے دوران صحت اور تحفظ کو یقینی بنائے:

(اے) وہ ورکرز جو اس شخص نے، براہِ راست یا کسی ٹھیکیدار کے ذریعہ، ملازم رکھے ہوں یا رکھوائے ہوں؛ اور(بی) وہ ورکرزجن کی کام کی انجام دہی میں سرگرمیاں اس شخص کے زیر اثر یا ہدایت یافتہ ہوں۔(2) ذیلی دفعہ (1) کی وسعت کو محدود کیے بغیر، ہر آجر پر یہ لازم ہے کہ وہ، جہاں تک معقول حد تک ممکن ہو، ایسے اقدامات کرے جو اس کے ملازمین کی صحت اور تحفظ کو یقینی بنانے کے لیے ضروری ہوں۔(3) ذیلی دفعہ (4) سے مشروط اور ذیلی دفعہ (1) کی وسعت کو محدود کیے بغیر، ہر پرنسپل پر یہ ذمہ داری عائد ہوگی کہ وہ، جہاں تک معقول حد تک ممکن ہو، ایسے اقدامات کرے جو درج ذیل افراد کی صحت اور تحفظ کو یقینی بنانے کے لیے ضروری ہوں:

(اے) ایسا کوئی ٹھیکیدار جسے پرنسپل نے کام پر رکھا ہو، جب وہ کام پر ہو؛(بی) ایسا کوئی بلاواسطہ یا بالواسطہ ذیلی ٹھیکیدار جسے مذکورہ ٹھیکیدار نے کام پر رکھا ہو، جب وہ کام پر ہو؛ اور(سی) مذکورہ ٹھیکیدار یا ذیلی ٹھیکیدار کا ایسا کوئی ملازم، جب وہ کام پر ہو۔(4) ذیلی دفعہ (3) کے تحت پرنسپل پر عائد ذمہ داری صرف اس صورت میں لاگو ہوگی جب مذکورہ ٹھیکیدار، ذیلی ٹھیکیدار یا ملازم، پرنسپل کی ہدایات کے مطابق کام کی انجام دہی کر رہا ہو۔(5) ہر وہ شخص جو آجر یا پرنسپل ہو، اس پر لازم ہوگا کہ وہ، جہاں تک معقول حد تک ممکن ہو، یہ بھی یقینی بنائے کہ اس کے احکامات یا نگرانی میں انجام دیے جانے والے کام سے کسی اور شخص کی صحت یا تحفظ کو خطرہ لاحق نہ ہو۔(6) ذیلی دفعہ (1) کی وسعت کو محدود کیے بغیر، ہر قابض (آکو پائیر) پر لازم ہوگا کہ وہ، جہاں تک معقول حد تک ممکن ہو، یہ یقینی بنائے کہ اس کے زیرِکنٹرول کام کی جگہیں، مشینری، آلات، اور کام کے طریقۂ کار، محفوظ ہوں اور کسی شخص کی صحت کے لیے خطرناک نہ ہوں، خواہ وہ شخص کام کی جگہ پر ہو یا آس پاس ہو۔(7) دفعہ ہذامیں درج دیگر ذمہ داریوں کو محدود کیے بغیر، ہر وہ شخص جو آجر، پرنسپل یا قابض (آکو پائیر) ہو، اس پر لازم ہوگا کہ وہ، جہاں تک معقول حد تک ممکن ہو:(اے) نظامِ کار یا کام کے طریق کار میں موجودہ اور نئے طبعی اور نفسیاتی و سماجی خطرات کی باقاعدہ بنیادوں پر منظم اور مؤثر شناخت کو یقینی بنائے؛(بی) ایسے خطرات کو ختم کرے، اور اگر ان کا خاتمہ معقول حد تک ممکن نہ ہو، تو انہیں کم سے کم سطح پر لائے؛(سی) کام کی صحت و تحفظ کے انتظامی نظام کو منظم انداز میں نافذ کرے تاکہ ایسے نظام، طریقۂ کار، اور کاموں کی فراہمی اور عمل درآمد کو یقینی بنایا جا سکے جو محفوظ ہوں اور صحت کے لیے مضر نہ ہوں؛(ڈی) کام کی جگہ کو ہر قسم کے تشدد اور ہراسانی بشمول جنسی ہراسانی سے پاک رکھے، جیسا کہ دفعہ ‎50 میں بیان کیا گیا ہے؛(ای) اگر دفعہ ‎53 لاگو ہو، تو ہیلتھ اینڈ سیفٹی کے نمائندوں کی تربیت کے انتظامات کرے، بشمول سالانہ ہیلتھ اینڈ سیفٹی ٹریننگ میں شرکت، جو چیف انسپکٹر کی منظوری سے ہو، اور اس تربیت کے تمام اخراجات خود برداشت کرے؛(ایف) تمام ورکرز کو کام کی صحت و تحفظ سے متعلق مناسب تربیت فراہم کرے؛(جی) اپنے ماتحت ورکرز کو، اپنے خرچ پر، مقررہ وقفوں پر کام سے متعلقہ بیماریوں کے خلاف حفاظتی ٹیکے (ویکسینیشن اور انوکولیشن) لگوائے؛(ایچ) ایسے اوزار، مشینری، آلات، اور ساز و سامان فراہم اور برقرار رکھے جو محفوظ ہوں اور کسی نقصان کا سبب نہ بنیں؛(آئی) ورکرز اور دیگر افراد کو جسمانی، کیمیائی، حیاتیاتی، ریڈیولوجیکل، ارگونومک، نفسیاتی و سماجی یا دیگر خطرات سےبچائے؛(جے) پنجاب لیبر کوڈ اور ہیلتھ اینڈ سیفٹی رولز کے مطابق ضروری معلومات، ہدایات، تربیت اور نگرانی فراہم کرے؛(کے) کام کی جگہ کو محفوظ، صاف، منظم اور نقصان سے پاک حالت میں رکھے، اور ورکرز کے لیے کام کی جگہ میں محفوظ آمد و رفت کے ذرائع فراہم اور برقرار رکھے؛(ایل) اپنے احکامات یا زیراثر کام کرنے والے ہر ورکر کو، کام شروع ہونے سے پہلے، ان کے کام سے متعلق خطرات، ممکنہ نقصانات اور احتیاطی و حفاظتی اقدامات سے واضح، قابلِ فہم اور تحریری صورت میں آگاہ کرے؛(ایم) جہاں خطرات کو دیگر طریقوں سے ختم یا کنٹرول نہ کیا جا سکتا ہو، وہاں ورکرز کو، اپنے خرچ پر، ایسا حفاظتی لباس اور آلات فراہم کرے جو پیشہ ورانہ سیفٹی اینڈہیلتھ کونسل کی منظوری سے ہوں، تاکہ ہر قسم کے خطرے اور صحت پر مضر اثرات سے مکمل تحفظ ممکن ہو؛(این) جنرل رجسٹر میں ایسے تمام واقعات کی تفصیل درج کرے جن کے نتیجے میں چوٹ یا بیماری ہوئی ہو، اور تمام خطرناک وقوعات، بشمول آمد و رفت کے دوران، اور کام سے متعلق پیشہ ورانہ بیماریوں کے مشتبہ کیسز، اور اس کی ایک نقل انسپکٹر اور کمشنر برائے ملازمین معاوضہ کو ارسال کرے؛(او) ایمرجنسی کی صورت، خطرناک وقوعات، زخم، بیماری، موت یا صنعتی حادثات سے نمٹنے کے لیے مناسب اقدامات اور ابتدائی طبی امداد کے انتظامات فراہم کرے؛(پی) آگ یا دھماکے کی روک تھام اور ایسی صورت میں حفاظتی اقدامات کے لیے تمام عملی اقدامات کرے۔

(5) ہر آجر، پرنسپل یا قابض (آکو پائیر) پر لازم ہوگا کہ وہ کام کی جگہ پر پیش آنے والے کسی بھی حادثہ یا نقصان کی تفصیلات کو دفعہ ‎59 کے مطابق ریکارڈ کرے اور اس بات کو یقینی بنانے کے لیے تمام معقول حد تک ممکن اقدامات کرے کہ اس واقعہ کی تحقیقات کی جائے تاکہ اس کے اسباب معلوم کیے جا سکیں اور ایسی تحقیقی رپورٹ انسپکٹر کو پیش کرے۔

44۔ سیفٹی اور ہیلتھ پالیسی کا تحریری بیان:۔ ہر آجر، پرنسپل اور قابض، جن پر یہ پنجاب لیبر کوڈ لاگو ہوتا ہے، سوائے ایسی صورتوں کے جو حکومت مقرر کرے، ایک تحریری بیان جاری کرے گا جو کام کی جگہ پر ان کے زیراثر تمام افراد کی حفاظت اور صحت کے بارے میں عمومی پالیسی ہو۔یہ بیان مشاورت، کام کی جگہ پر حفاظت کے تنازعات کے حل اور اموات، چوٹوں اور قریب وقوعہ کی رپورٹنگ کے طریق کار کے بارے میں دفعات پر مشتمل ہوگا۔اس پالیسی پر اس وقت نظر ثانی اور ترمیم کی جائے گی جب:(اے) حفاظت کے خطرات کے انتظام کے طریق کار کو متعارف کرایا جائے یا تبدیل کیا جائے؛ اور(بی) ایسی تبدیلیاں تجویز کی جائیں جو حفاظت، صحت یا فلاح کو متاثر کرسکتی ہوں، چاہے وہ کام کی جگہ کی عمارت ہو، کام کے نظام یا طریق کار ہوں، یا کام میں استعمال ہونے والے پلانٹ یا مادے ہوں۔لیکن کم از کم مقرر کردہ مدت کے بعد، پالیسی کا جائزہ لیا جائے گا۔پالیسی اور اس میں کی گئی ترامیم کو کام کی جگہ پر موجود تمام افراد کے علم میں لایا جائے گا، ان زبانوں میں جو وہ سمجھ سکیں۔

45۔ ورکرز کے فرائض:۔ہر ورکر پرکام کی جگہ پرلازم ہے کہ:(اے) اپنی اور دیگر افراد کی حفاظت کے لیے مناسب احتیاط کرے جو اس کے اعمال یا غفلت سے متاثر ہو سکتے ہیں، بغیر جان بوجھ کر کسی کو خطرے میں ڈالے؛(بی) حفاظت اور صحت سے متعلق ذمہ داریوں کے سلسلے میں آجر، پرنسپل یا قابض (آکو پائیر) کے ساتھ تعاون کرے؛(سی) کسی بھی حادثے، صحت کو نقصان پہنچنے یا خطرناک واقعہ کی فوری اطلاع آجر، پرنسپل یا قابض (آکو پائیر) کو دے؛(ڈی) تشدد یا ہراسانی، بشمول جنسی ہراسانی، میں ملوث نہ ہو جیسا کہ دفعہ 50 میں بیان کیا گیا ہے؛(ای) حفاظتی لباس اور حفاظتی آلات کا صحیح استعمال یقینی بنائے؛(ایف) کسی بھی وسائل، آلات، ساز و سامان یا دیگر چیزوں میں جان بوجھ کر مداخلت یا غلط استعمال نہ کرے؛ اور(جی) اگر کسی خطرناک مقام سے فرار ہونا پڑے تو فوراً اس صورتحال کی اطلاع اپنے سپروائزر کو دے۔

46۔ سیلف ورکر کے فرائض:۔ ہر سیلف ورکر درج ذیل امور کا پابند ہوگا::(اے) کام کی جگہ پر تمام ورکرز کی سیفٹی اینڈ ہیلتھ سے متعلق ذمہ داریوں کا تعین کرے؛(بی) کام کی جگہ پر سیفٹی اینڈ ہیلتھ کے تحفظ کے سلسلے میں آجروں، قابضین، پرنسپلز، ذیلی ٹھیکے داروں، دیگر سیلف ورکرز، سیفٹی اینڈ ہیلتھ کے نمائندگان، اورسیفٹی اینڈ ہیلتھ کی کمیٹیوں کے ساتھ تعاون کرے؛(سی) ایسا طریقۂ کار اختیار کرے جس سے کام کی جگہ پر کسی کی صحت یا حفاظت کو خطرہ لاحق نہ ہو؛ اور(ڈی) ایسی معلومات قابض، ٹھیکے دار، ذیلی ٹھیکے دار، دیگر سیلف ورکر، سیفٹی اینڈ ہیلتھ کے نمائندگان، اورسیفٹی اینڈ ہیلتھ کی کمیٹیوں کو فراہم کرے جو دوسروں کی سیفٹی اینڈ ہیلتھ کو متاثر کر سکتی ہوں۔

47۔ مخصوص احاطہ جات کے نگران افراد کے فرائض، ان افراد کے لیے جو ان کےورکر نہیں ہیں:۔ ہر وہ شخص جو ورکرنہ ہو لیکن کسی احاطے کو استعمال کر رہا ہو، اُس پر لازم ہے کہ جہاں تک مناسب طور پر قابلِ عمل ہو، یہ یقینی بنائے کہ احاطہ، اس میں داخل ہونے یا وہاں سے نکلنے کے تمام ذرائع جو ایسے افراد کے استعمال کے لیے دستیاب ہوں جو اس احاطے کو استعمال کر رہے ہوں، اور احاطے میں موجود کوئی بھی پلانٹ یا مواد، محفوظ طریقے سے اور بغیر کسی صحت کے خطرے کے استعمال کیا جائے۔

48۔ اشیاء اور مادّوں سے متعلق تیار کنندگان کے فرائض:۔ ہر وہ شخص جو کسی اوزار، مشینری، ساز و سامان تیار کرتا ہے، جوڑتا ہے، نصب کرتا ہے، قائم کرتا ہے یا کسی مادّے کو کام کی جگہ پر استعمال کے لیے ذخیرہ کرتا ہے، اُس پر لازم ہوگا کہ:(اے) اسمبلنگ، تنصیب، قیام (ایریکشن) یا ذخیرہ محفوظ طریقے سے ہو؛(بی) جس شخص کو ایسے اوزار، مشینری، ساز و سامان استعمال کرنا ہو یا ایسے مادّے کو سنبھالنا ہو، اُسے ان کے استعمال، چلانے، سنبھالنے اور دیکھ بھال سے متعلق تمام معلومات فراہم کی جائیں۔

49۔ کام میں استعمال ہونے والے سامان کے حوالے سے فراہم کنندہ کے فرائض:۔(1) دفعہ ہذا میں:(اے) "آرٹیکل" سے مراد آلے، مشینری، ساز و سامان یا مواد، بشمول کیمیائی اور حیاتیاتی مادے ہیں جو کام میں استعمال ہوتے ہیں؛(بی) "فراہم کنندہ" (سپلائر) سے مراد وہ شخص ہے جو کسی اوزار، ساز و سامان، مشین، آلہ یا کسی حیاتیاتی، کیمیائی یا طبعی عامل کو کسی ورکر یا کام کی جگہ پر استعمال کے لیے فراہم کرتا، فروخت کرتا، کرایہ پر دیتا یا تقسیم کرتا ہے۔

(2) یہ فراہم کنندہ کا فرض ہوگا کہ جو کوئی بھی کام کی جگہ پر استعمال کے لیے کوئی شے فراہم کرے، وہ درج ذیل مخصوص اقدامات کرے، جو اس حد تک کافی ہوں کہ:(اے) جہاں تک مناسب طور پر قابلِ عمل ہو، اس بات کو یقینی بنایا جائے کہ شے کو اس طرح ڈیزائن اور تیار کیا گیا ہو کہ جب اس کا درست طریقے سے استعمال کیا جائے تو وہ محفوظ ہو اور صحت کے لیے کسی خطرے کا باعث نہ بنے؛(بی) ایسی جانچ اور معائنہ خود کرے یا کرانے کا انتظام کرے، جیسا کہ سابقہ شق میں اس پر عائد کردہ فرض کی ادائیگی کے لیے ضروری ہو؛(سی) یہ یقینی بنائے کہ جب کام میں اس شے کو استعمال کیا جائے، تو اس کے استعمال، اس مقصد کے لیے جس کے لیے اسے ڈیزائن اور تجربہ کیا گیا ہو، اور کسی بھی ایسی حالت سے متعلق مناسب معلومات دستیاب ہوں جو یہ یقینی بنائے کہ اس استعمال کے دوران وہ شے محفوظ رہے اور صحت کے لیے کوئی خطرہ نہ ہو۔

(3) دفعہ ہذا میں، اوزار، مشینری اور ساز و سامان کی فراہمی میں ان کی سنبھال، جوڑنے، نصب کرنے، قائم کرنے اور جانچنے کے اعمال بھی شامل ہوں گے۔

50۔ کام کی جگہ پر تشدد اور ہراسانی کے حوالے سے تمام افراد کے فرائض:۔(1) کوئی بھی شخص کام کے دوران تشدد اور ہراسانی، بشمول جنسی ہراسانی، میں ملوث نہیں ہوگا۔(2) ہر آجر، پرنسپل اور قابض، جہاں تک معقول حد تک ممکن ہو، اس امر کو یقینی بنائے گا کہ کام کی جگہیں تشدد اور ہراسانی، بشمول جنسی ہراسانی، سے پاک ہوں۔(3) ہر آجر، پرنسپل یا قابض:(اے) ورکرز اور ان کے نمائندوں سے مشاورت کرتے ہوئے کام کی جگہ پر تشدد اور ہراسانی کے خلاف پالیسی اپنائے اور نافذ کرے؛(بی)پیشہ ورانہ حفاظت اور صحت کے انتظام میں تشدد، ہراسانی اور متعلقہ نفسیاتی خطرات کو مدنظر رکھے؛(سی) ورکرز اور ان کے نمائندوں کی شرکت سے تشدد اور ہراسانی کے خطرات کی شناخت اور ان کے خطرات کا جائزہ لے اور ان کے روک تھام اور کنٹرول کے اقدامات کرے؛(ڈی) ورکرز اور دیگر متعلقہ افراد کو، حسبِ مناسبت قابلِ رسائی شکل میں، تشدد اور ہراسانی کے نشاندہی شدہ خطرات اور ان سے متعلق روک تھام اور تحفظ کے اقدامات کے بارے میں، بشمول ورکرز اور دیگر متعلقہ افراد کے حقوق اور ذمہ داریوں کے، معلومات اور تربیت فراہم کرے؛(ای) کام کی جگہ یا داخلی ویب سائٹ پر ایسی معلومات شائع کرے جو اس طرح کے رویوں کی رپورٹنگ اور نمٹنے کے لیے ادارے کی سطح پر موجود طریق کار، اور متعلقہ فورم کے رابطہ تفصیلات سے متعلق ہوں۔

51۔ شکایات کے ازالے کی کمیٹی:۔(1) ہر ایسے ادارے میں جہاں دس سے زائد ملازمین ہوں، آجر، پرنسپل یا قابض جو بھی مناسب ہوایک کمیٹی برائے شکایات کا ازالہ قائم کرے گا تاکہ امتیاز، تشدد اور ہراسانی کے متعلق شکایات کی جانچ پڑتال کی جا سکے۔ اس کمیٹی میں تین ارکان ہوں گے جن میں سے ایک رکن سینئر انتظامیہ کا ہوگا، ایک ورکرز کا نمائندہ ہوگا اور ورک فورس میں خواتین کی موجودگی کی صورت میں کم از کم ایک رکن خاتون ہوگی۔(2) کمیٹی ہر شکایت یا متعلقہ رپورٹ وصول کرے گی، تحقیقات کرے گی اور اسے اس انداز میں سنبھالے گی جو امتیاز، تشدد اور ہراسانی کے لیے زیرو ٹولیرنس کو ظاہر کرے، ساتھ ہی راز داری اور انسانی وقار کا احترام کیا جائے گا اور شکایات یا رپورٹس کی وصولی، تحقیقات اور انتظام میں کوئی رکاوٹ نہیں ڈالے گی۔(3) تحریری شکایت موصول ہونے پر، کمیٹی برائے شکایات ازالہ وہی طریق کار اختیار کرے گی جو حصہ سوم میں نظم و ضبط کے اقدامات کے حوالے سے بیان کیا گیا ہے۔(4) دفعہ ہذا میں شامل کوئی امر سیفٹی اینڈ ہیلتھ کے نمائندوں اور کمیٹیوں کے اختیارات اور افعال کو محدود نہیں کرے گا جو کام کی جگہ پر تشدد اور ہراسانی روکنے کے سلسلے میں ذمہ دار ہیں۔

بی۔سیفٹی اینڈ ہیلتھ کے فرائض کے نفاذ کے لیے کام کی جگہ پر مشاورتی انتظامات

52۔ ورکرز سے مشاورت:۔(1) آجر، پرنسپل اور قابض، جہاں تک معقول حد تک ممکن ہو، ان ورکرز سے مشاورت کریں گے جو ان کے لیے کام کرتے ہیں اور جو کام کی جگہ کی حفاظت یا صحت کے متعلق معاملے سے براہِ راست متاثر ہو سکتے ہیں یا ہونے کا امکان ہو۔(2) مشاورت کے لیے ضروری ہے کہ:(اے) متعلقہ معلومات ورکرز کے ساتھ شیئر کی جائیں؛(بی) ورکرز کو مناسب موقع دیا جائے کہ وہ اپنے خیالات کا اظہار کریں اور کام کی حفاظت یا صحت کے مسائل اٹھائیں، اور فیصلوں میں حصہ لیں؛(سی) کاروبار یا ادارے کے چلانے والے شخص کی طرف سے ورکرز کے خیالات کو مدنظر رکھا جائے؛(ڈی) مشاورت کے نتیجے سے ورکرز کو بروقت آگاہ کیا جائے۔(3) مشاورت میں ہر وہ سیفٹی اینڈ ہیلتھ نمائندہ اور پیشہ ورانہ سیفٹی اینڈ ہیلتھ کمیٹی شامل ہوگی جو ان ورکرز کی ذمہ دار ہو جو مشاورت کے موضوع والے معاملے سے براہِ راست متاثر ہوتے ہیں یا ہونے کا امکان ہو۔

53۔ سیفٹی اینڈ ہیلتھ نمائندگان:۔(1) ہر ایسی جگہ جہاں 30 یا اس سے زیادہ ورکرہوں، ایک یا زیادہ سیفٹی اینڈ ہیلتھ کے نمائندے مقرر کیے جا سکتے ہیں:(اے) اگر کوئی اجتماعی سودا کاری کا ایجنٹ موجود ہو تو وہ اجتماعی سودا کاری کا ایجنٹ؛ یا(بی) اگر اجتماعی سودا کاری کا ایجنٹ موجود نہ ہو تو ورکرز کی جانب سے انتخاب کے ذریعے:اور ایسے نمائندگان کام کے دوران حفاظت، صحت اور فلاح و بہبود سے متعلق تمام معاملات میں اس کام کی جگہ کے ورکرز کی نمائندگی کریں گے۔(2) سیفٹی اینڈ ہیلتھ نمائندہ اس کام کی جگہ کے ورکرز کی نمائندگی کرنے کا حق رکھتا ہے چاہے وہ ایک ہی آجر یا پرنسپل کے تحت کام کرتے ہوں یا نہیں۔(3) انتخاب کی شروعات درج ذیل افراد کر سکتے ہیں:(اے) آجر، پرنسپل یا مقیم جو ورکرز کو کام پر رکھتا ہو؛(بی)کوئی ورکر؛ یا(سی) اجتماعی سودا کاری کا ایجنٹ یا، جہاں اجتماعی سودا کاری کا ایجنٹ موجود نہ ہو، ٹریڈ یونین۔(4) فریقین مندرجہ ذیل باتوں پر اتفاق کریں:(اے) سیفٹی اینڈ ہیلتھ نمائندگان کی تعداد جو مقرر کی جائے گی؛(بی) سیفٹی اینڈ ہیلتھ نمائندگان کی مدتِ عہدہ؛(سی) ورکرز کے وہ گروپس جن کے لیے ایک یا زیادہ نمائندگان ذمہ دار ہوں گے؛(ڈی) جہاں ذیلی دفعہ (1) کی ضمن (بی) لاگو ہو، وہاں بروقت انتخابی طریق کار:مگرشرط یہ ہے کہ اگر کسی خالی آسامی کے لیے نامزدگیوں کی تعداد آسامیوں کے برابر ہو تو انتخاب کی ضرورت نہیں ہوگی۔(5) ذیلی دفعہ (4) میں لفظ "فریقین" سے مراد:(اے) اجتماعی سودا کاری کا ایجنٹ، اور اگر کوئی اجتماعی سودا کاری کا ایجنٹ نہ ہو تو ورکرز اور ان کی یونین، اگر کوئی ہو؛(بی) آجر، یا اگر کام کی جگہ پر متعدد فریق ہوں تو اس جگہ پر مکمل کنٹرول رکھنے والا قابض۔(6) اگر فریقین ذیلی دفعہ (4) کے امور پر ذیلی دفعہ (2) کے تحت انتخابات شروع ہونے کی تاریخ سے 30 دن کے اندر کوئی اتفاق رائے نہیں کر پاتے تو کوئی بھی فریق انسپکٹر سے درخواست کر سکتا ہے کہ وہ ان امور پر فیصلہ کرے جو کہ فریقین پر لازم ہوگا۔(7) آجر، پرنسپل اور قابض اس حد تک ذمہ دار ہوں گے کہ کام کی جگہ پر اپنے کنٹرول کے دائرہ کار میں سیفٹی اینڈ ہیلتھ نمائندہ کو:(اے) حفاظتی و صحتی امور کی مناسب معلومات دی جائیں، عوامل کا معائنہ کرنے کی اجازت دی جائے، اور ایسے اقدامات تجویز کرنے کی حوصلہ افزائی کی جائے؛(بی) جب کوئی بڑے حفاظتی و صحتی اقدامات کا منصوبہ بنایا جائے اور اسے نافذ کرنے سے پہلے نمائندہ سے مشورہ کیا جائے، اور ورکرز کی حمایت حاصل کی جائے؛(سی) کام کے عمل، کام کے مواد یا تنظیم میں تبدیلیوں کی منصوبہ بندی میں مشورہ لیا جائے جو ورکرز کی حفاظت یا صحت پر اثر انداز ہو سکتی ہوں؛(ڈی) سیفٹی اینڈ ہیلتھ کے معاملات میں فیصلوں کے عمل میں نمائندہ کو شامل کیا جائے؛(ای) کام کی جگہ کے تمام حصوں تک نمائندہ کی رسائی ہو اور کام کے دوران ورکرز سے حفاظتی و صحتی امور پر بات چیت کر سکے؛(ایف) نمائندہ کو لیبر انسپکٹرز سے رابطہ کرنے کی آزادی ہو؛(جی) نمائندہ پیشہ ورانہ سیفٹی اینڈ ہیلتھ کے امور پر مذاکرات میں حصہ لے سکے؛(ایچ) نمائندہ کو اپنے حفاظتی و صحتی فرائض انجام دینے اور متعلقہ تربیت حاصل کرنے کے لیے تنخواہ کے ساتھ کام کے اوقات کے دوران مناسب وقت دیا جائے؛(آئی) نمائندہ کو خاص حفاظتی و صحتی مسائل پر مشورہ دینے والے ماہرین سے رجوع کرنے کی سہولت دی جائے۔(8) آجر اور پرنسپل ہر دو سال کم از کم ایک بار اپنے پیشہ ورانہ سیفٹی اینڈ ہیلتھ نمائندوں کو سرکاری منظور شدہ حفاظتی و صحتی تربیت میں شرکت کی اجازت دیں گے اور اس کی تمام لاگت بشمول تنخواہ کے ساتھ رخصت، کورس فیس، رہائش و طعام، سفر وغیرہ برداشت کریں گے۔(9) سیفٹی اینڈ ہیلتھ نمائندہ استعفیٰ دے گا اگر:(اے) انسپکٹر یہ فیصلہ کرے کہ نمائندہ نے:(i) سنگین بدعملی (مس کنڈکٹ) کی ہو؛(ii) غیر معقول طور پر پنجاب لیبر کوڈ کے مطابق اپنے فرائض پورے نہ کیے ہوں؛ یا(بی) ورکرز کی اکثریت جس گروپ کی نمائندگی کر رہا ہو اس نے اس کا استعفیٰ طلب کیا ہو؛ایسی صورت میں نئے نمائندے کے لیے انتخاب کروایا جائے گا۔(10) سیفٹی اینڈ ہیلتھ نمائندہ ذاتی طور پر اس بات کا ذمہ دار نہیں ہوگا جو اس نے نیک نیتی سے کیا یا نہ کیا ہو:(اے) وہ نیک نیتی سے پنجاب لیبر کوڈ کے تحت اختیار یا فرائض انجام دے رہا ہو؛ یا(بی)اسے معقول یقین ہو کہ وہ پنجاب لیبر کوڈ کے تحت اختیار یا فرائض کی ادائیگی میں نیک نیتی سے کام کر رہا ہے۔

54۔ سیفٹی اور ہیلتھ کمیٹیاں:۔(1) ہر کام کی جگہ جہاں پچھلے بارہ مہینوں میں پچاس یا اس سے زیادہ ورکرز ہوں، آجر یا اگر کام کی جگہ پر متعدد فریق ہوں تو وہ قابض جو کام کی جگہ پر مکمل کنٹرول رکھتا ہو، تیس دن کے اندر ایک دوطرفہ سیفٹی اینڈ ہیلتھ کمیٹی قائم کرے گا، جو کم از کم تین اور زیادہ سے زیادہ پندرہ ورکرز پر مشتمل ہوگی۔(2) سیفٹی اینڈ ہیلتھ کمیٹی قائم کی جا سکتی ہے، اور اگر پچاس سے زیادہ ورکرز اس کی درخواست کریں تو لازماً قائم کی جائے گی:(اے) مختلف شعبہ جات یا حصوں کی سطح پر؛ اور(بی) پلیٹ فارم ورک یا آن لائن کیے جانے والے کام کی صورت میں، مخصوص علاقے یا خطے کے ورکرز کے گروپ کے حوالے سے۔(3) سیفٹی اینڈ ہیلتھ کمیٹی کی ساخت اور اس میں تقرری کا طریق کار سیفٹی اینڈ ہیلتھ قواعد کے مطابق مقرر کیا جا سکتا ہے۔(4) اگر کام کی جگہ پر سیفٹی اور ہیلتھ نمائندہ موجود ہو اور وہ رضامند ہو تو وہ کمیٹی کا رکن ہوگا۔(5) کمیٹی کے کم از کم نصف ارکان ایسے ورکرز ہوں گے جو آجر یا قابض (آکو پائیر) کی طرف سے نامزد نہ کیے گئے ہوں۔(6) سیفٹی اور ہیلتھ کمیٹی کے فرائض درج ذیل ہیں:(اے) کام کی جگہ پر حفاظت اور صحت کو یقینی بنانے کے لیے قابض (آکو پائیر) اور ورکرز کے درمیان تعاون کو فروغ دینا،(بی)دفعہ 44 میں مذکور تحریری سیفٹی اور ہیلتھ پالیسی کی تیاری میں قابض (آکو پائیر) کے ساتھ تعاون کرنا؛(سی) کام کی جگہ پر اپنانے والے سیفٹی اور ہیلتھ کے معیارات، قواعد و ضوابط کی تیاری میں معاونت کرنا؛(ڈی)سیفٹی اینڈ ہیلتھ رولز یا قابض (آکو پائیر) اور کمیٹی کے مابین مصرحہ دیگر فرائض۔(7) آجر، یا اگر کام کی جگہ پر متعدد فریق ہوں تو کام کی جگہ پر مکمل کنٹرول رکھنے والا قابض، کمیٹی کے اراکین کو ان کے فرائض کی انجام دہی کے لیے مناسب وقت اور معلومات فراہم کرے گا۔(8) سیفٹی اور ہیلتھ کمیٹی کم از کم ہر تین ماہ بعد ایک بار اجلاس منعقد کرے گی اور کمیٹی کے کم از کم نصف اراکین کی درخواست پر کسی بھی مناسب وقت پر بھی اجلاس بلایا جا سکتا ہے۔(9) جہاں دفعہ 200 کے تحت ورکس کونسل قائم ہو چکی ہو، وہاں ورکس کونسل دفعہ ہذا کے مقاصد کے لیے سیفٹی اور ہیلتھ کمیٹی تشکیل دے سکتی ہے، بشرطیکہ کم از کم ایک سیفٹی اور ہیلتھ نمائندہ ورکس کونسل کا رکن ہو۔

55۔ سیفٹی اور ہیلتھ ذمہ داریوں والے ورکرز کا تحفظ:۔(1) کوئی شخص جو آجر، پرنسپل یا قابض (آکو پائیر) ہو، کسی ورکر کو اس وجہ سے برطرف نہیں کرے گا یا اس کے خلاف کوئی دیگر نقصان دہ اقدام (بشمول تنخواہ کی کٹوتی) نہیں کرے گا کہ:(اے) وہ ورکرسیفٹی اور ہیلتھ نمائندہ ہے، رہا ہے یا بننے کا ارادہ رکھتا ہے؛(بی)وہ ورکرسیفٹی اور ہیلتھ کمیٹی کا رکن ہے، رہا ہے یا بننے کا ارادہ رکھتا ہے؛(سی) وہ ورکرباب ہذا کے تحت کسی اختیار کا استعمال کرتا ہے، کر چکا ہے، یا کرنے کا ارادہ رکھتا ہے یا کوئی فعل انجام دیتا ہے؛(ڈی)وہ ورکرسیفٹی اور ہیلتھ سے متعلق کسی مسئلے یا تشویش کو اٹھاتا ہے، اٹھا چکا ہے، یا اٹھانے کا ارادہ رکھتا ہے:(i) آجر، پرنسپل یا قابض (آکو پائیر) کے ساتھ؛

(ii) کسی انسپکٹر کے ساتھ؛

(iii) کسی سیفٹی اور ہیلتھ کے نمائندے یا سیفٹی اور ہیلتھ کمیٹی کے رکن کے ساتھ؛

(iv) کسی ٹریڈ یونین یا اجتماعی سودا کاری کے ایجنٹ، یا کسی دوسرے ورکر کے ساتھ۔(ای) وہ ورکر دفعہ 67 کے تحت حقوق کا استعمال کرتا ہے؛(ایف) وہ ورکر حصہ ششم کے تحت کسی کارروائی میں ملوث ہو۔(2) یہ ثابت کرنے کی ذمہ داری کہ کسی ورکر کے خلاف برطرفی یا دیگر نقصان دہ کارروائی ذیلی دفعہ (1) میں بیان کردہ وجہ سے نہیں کی گئی، یاجیسی بھی صورت ہو، آجر، پرنسپل یا قابض (آکو پائیر) پر ہوگی۔(3) دفعہ ہذا کی خلاف ورزی دفعہ 392 کے تحت قابل سزا ہوگی۔

56۔ سیفٹی اور ہیلتھ افسر اور ویلفیئر افسران کی تعیناتی:۔ہر ایسی کام کرنے کی جگہ جہاں سیفٹی اینڈ ہیلتھ رولز کی طرف سے صراحت کی گئی ہو، جس شخص کے پاس مکمل کنٹرول ہوگا وہ کرےگا:(اے) مصرحہ طریقے سے کام کی جگہ پر ایک یا ایک سے زائد اہل افراد کوبطورسیفٹی اینڈ ہیلتھ افسر مقرر کرے گا؛ اور(بی)اتنے ویلفیئر افسران کو مقرر کرے گا جن کی تعداد اور اہلیت مقرر کی گئی ہو، تاکہ وہ مصرحہ فرائض اور شرائط پر اپنے فرائض انجام دے سکیں۔

سی۔ پیشہ ورانہ صحت۔

57۔ کام کی جگہ پر متعدی یا وبائی امراض سے بچاؤ کی احتیاطی تدابیر:۔(1) ہر ورکر اور رضاکار کو ایک "حفظان صحت کارڈ" فراہم کیا جائے گا۔ ہر سال جنوری اور جولائی کے مہینوں میں اس کارڈ پر ایک مستند طبی پریکٹیشنر کے معائنے کے بعد یہ اندراج کیا جائے گا کہ ورکر کسی متعدی، وبائی یا پیشہ ورانہ بیماری میں مبتلا نہیں ہیں اس معائنے کی فیس حکومت مقرر کرے گی، اور یہ فیس اس شخص کے ذمہ ہوگی جس نے ورکر کو کام پر رکھا ہے۔(2) اگر ذیلی دفعہ (1) کے تحت معائنے کے دوران کوئی ورکر کسی متعدی، وبائی یا پیشہ ورانہ بیماری میں مبتلا پایا جائے، تو کام پر رکھنے والا شخص اسے تنخواہ کے ساتھ چھٹی اور مناسب طبی علاج فراہم کرے گا۔

(3) ہر ورکر کو مصرحہ بیماریوں کے خلاف اور ان کی طرف سے طے کردہ وقفوں پر ویکسین لگائی جائے گی اور اس کے اخراجات، اگر کوئی ہوں، تو وہ کام کی جگہ کے قابض (آکو پائیر) کے ذمہ ہوں گے۔

(4) چیف انسپکٹر کام کی جگہ کے سائز یا دیگر حالات کی بنا پر، تحریری حکم کے ذریعے، مخصوص قسم کی کام کی جگہوں کے لیے دفعہ ہذا میں نرمی یا ترمیم کر سکتا ہے۔

58۔ تصدیقی سرجن:۔ (1) حکومت پنجاب لیبر کوڈکے مقاصد کے لیے، اپنی صوابدید کے مطابق، ایسے رجسٹرڈ میڈیکل پریکٹیشنرز کو تصدیق کنندہ سرجن مقرر کر سکتی ہے، جو ایسی مقامی حدود میں کام کریں گے جو حکومت انہیں بالترتیب تفویض کرے۔

(2) ایک تصدیق کنندہ سرجن کسی بھی رجسٹرڈ میڈیکل پریکٹیشنر کو پنجاب لیبر کوڈکے تحت اپنے اختیارات استعمال کرنے کا اختیار دے سکتا ہے:

مگرشرط یہ ہےکہ ایسے مجاز پریکٹیشنر کی طرف سے جاری کردہ ملازمت کے لیے فٹنس سرٹیفکیٹ صرف تین ماہ کے لیے کارآمد ہوگا، جب تک کہ متعلقہ شخص کے معائنے کے بعد خود تصدیق کنندہ سرجن اس کی تصدیق نہ کرے۔

(3) دفعہ ہذامیں "رجسٹرڈ میڈیکل پریکٹیشنر" سے مراد وہ طبی پریکٹیشنر ہے جو پاکستان میڈیکل اینڈ ڈینٹل کونسل کے ساتھ باقاعدہ رجسٹرڈ ہو۔

ڈی۔ رپورٹنگ، نوٹیفکیشن اور تفتیش

59۔ حادثات، خطرناک واقعات اور پیشہ ورانہ بیماریوں کی اطلاع اور تفتیش:۔(1) آجر یا پرنسپل حادثات اور نقصان کا ایک رجسٹر مصرحہ طریقے سے رکھے گا، جس میں درج ذیل تفصیلات ریکارڈ کی جائیں گی:(اے) ہر وہ حادثہ جس نے ان کے زیرِ ملازمت کسی ورکر کو نقصان پہنچایا ہو، یا پہنچا سکتا تھا؛ اور(بی) ہر وہ واقعہ جس کے نتیجے میں ان کے زیرِ ملازمت کسی ورکر کو کام کی جگہ پر کسی خطرے کا سامنا کرنے کی وجہ سے نقصان پہنچا۔(2) ایک قابض (آکو پائیر) مصرحہ طریقے سے حادثات اور نقصانات کا ایک رجسٹر رکھے گا اور اس رجسٹر میں ان مصرحہ تفصیلات کو درج کرے گا جو مندرجہ ذیل سے متعلق ہیں:(اے) ہر وہ حادثہ جس نے اس کے زیرِ انتظام کام کی جگہ پر کسی بھی شخص کو نقصان پہنچایا ہو، یا پہنچا سکتا تھا؛ اور(بی) ہر وہ واقعہ جس کے نتیجے میں کسی شخص کو اس کے زیرِ انتظام کام کی جگہ پر کسی خطرے کا سامنا کرنے کی وجہ سے نقصان پہنچا۔(3) ذیلی دفعہ (1) اور (2) میں مذکور رجسٹر میں ہر اس حادثے کا اندراج کیا جائے گا جو کام کی جگہ پر پیش آیا ہو اور:

(اے) جس سے جانی نقصان ہوا ہو؛(بی) جس کے باعث کوئی شخص سات دن سے زیادہ عرصے تک اپنی معمول کی ڈیوٹی پر حاضر نہ ہو سکے؛(سی) جس کے نتیجے میں کام سے متعلق کسی عمل یا کارروائی کی وجہ سے کوئی شخص بے ہوش ہو گیا ہو۔(4) ہر سیلف ورکر مصرحہ فارم میں حادثات اور نقصانات کا ایک رجسٹر رکھے گا اور اس رجسٹر میں ان مصرحہ تفصیلات کو درج کرے گا جو مندرجہ ذیل سے متعلق ہیں:(اے) ہر وہ حادثہ جس نے کام کے دوران سیلف ورکر کو نقصان پہنچایا ہو، یا پہنچا سکتا تھا؛(بی) ہر وہ حادثہ جو سیلف ورکر کے کام کے نتیجے میں ہوا ہو اور جس نے کسی بھی شخص کو نقصان پہنچایا ہو، یا پہنچا سکتا تھا؛(سی) ہر وہ واقعہ جس کے نتیجے میں سیلف ورکرکو نقصان پہنچا ہو:

کام کے دوران؛ یا

کسی ایسے خطرے کے نتیجے میں جس کا سامنا سیلف ورکر کو کام کے دوران ہوا۔

(5) ہر حادثے کی اطلاع اس کے پیش آنے کے چوبیس گھنٹے کے اندر اندر مصرحہ طریقے سے انسپکٹر کو دی جائے گی:(اے) اگر کسی ورکر کو حادثہ پیش آیا ہو تو اس آجر یا پرنسپل کے ذریعے جس نے اسے کام پر رکھا تھا؛(بی) اگر ورکر خود ملازم ہو اور کسی آجر یا پرنسپل کے زیرِ ملازمت نہ ہو تو سیلف ورکر کے ذریعے؛(سی) کسی بھی صورت میں، اس کام کی جگہ کے قابض (آکو پائیر) کے ذریعے جہاں حادثہ پیش آیا ہو۔(6) اگر ذیلی دفعہ (5) میں مذکور کسی حادثے کے نتیجے میں کام کی جگہ پر کسی شخص کی معذوری یا موت واقع ہو جائے، تو مذکورہ ذیلی دفعہ میں بیان کردہ متعلقہ شخص معذوری یا موت کی اطلاع ملنے کے چوبیس گھنٹے کے اندر اندر انسپکٹر، چیف انسپکٹر، اور ملازمین کے معاوضے (زرِتلافی) کے کمشنر کو تحریری نوٹس بھیجے گا۔(7) جس کام کی جگہ پر ورکرز کو کام کے دوران سیفٹی اینڈ ہیلتھ کے لیے خصوصی خطرات یا خطرات کا سامنا ہونے کا امکان ہو، وہاں انسپکٹر یا چیف انسپکٹر ان ورکرز سے حالات کے مطابق اور انسپکٹر یا چیف انسپکٹر کی طرف سے طے کردہ وقفوں پر ملازمت سے پہلے اور وقتاً فوقتاً طبی معائنےکروانے کا تقاضا کر سکتا ہے، اور قابض (آکو پائیر) اور ورکرز اس کی تعمیل کے پابند ہوں گے۔

(8) طبی معائنہ حکومت کی طرف سے مجازکردہ کسی ہسپتال میں کرایا جائے گا اور اس کے اخراجات کی ادائیگی مندرجہ ذیل کے ذمہ ہوگی:(اے) اگر ورکر کسی آجر یا پرنسپل کے زیرِ ملازمت ہو تو آجر یا پرنسپل؛ یا(بی) کسی دیگر صورت میں، قابض۔

60۔ حادثے کی جگہ پر مداخلت نہ کرنا:۔ جب کام کی جگہ پر کوئی حادثہ پیش آتا ہے، تو کوئی بھی شخص، جب تک کہ انسپکٹر کی طرف سے مجاز نہ ہو، جائے وقوعہ سے متعلق کسی بھی ملبے، اشیاء، مادے یا چیز کو نہ ہی ہٹائے گا، اور نہ ہی اس میں کسی بھی طرح کی مداخلت کرے گا یا اسے چھیڑے گا، سوائے اس حد تک جو مندرجہ ذیل کے لیے ضروری ہو:(اے) کسی شخص کی جان بچانے، نقصان سے روکنے یا تکلیف کم کرنے کے لیے؛(بی)عوام کی رسائی کو کسی ضروری خدمت یا سہولت تک برقرار رکھنے کے لیے؛ یا(سی)کسی جائیداد کو شدید نقصان یا ضیاع سے بچانے کے لیے۔

61۔ واقعات، حادثات اور بیماریوں کی باقاعدہ تحقیقات کی ہدایت دینے کا اختیار:۔ حکومت کسی بھی حادثے یا کسی پیشہ ورانہ بیماری یا کسی اور بیماری کے بارے میں جو کسی کام کی جگہ پر ہوئی ہو، یا اس کے ہونے کا شبہ ہو، اور اس کی وجوہات اور حالات کے بارے میں باقاعدہ تحقیقات کی ہدایت دے سکتی ہے، اور ایسی کسی بھی تحقیقات کے حوالے سے درج ذیل دفعات لاگو ہوں گی:(اے) حکومت ایسی تحقیقات کے لیے تکنیکی، قانونی یا خصوصی علم رکھنے والے ایک یا ایک سے زیادہ اہل افراد کو بطور اسیسرمقرر کر سکتی ہے؛(بی) اس طرح مقرر کردہ اسیسرعام اجلاس میں ایسی تحقیقات کریں گے اور ایسے انداز اور شرائط کے تحت کارروائی کریں گے جو اسیسر واقعہ، حادثے یا بیماری کی وجوہات اور حالات کا پتہ لگانے اور عدالت کو رپورٹ بنانے کے قابل بنانے کے لیے سب سے زیادہ مؤثر سمجھیں؛(سی) ایسی کسی بھی تحقیقات کے لیے مقرر کردہ شخص کو مجموعہ ضابطہ دیوانی، 1908 (V بابت 1908) کے تحت کسی دیوانی عدالت کے تمام اختیارات حاصل ہوں گے تاکہ وہ واقعات، حادثات اور بیماریوں کے معاملات کی باقاعدہ تحقیقات کی ہدایت دے سکے۔

62۔ بارِ ثبوت:۔ (1) جہاں باب ہذا، سیفٹی اینڈ ہیلتھ کے قواعد یا کسی ضابطے یا حکم کے تحت جنرل رجسٹر یا کسی دوسرے رجسٹر یا ریکارڈ میں کوئی اندراج کرنا ضروری ہو، وہاں آجر، پرنسپل یا کام کی جگہ کے قابض (آکو پائیر) یا ان کی طرف سے کسی شخص کا کیا ہوا اندراج، آجر، پرنسپل یا قابض (آکو پائیر) کے خلاف، اس میں درج حقائق کے ثبوت کے طور پر قابل قبول ہوگا۔ اور یہ حقیقت کہ کوڈ کے کسی بھی حکم یا اس کے تحت بنائے گئے کسی ضابطے یا حکم کی تعمیل کے حوالے سے مطلوبہ کوئی اندراج نہیں کیا گیا، اس بات کے ثبوت کے طور پر قابل قبول ہوگا کہ اس حکم کی تعمیل نہیں کی گئی۔(2) باب ہذا، سیفٹی اینڈ ہیلتھ کے قواعد یا کسی ضابطے یا حکم کے تحت مطلوبہ کسی بھی معائنے یا اطلاع کو متعلقہ دفعہ، ضابطے یا حکم کے مطابق انجام دینے کا ثبوت فراہم کرنے کا بوجھ ذمہ دار شخص پر ہوگا۔

63۔ ادارے میں نوٹس آویزاں کرنا:۔ (1) کام کی جگہ کے داخلی راستوں یا کسی اور ایسی جگہ پر جہاں ورکرز قانونی طور پر جمع ہوتے ہیں، سیفٹی اینڈ ہیلتھ کے نمائندے، پیشہ ورانہ سیفٹی اینڈ ہیلتھ کمیٹی اگر موجود ہو، اور حکومت کے ڈاک کے پتے اور فون نمبرز کا نوٹس آویزاں کیا جائے گا۔

(2) قواعد کے تحت آویزاں کیے جانے والے نوٹس کے علاوہ، ہر ادارے میں ایک نوٹس بھی آویزاں کیا جائے گا جس میں کوڈ اور اس کے تحت بنائے گئے قواعد کے خلاصے شامل ہوں۔

(3) کوڈ اور اس کے تحت بنائے گئے کسی بھی قواعد کی ایک تازہ ترین نقل، کام کی جگہ پر موجود رکھی جائے گی اور کسی بھی ورکر کے حوالے کے لیے دستیاب ہوگی۔

ای۔ تعمیل کے اختیارات

64۔ بہتری کے نوٹسز:۔ (1) اگر انسپکٹر کی رائے ہو کہ کوئی شخص:

(اے) باب ہذا یا سیفٹی اینڈ ہیلتھ کے قواعد کی ایک یا ایک سے زیادہ دفعات کی خلاف ورزی کر رہا ہے؛ یا

(بی) دفعات ہذایا قواعد میں سے ایک یا زائد کی خلاف ورزی کر چکا ہے، اور حالات ایسے ہیں کہ خلاف ورزی کا جاری رہنا یا دہرایا جانا ممکن ہے:

تو انسپکٹر ایک بہتری کا نوٹس جاری کر سکتا ہے جس میں خلاف ورزی کی نشاندہی کی جائے گی اور متعلقہ شخص کو مندرجہ ذیل کی ہدایت دی جائے گی:

(اے) خلاف ورزی کو درست کرنا؛ یا

(بی) ممکنہ خلاف ورزی کو ہونے سے روکنا؛ یا

(سی) تمام حالات کے پیش نظر ایک معقول مصرحہ وقت کے اندر خلاف ورزی یا ممکنہ خلاف ورزی کا باعث بننے والی چیزوں یا کارروائیوں کو درست کرنا۔

(2) اگر کوئی شخص باب ہذایا سیفٹی اینڈ ہیلتھ کے قواعد کی خلاف ورزی کر رہا ہے اور انسپکٹر تمام حالات کے پیش نظر ایک معقول وقت کے اندر کام کی جگہ پر نہیں پہنچ سکتا، تو سیفٹی اینڈ ہیلتھ کا نمائندہ یا سیفٹی اینڈ ہیلتھ کمیٹی ایک عارضی بہتری کا نوٹس جاری کر سکتی ہے جو اس وقت تک مؤثر رہے گا جب تک کہ انسپکٹر وہاں پہنچنے کے قابل نہ ہو جائے:

مگرشرط یہ ہے کہ سیفٹی اینڈ ہیلتھ کا نمائندہ یا سیفٹی اینڈ ہیلتھ کمیٹی نوٹس جاری کرنے سے پہلے خلاف ورزی کرنے والے شخص سے مشورہ کرے گی۔

(3) جس شخص کو بہتری کا نوٹس یا عارضی بہتری کا نوٹس جاری کیا گیا ہو، وہ نوٹس میں دی گئی مدت کے اندر اس کی تعمیل کرے گا۔

(4) ذیلی دفعہ (5) کے تابع، جہاں کوئی بھی متعلقہ قانونی دفعات کسی عمارت یا اس سے متعلق کسی معاملے پر لاگو ہوتی ہیں اور انسپکٹر اس عمارت یا معاملے کے سلسلے میں اس حکم کی خلاف ورزی سے متعلق بہتری کا نوٹس جاری کرنے کا ارادہ رکھتا ہے، تو نوٹس میں اس حکم کی خلاف ورزی کو درست کرنے کے لیے ایسے اقدامات کی ہدایت نہیں کرےگا جو ان اقدامات سے زیادہ پیچیدہ ہوں جو اس وقت نافذ کسی بھی عمارت کے قواعد و ضوابط کے تقاضوں کی تعمیل کو یقینی بنانے کے لیے ضروری ہوں، جن کی اس عمارت یا معاملے کو اس وقت پیروی کرنی ہوتی اگر متعلقہ عمارت نئی تعمیر کی جا رہی ہوتی۔ تاہم، یہ اصول تب لاگو نہیں ہوگا جب متعلقہ دفعہ خود ایسے مخصوص تقاضے عائد کرے جو کسی بھی ایسے عمارت کے قواعد و ضوابط سے زیادہ پیچیدہ ہوں جن کی عمارت یا معاملہ کو پیروی کرنی ہوتی جیسا کہ اوپر بیان کیا گیا ہے:

مگرشرط یہ ہے کہ ذیلی دفعہ ہذا میں "متعلقہ عمارت" سے مراد، عمارت کی صورت میں، وہی عمارت ہے، اور کسی عمارت سے متعلق کسی معاملے کی صورت میں، وہ عمارت ہے جس سے وہ معاملہ منسلک ہے۔

(5) انسپکٹر کام کی جگہ کے طور پر زیرِ استعمال یا عنقریب استعمال ہونے والی کسی بھی عمارت کے سلسلے میں ایک نوٹس جاری کر سکتا ہے جس میں آگ لگنے کی صورت میں باہر نکلنے کے ذرائع کو متاثر کرنے والے اقدامات کا مطالبہ کیا جائے یا ان کی ضرورت پیدا ہو۔

65۔ ممانعت کے نوٹسز:۔(1) اگر کسی انسپکٹر کو معقول طور پر یہ یقین ہو کہ:

(اے) کام کی جگہ پر کوئی ایسی سرگرمی ہو رہی ہے یا ہوگی جس میں کسی فوری یا قریب الوقوع خطرے سے پیدا ہونے والےکسی شخص کی سیفٹی اینڈ ہیلتھ کے لیے سنگین خطرہ شامل ہے یا ہوگا؛ یا

(بی) کام کی جگہ پر کوئی ایسی سرگرمی ہو سکتی ہے جو اگر ہوئی تو کسی فوری یا قریب الوقوع خطرے سے پیدا ہونے والےکسی شخص کی سیفٹی اینڈ ہیلتھ کے لیے سنگین خطرہ شامل ہوگا:

تو انسپکٹر اس سرگرمی پر مکمل یا جزوی اختیار رکھنے والے شخص کو ہدایت دے سکتا ہے کہ وہ اس سرگرمی کو جاری نہ رکھے، یا اسے کسی مخصوص طریقے سے جاری نہ رکھے، جب تک کہ انسپکٹر اس بات سے مطمئن نہ ہو جائے کہ اس خطرے کا باعث بننے والے معاملات کو درست کر دیا گیا ہے۔

(2) ہدایت میں ورکرز کو کام کی جگہ چھوڑنے کا حکم بھی شامل ہوسکتا ہے۔

(3) ہدایت زبانی بھی دی جا سکتی ہے، لیکن اسے جلد از جلد تحریری ممانعت کے نوٹس کے ذریعے متعلقہ شخص کو فراہم کیا جانا ضروری ہے۔

(4) اگر:

(اے) کام کی جگہ پر کوئی ایسی سرگرمی ہو رہی ہے یا ہو سکتی ہے جس میں کسی فوری یا قریب الوقوع خطرے سے پیدا ہونے والا کسی شخص کی سیفٹی اینڈ ہیلتھ کے لیے سنگین خطرہ شامل ہے یا ہو سکتا ہے؛ اور

(بی) انسپکٹر تمام حالات کے پیش نظر ایک معقول وقت کے اندر کام کی جگہ پر نہیں پہنچ سکتا:

تو ایک سیفٹی اینڈ ہیلتھ کا نمائندہ ایک عارضی ممانعت کا نوٹس جاری کر سکتا ہے جو اس وقت تک مؤثر رہے گا جب تک کہ انسپکٹر وہاں پہنچنے کے قابل نہ ہو جائے:

مگرشرط یہ ہے کہ اگر حالات معقول طور پر اس کی اجازت دیں سیفٹی اینڈ ہیلتھ کا نمائندہ نوٹس جاری کرنے سے پہلے اس شخص سے مشورہ کرے جس کا سرگرمی یا اس کے جاری رہنے پر اختیار ہو۔

(5) جس شخص کو ممانعت کا نوٹس یا عارضی ممانعت کا نوٹس جاری کیا گیا ہو، وہ فوری طور پر اس کی تعمیل کرے گا۔

66۔ قریب الوقوع خطرے کی وجوہات سے نمٹنے کا اختیار:۔ (1) اگر کسی انسپکٹر کو کسی ایسی کام کی جگہ میں، جہاں اسے داخل ہونے کا اختیار ہے، کوئی ایسی شے یا مواد ملے اور انسپکٹر کو یہ یقین ہو کہ جس حالت میں وہ ملا ہے، وہ کسی فوری خطرے یا سنگین جسمانی چوٹ کا باعث بن سکتا ہے، تو انسپکٹر اسے قبضے میں لے کر غیر مؤثر بنا سکتا ہے اور اصلاحی اقدامات کر سکتا ہے، جن میں اسے تباہ کرنا، توڑنا، جدا کرنا، ہٹانا اور مرمت کرنا شامل ہو سکتا ہے۔

(2) کسی بھی ایسی شے کو غیر مؤثر بنانے سے پہلے، جو اسی طرح کی اشیاء کے کسی بیچ کا حصہ ہو، یا کسی مواد کو دفعہ ہذاکے تحت غیر مؤثر بنانے سے پہلے، انسپکٹر کو چاہیے کہ اگر اس کے لیے ممکن ہو تو اس کا ایک نمونہ لے اور اس جگہ کے قابض (آکو پائیر) کو، جہاں وہ شے یا مواد ملا تھا، اس نمونے کا ایک حصہ دے جو اس کی شناخت کے لیے کافی ہو اس پر نشان لگا ہو۔

(3) جب کسی شے یا مواد کو دفعہ ہذا کے تحت قبضے میں لے کر غیر مؤثر بنایا جائے، تو انسپکٹر جلد از جلد ایک تحریری رپورٹ تیار اور دستخط کرے گا جس میں ان حالات کی تفصیلات ہوں گی جن میں اس شے یا مواد کو قبضے میں لے کر اس سے نمٹا گیا، اور وہ اس رپورٹ کی ایک دستخط شدہ نقل کام کی جگہ کے قابض (آکو پائیر) کو دے گا اور، جب تک کہ وہ شخص شے یا مواد کا مالک نہ ہو، تو رپورٹ کی ایک دستخط شدہ نقل مالک کو بھی فراہم کرے گا۔ اگر انسپکٹر معقول تفتیش کے بعد مالک کا نام یا پتہ معلوم کرنے سے قاصر ہو، تو وہ نوٹس کی نقل کام کی جگہ کے قابض (آکو پائیر) کو دے کر اسے مالک تک پہنچا سکتا ہے۔

67۔ ورکرز کے حقوق برائے قریب الوقوع خطرات:۔ (1) اگر کوئی ورکر اپنے سپروائزر کو ایسی صورتحال کی اطلاع دیتا ہے جس کے بارے میں اس کے پاس معقول جواز ہو کہ یہ اس کی زندگی یا صحت کے لیے فوری اور سنگین خطرہ بنتی ہے، تو آجر، پرنسپل یا قابض (آکو پائیر) ورکرز کو ایسی صورتحال میں واپس کام پر جانے کا تقاضا نہیں کر سکتا جہاں زندگی یا صحت کو مسلسل فوری اور سنگین خطرہ لاحق ہو۔

(2) اگر کسی سیفٹی اینڈ ہیلتھ کے نمائندے یا سیفٹی اینڈ ہیلتھ کمیٹی کے پاس یہ یقین کرنے کا معقول جواز ہو کہ کوئی صورتحال ورکرز کی زندگی یا صحت کے لیے فوری اور سنگین خطرہ پیش کرتی ہے، تو وہ نمائندہ یا کمیٹی کسی ورکر کو کام روکنے کی ہدایت دے سکتی ہے:

مگر شرط یہ ہے کہ سیفٹی اینڈ ہیلتھ کا نمائندہ یا کمیٹی پہلے قابض (آکو پائیر) سے مشورہ کرے، ماسوائے اس کے کہ خطرے کی فوری نوعیت کے پیش نظر ایسا کرنا معقول نہ ہو۔

(3) جہاں دفعہ ہذاکے تحت کام روکا جاتا ہے، آجر، پرنسپل یا قابض (آکو پائیر) ورکرز کو اسی شرائط اور حالات پر عارضی متبادل کام کرنے کی اجازت دے سکتا ہے اور اپنا کام جاری رکھنے کی اجازت دے سکتا ہے، بشرطیکہ ایسا کرنا محفوظ ہو۔

(4) دفعہ ہذامیں موجود کوئی بھی چیز کسی ایسے شخص کی ملازمت کے جاری رہنے پر اثر انداز نہیں ہوگی جس کی کام کی جگہ یا اس کے کسی حصے میں ملازمت ذیلی دفعہ کے تحت ممنوع ہے۔

68۔ خراب حصوں کی تفصیلات یا استحکام کی جانچ کا تقاضا کرنے کے اختیارات:۔ اگر کسی انسپکٹر کو یہ لگے کہ کسی عمارت یا اس کے کسی حصے، یا کسی کام کی جگہ پر موجود راستے، مشینری یا پلانٹ کا کوئی حصہ ایسی حالت میں ہے جو انسانی زندگی یا حفاظت کے لیے خطرناک ہو سکتا ہے، تو انسپکٹر قابض (آکو پائیر) کو تحریری حکم جاری کر سکتا ہے، جس میں اس شخص سے مصرحہ تاریخ سے پہلے درج ذیل کا تقاضا کیا جائے گا:(اے) ایسی ڈرائنگز، تفصیلات اور دیگر معلومات فراہم کرنا جو یہ طے کرنے کے لیے ضروری ہوں کہ آیا ایسی عمارت، راستے، مشینری یا پلانٹ کو حفاظت کے ساتھ استعمال کیا جا سکتا ہے؛ یا(بی) کسی بھی مخصوص حصے کی مضبوطی یا معیار کا تعین کرنے کے لیے ضروری ٹیسٹ کروانا اور ان کے نتائج سے انسپکٹر کو مطلع کرنا۔

69۔ دیگر اداروں سے معاونت:۔ باب ہذاکی دفعات کے نفاذ کے لیے، چیف انسپکٹر یا ایک انسپکٹر، مقررہ طریقۂ کار کے تابع، کسی بھی ایسے دوسرے ادارے، اتھارٹی یا ایجنسی سے مدد طلب کر سکتا ہے جو قانونی فرائض یا ذمہ داریوں کی انجام دہی کے لیے ذمہ دار ہو۔

ایف۔سیفٹی اینڈ ہیلتھ کے قواعد بنانے کا اختیار

70۔ سیفٹی اینڈ ہیلتھ کے قواعد:۔(1) باب ہذا میں زیر بحث امور کے بارے میں تفصیلی معیارات اور طریق کار قواعد میں مرتب کیے جائیں گے جنہیں سیفٹی اینڈ ہیلتھ کے قواعدکہا جائے گا۔(2) سیفٹی اینڈ ہیلتھ کے قواعد پنجاب لیبر کوڈ کی دفعات سے متصادم نہیں ہوں گے۔(3) پنجاب لیبر کوڈ میں قواعد بنانے کے عمومی اختیار کو محدود کیے بغیر، حکومت

(i) پیشہ ورانہ، سیفٹی اینڈ ہیلتھ کونسل کی درخواست پر؛ یا

(ii) او ایس ایچ کونسل سے مشاورت کے بعداپنے اقدام پر؛

سرکاری گزٹ میں نوٹیفکیشن کے ذریعے سیفٹی اینڈ ہیلتھ کے قواعد میں ترمیم کر سکتی ہے تاکہ:(اے) ان معاملات کو حل کیا جا سکے جو پہلے سےسیفٹی اینڈ ہیلتھ کے قواعد میں شامل نہیں ہیں۔؛ یا(بی)سیفٹی اینڈ ہیلتھ کے قواعد میں موجود موجودہ معیارات اور طریق کار کو بہتر بنایا جا سکے۔(4)سیفٹی اینڈ ہیلتھ کے قواعد میں مندرجہ ذیل معاملات شامل ہو سکتے ہیں، لیکن یہ ان تک محدود نہیں ہیں:(اے) سیفٹی اینڈ ہیلتھ کے انتظامی نظام؛(بی) خطرات اور خطرات سے متعلق معاملات، بشمول:(i) کسی بھی جسمانی، حیاتیاتی، کیمیائی یا نفسیاتی خطرے کے استعمال یا اس کے سامنے آنے سے متعلق معیارات کا تعین؛

(ii)حفاظتی مقدمات، حفاظتی انتظامی منصوبوں اور حفاظتی انتظامی نظاموں سے متعلق معاملات؛ اور

(iii) خطرات کو کنٹرول کرنے کے اقدامات سے متعلق معاملات۔(سی) کام کی جگہ پر تشدد اور ہراسانی، بشمول جنسی ہراسانی؛(ڈی) سیفٹی اینڈ ہیلتھ کے واقعات، پیشہ ورانہ بیماریوں اور اس باب کے تحت ریکارڈ یا اطلاع کیے جانے والے کسی بھی دوسرے معاملے کی رپورٹنگ اور اطلاع؛(ای) سیفٹی اینڈ ہیلتھ کے افسران؛(ایف) آجروں، پرنسپلز، قابضین اور ورکرز کے درمیان مشاورت، بشمول سیفٹی اینڈ ہیلتھ کی کمیٹیاں اور سیفٹی اینڈ ہیلتھ کے نمائندے؛(جی)تنازعات کا حل؛(ایچ) سیفٹی اینڈ ہیلتھ کا معائنہ؛(آئی)اجازت نامے، بشمول لائسنس، رجسٹریشن، سرٹیفیکیٹس اور پرمٹس؛(جے)سیفٹی اینڈ ہیلتھ سے متعلق ہدایات، تربیت اور نگرانی؛(کے) بچوں کا کسی بھی مخصوص ادارے میں داخلہ ممنوع کرنا جو وہاں قانونی طور پر ملازمت اختیار نہیں کر سکتے؛(ایل) ذاتی حفاظتی سازوسامان اور حفاظتی لباس کا ڈیزائن، تیاری، فراہمی، استعمال، دیکھ بھال اور جانچ؛(ایم) ہنگامی منصوبوں کا قیام؛(این) ابتدائی طبی امداد کے سامان کے اسٹورز، اور ان کی مناسب حفاظت اور استعمال کے لیے ہدایات؛(او) پیشہ ورانہ صحت، بشمول پہلی طبی امداد اور ورکرز کی صحت کی نگرانی؛(پی) پیشہ ورانہ سیفٹی اینڈ ہیلتھ سے متعلق فلاحی سہولیات، بشمول ذیلی دفعہ (6) میں بیان شدہ امور؛مگرشرط یہ ہے کہ کوئی بھی قاعدہ باب ہذا کی سرخی اے کے تحت عائد کردہ کسی ذمہ داری کو خارج نہیں کرے گا۔

(5) ذیلی دفعہ (4) کی شق (بی)میں خطرات اور خطروں سے متعلق امور میں شامل ہو سکتے ہیں لیکن ان تک محدود نہیں:(اے) کام کی وجہ سے پیدا ہونے والے جسمانی یا ذہنی تناؤ کی روک تھام؛(بی)کام کی جگہوں کا ڈیزائن، جگہ، ساختی خصوصیات، تنصیب، دیکھ بھال، مرمت اور تبدیلی، اور ان تک رسائی اور نکلنے کے راستے؛(سی) مناسب کام کی جگہ، ضرورت سے زیادہ ہجوم، محدود (بند) جگہیں، گرنے والی اشیاء، گڑھے، نشیبی حوض (سمپ)، فرش میں سوراخ اور اس سے متعلقہ چیزیں؛(ڈی) کام کی جگہوں کے ماحول اور دیگر محیطی عوامل کا کنٹرول، بشمول روشنی، وینٹیلیشن، بو، درجہ حرارت، شور، دھول، دھواں، ہوا میں موجود آلودگی، مصنوعی نمی، کام کی جگہوں کی صفائی اور فضلہ اور گندے پانی کا ٹھکانا؛(ای) ایسی مشینری اور آلات کا ڈیزائن، تعمیر، استعمال، دیکھ بھال، جانچ اور معائنہ جو خطرات پیدا کر سکتے ہیں، اور حسب ضرورت، انہیں ہٹانا اور منتقل کرنا، بشمول برقی آلات، خودکار مشینیں، الیکٹرانک آلات اور حرکت میں موجود مشینری کے قریب یا اس پر کام۔

(ایف) استحکام کے سرٹیفکیٹ، بشمول یہ تقاضا کہ کسی عمارت یا اس کے کسی حصے میں کام اس وقت تک شروع نہیں کیا جائے گا جب تک کہ مصرحہ فارم میں استحکام کا ایک سرٹیفکیٹ، جس پر مصرحہ اہلیت رکھنے والے کسی شخص کے دستخط ہوں، انسپکٹر کو نہیں بھیجا جاتا؛(جی)لوڈ اور مواد کی ہینڈلنگ، اسٹیکنگ اور ذخیرہ اندوزی، بشمول زیادہ وزن کا دستی یا مشینی استعمال؛(ایچ) خطرناک مواد اور ایجنٹوں کی تیاری، پیکنگ، لیبل لگانا، نقل و حمل، ذخیرہ اور استعمال، بشمول کیمیائی اور حیاتیاتی ایجنٹ، سیسہ اور ایسبیسٹوس، ان کے فضلے اور باقیات کا ٹھکانا اور، حسب ضرورت، ان کی جگہ پر ایسے مادے یا ایجنٹ استعمال کرنا جو خطرناک نہ ہوں یا کم خطرناک ہوں۔(آئی) زیادہ اور کم بیرومیٹرک دباؤ اور پانی کے اندر کام کی وجہ سے پیدا ہونے والے خطرات کی روک تھام اور کنٹرول۔(جے) آگ اور دھماکوں کی روک تھام اور آگ یا دھماکے کی صورت میں اٹھائے جانے والے اقدامات، بشمول دھماکہ خیز یا آتش گیر دھول، گیس اور خطرناک دھوئیں سے احتیاطی تدابیر وغیرہ۔(کے) تعمیر اور توڑ پھوڑ میں کام کے نظام اور عمل، بشمول اونچائی پر یا کھدائی میں کام کرنا اور لوڈنگ اور زمین ہلانے والی مشینری، کرین، لہرانے والے، لفٹیں اور دیگر لفٹنگ آپریشنز اور پاڑ (اسکیفولڈنگ) کا استعمال اور تنصیب۔

(6) ذیلی دفعہ (4) کی شق (پی) میں درج ذیل شامل ہیں لیکن یہ ان تک محدود نہیں ہیں:(اے) محنت کشوں کے کیمپوں میں حفاظت اور صحت سے متعلق معاملات؛(بی) کام کے وقفے کے دوران ورکرز کے استعمال کے لیے مناسب پناہ گاہوں کی فراہمی، اور ایسے قواعد کے ذریعے ان پناہ گاہوں کے معیار کی وضاحت کی جا سکتی ہے؛بشرطیکہ خواتین ورکرز کے لیے الگ پناہ گاہ کی سہولت فراہم کی جائے گی، خواہ ان کی تعداد اور ورکرز کی کل تعداد کچھ بھی ہو؛(سی) کینٹینز؛ اور(ڈی) ایسے موزوں کمرے جہاں ورکرز کے ہمراہ بچے ہوں اور ان کی دیکھ بھال کی جا رہی ہو، ان کمروں کے معیار اور بچوں پر نگران عملے کی نوعیت کی وضاحت سمیت۔

(7) اگر حکومت مطمئن ہو کہ کسی کام کی جگہ پر کوئی ایسا عمل ہے جو ورکرز کو جسمانی چوٹ، زہر یا بیماری کے سنگین خطرے سے دوچار کرتا ہے، تو وہ قواعد بنا سکتی ہے:(اے) ایسے عمل کی وضاحت کرتے ہوئے اسے خطرناک قرار دینا؛(بی) اس عمل میں خواتین، نو عمر افراد یا بچوں کے کام کرنے پر پابندی یا ان کی ملازمت کو محدود کرنا؛(سی) ایسے عمل میں شامل یا شامل ہونے کے خواہش مند افراد کا طبی معائنہ کرانا اور ایسے افراد کی ملازمت پر پابندی عائد کرنا جو صحت کے لحاظ سے موزوں قرار نہ پائے ہوں؛ اور(ڈی) ایسے تمام افراد کی حفاظت کے لیے اقدامات تجویز کرنا جو اس عمل میں شریک ہوں یا اس جگہ کے آس پاس موجود ہوں جہاں یہ عمل جاری ہو۔

71۔ سیفٹی اینڈ ہیلتھ کے قواعد:۔ذیلی دفعہ 70 کے تحت قواعد بننے تک، درج ذیل منسوخ شدہ قوانین کے تحت بنے ہوئے قواعد، جو پنجاب لیبر کوڈ کے منافی نہ ہوں، نافذ العمل رہیں گے:(اے) قانون فیکٹریز، 1934؛ اور(بی)قانون پیشہ ورانہ سیفٹی اینڈ ہیلتھ پنجاب، 2019۔

72۔ سیفٹی اینڈ ہیلتھ کے قواعد کا جائزہ:۔(1) دوران کام سیفٹی اینڈ ہیلتھ کونسل کم از کم ہر دو سال بعد سیفٹی اینڈ ہیلتھ کے قواعد کا جائزہ لے گی، خاص طور پر:(اے) سیفٹی اینڈ ہیلتھ سے متعلق قومی اور صوبائی پالیسیز اور پروگرامز؛(بی) صنعتوں میں سیفٹی اینڈ ہیلتھ کےخطرات سے نمٹنے کے لیے ایک جامع اور جدید معیاروں پر مشتمل فریم ورک کی ضرورت؛(سی) سیفٹی اینڈ ہیلتھ کی ٹیکنالوجی اور طریق کار میں بہتری؛(ڈی) پیشہ ورانہ چوٹوں اور بیماریوں کے اعداد و شمار؛(ای) دیگر متعلقہ امور جو پیشہ ورانہ سیفٹی اینڈ ہیلتھ کونسل مناسب سمجھے۔

(2) جائزہ کے بعد پیشہ ورانہ سیفٹی اینڈ ہیلتھ کونسل، سیفٹی اینڈ ہیلتھ کے قواعد میں ترامیم تجویز کر سکتی ہے، خاص طور پر:(اے) ایسے امور جن کے بارے میں پیشہ ورانہ چوٹ اور بیماریوں کے اعداد و شمار سے معلوم ہو کہ وہ سب سے زیادہ خطرناک ہیں؛ اور(بی)وہ شعبے جوسیفٹی اینڈ ہیلتھ کے لحاظ سے زیادہ خطرناک ہیں اور موجودہ قواعد میں شامل نہیں ہیں۔

73۔ سیفٹی اینڈ ہیلتھ کے قواعد کی اشاعت:۔سیفٹی اینڈ ہیلتھ کے قواعد سرکاری گزٹ میں نوٹیفائی کئے جائیں گے اور محکمہ کی ویب سائٹ پر شائع کئے جائیں گے۔

اے۔ آزادیٔ تنظیم اور حق تنظیم سازی

74۔ تنظیم سازی کا حق:۔(1) پنجاب لیبر کوڈ کی دفعات کے تابع اوربلالحاظ کسی دیگر قانون کے، تمام ورکرزبلا کسی امتیاز کے، بشمول سیلف ورکرز، بغیر کسی پیشگی اجازت کے اپنی پسند کی انجمنیں قائم کر سکتے ہیں اور متعلقہ تنظیم کے قواعد کے تابع ان میں شمولیت اختیار کر سکتے ہیں:مگر شرط یہ ہے کہ کسی ادارے میں انتظامی ملازمین کو بھی یہ حق حاصل ہو گا کہ وہ بغیر کسی پیشگی اجازت کے علیحدہ سے اپنی پسند کی ٹریڈ یونینز قائم کریں اور ان میں شمولیت اختیار کریں، تاہم یہ سب متعلقہ تنظیم کے قواعد کے تابع ہوگا۔

(2) پنجاب لیبر کوڈ کی دفعات کے تابع اوربلالحاظ کسی دیگر قانون کے، تمام آجر بغیر کسی امتیاز کے، بغیر کسی پیشگی اجازت کے اپنی مرضی کی آجر تنظیمات بنا سکتے ہیں اور تنظیم کے قواعد کے مطابق ان میں شامل ہو سکتے ہیں۔

(3) کوئی بھی ورکرایک ہی وقت میں ایک ہی کام کی جگہ پر ایک سے زیادہ ٹریڈ یونینز کا رکن نہیں ہو سکتا، اور اگر وہ کسی دوسری ٹریڈ یونین میں شامل ہوتا ہے تو سابقہ رکنیت خود بخود منسوخ ہو جائے گی۔ مزید برآں، کوئی بھی شخص جو درحقیقت اس ادارے میں ملازم نہ ہو، جس کے لیے متعلقہ ٹریڈ یونین رجسٹرڈ ہے، وہ دو سے زائد ٹریڈ یونینز میں عہدہ نہیں رکھ سکتا۔

(4) ہر ٹریڈ یونین اور آجر تنظیم کو یہ حق حاصل ہو گا کہ وہ اپنی انتظامیہ، سرگرمیوں، اور پروگراموں کی آزادی سے تنظیم سازی کے لیے اپنا آئین اور قواعد خود تیار کرے اور اپنے نمائندے آزادانہ طور پر منتخب کرے۔

(5) ورکرز یا آجر تنظیمات فیڈریشنز اور کنفیڈریشنز قائم کر سکتی ہیں اور ان میں شامل ہو سکتی ہیں، اور ایسی کوئی بھی تنظیم، فیڈریشن یا کنفیڈریشن بین الاقوامی مزدوریا آجر تنظیمات اور کنفیڈریشنز کے ساتھ وابستہ ہو سکتی ہے۔ فیڈریشنز اور کنفیڈریشنز کو سیکٹورل، صوبائی یا کسی اور سطح پر، صوبے کے دائرہ اختیار کے اندر، قائم کیا جا سکتا ہے، جیسا کہ ان کی رکن تنظیمات فیصلہ کریں۔

(6) ورکرز اور آجر کی تنظیمیں ایک دوسرے کی تنظیموں کے قیام، کارکردگی یا انتظامیہ میں مداخلت نہیں کریں گی۔

(7) ٹریڈ یونین اپنے ارکان میں دفعہ 78 میں مذکور کسی بھی بنیاد پر، خاص طور پر ٹریڈ یونین کے کسی عہدے پر منتخب ہونے کے حوالے سے امتیاز نہیں کرے گی۔

75۔ ورکرکے بنیادی حقوق:۔ (1) ہر ورکر کو درج ذیل حقوق حاصل ہوں گے:(اے) ٹریڈ یونین کے قیام میں حصہ لینا؛(بی) اس کے قواعد کے تابع کسی ٹریڈ یونین کا رکن بننا؛(سی) کسی ایسی ٹریڈ یونین کی جائز سرگرمیوں میں حصہ لینا جس کا وہ رکن ہو؛(ڈی) اس کے قواعد کے تابع، کسی ایسی ٹریڈ یونین میں عہدہ حاصل کرنے کی کوشش کرنا اور عہدہ رکھنا جس کا وہ رکن ہو؛(ای) شاپ اسٹیورڈ، ورک کونسل وغیرہ کے انتخابات میں حصہ لینا؛(ایف) ورکرز کے نمائندے کے طور پر منتخب یا مقرر ہونا اور خدمات سرانجام دینا؛ اور

(جی) پنجاب لیبر کوڈ کے تحت حاصل کوئی بھی دوسرا حق استعمال کرنا۔

(2) انتظامی ملازمین کو غیر انتظامی ملازمین کی نمائندگی کرنے والی یونین میں یہ حقوق حاصل نہیں ہوں گے۔

76۔ آجر کے بنیادی حقوق:۔ ہر آجر کو درج ذیل حقوق حاصل ہوں گے:(اے) آجر تنظیم کے قیام میں حصہ لینا؛(بی) اس کے قواعد کے تابع ایسی کسی بھی تنظیم کا رکن بننا؛(سی) ایسی کسی تنظیم کی جائز سرگرمیوں میں حصہ لینا جس کا وہ رکن ہو؛(ڈی) اس کے قواعد کے مطابق ایسی کسی تنظیم میں عہدہ رکھنا جس کا وہ رکن ہو؛ اور(ای) پنجاب لیبر کوڈ کے تحت حاصل کوئی بھی حق استعمال کرنا۔

77۔ آجروں اور پرنسپلز کی جانب سے غیر منصفانہ لیبر طریق کار:۔ کوئی آجر، پرنسپل، آجر یا پرنسپل کی کوئی تنظیم، یا ان میں سے کسی کی طرف سے عمل کرنے والا کوئی شخص درج ذیل میں سے کوئی عمل نہیں کرے گا:(اے) کسی معاہدہ میں ایسی کوئی شرط شامل کرنا جو معاہدہ میں شامل کسی فریق کے ٹریڈ یونین میں شمولیت یا رکنیت برقرار رکھنے کے حق کو محدود کرے؛(بی) کسی فرد کو اس بنیاد پر ملازمت دینے سے انکار کرنا یا ملازمت جاری رکھنے سے انکار کرنا کہ وہ ٹریڈ یونین کا رکن یا عہدیدار ہے یا نہیں ہے؛(سی) کسی فرد کے ساتھ کام، ترقی، ملازمت کی شرائط یا کام کے حالات کے حوالے سے اس بنیاد پر امتیازی سلوک کرنا کہ وہ ٹریڈ یونین کا رکن یا عہدیدار ہے یا نہیں؛(ڈی) کسی ورکر کو برخاست، فارغ، کام سے علیحدہ یا اس کا تبادلہ کرنا، یا ایسا کرنے کی دھمکی دینا، یا اس کے کام کے سلسلے میں اسے نقصان پہنچانا یا نقصان پہنچانے کی دھمکی دینا، اس بنا پر کہ وہ ورکر:

 (i) ٹریڈ یونین کا رکن یا عہدیدار ہے یا بننے کا ارادہ رکھتا ہے، یا کسی اور شخص کو رکن یا عہدیدار بننے پر آمادہ کرنے کی کوشش کرتا ہے؛ یا

 (ii) ریفرنڈم واجب ہونے کے وقت کسی ٹریڈ یونین کے فروغ، قیام یا سرگرمیوں میں حصہ لیتا ہے؛

(ای) کسی شخص یا کسی دوسرے شخص کو کوئی فائدہ دے کر یا دینے کی پیشکش کر کے، یا اس کے لیے کوئی فائدہ حاصل کر کے یا حاصل کرنے کی پیشکش کر کے، اسے ٹریڈ یونین کا رکن یا عہدیدار بننے سے باز رہنے یا رکن یا عہدیدار نہ رہنے پر آمادہ کرنا؛(ایف) اجتماعی سودا کاری کے ایجنٹ کے کسی عہدیدار کو ڈرا دھمکا کر، جبر، دباؤ، دھمکی، کسی جگہ محصور کر کے، جسمانی نقصان پہنچا کر، پانی، بجلی یا ٹیلیفون کی سہولت منقطع کر کے یا ایسے دیگر طریقوں سے اجتماعی معاہدہ کرنے پر مجبور کرنا یا مجبور کرنے کی کوشش کرنا؛(جی) دفعہ 100 کے تحت بیلٹنگ کے عمل میں مداخلت یا اثراندازی کرنا؛(ایچ) دفعہ 118 کی خلاف ورزی کرتے ہوئے ہڑتال کے نوٹس کی مدت کے دوران یا کسی ایسی ہڑتال کے جاری رہنے کے دوران جو غیر قانونی نہ ہو، نئے ورکرز بھرتی کرنا، سوائے اس صورت کے کہ چیف انسپکٹر مطمئن ہو کہ مکمل کام بند ہونے سے مشینری یا تنصیب کو سنگین نقصان پہنچ سکتا ہے، اور اس نے اس شعبے میں، جہاں نقصان کا اندیشہ ہو، محدود تعداد میں ورکرز کی عارضی ملازمت کی اجازت دے دی ہو؛(آئی) دفعہ 122 کی خلاف ورزی کرتے ہوئے ادارے کو مکمل طور پر بند کرنا؛(جے) غیر قانونی تالہ بندی کا آغاز کرنا، جاری رکھنا، اس کی ترغیب دینا، یا اس کے لیے مالی یا دیگر طریقوں سے مدد فراہم کرنا؛(کے) ورکرز کی ٹریڈ یونین کے معاملات، قیام، کارکردگی یا انتظامیہ میں مداخلت کرنا یا مالی معاونت فراہم کرنا؛(ایل) دفعہ 107 کی خلاف ورزی کرتے ہوئے اجتماعی سودا کاری کے ایجنٹ کے ساتھ نیک نیتی سے اجتماعی سودا کاری کرنے سے انکار کرنا؛ یا(ایم) دفعہ 100 کے تحت کسی ادارے میں ریفرنڈم کے انعقاد کے سلسلے میں رجسٹرار سے عدم تعاون یا مطلوبہ سہولیات فراہم کرنے سے انکار کرنا۔

78۔ ورکرز کی جانب سے غیر منصفانہ لیبر طریق کار:۔(1) کوئی ورکر، شخص یا ورکرز کی ٹریڈ یونین درج ذیل کام نہیں کرے گی:(اے) کسی ورکر کو کام کے اوقات میں اور کام میں خلل ڈال کر ٹریڈ یونین میں شمولیت یا عدم شمولیت پر آمادہ کرنا؛(بی) کسی شخص کو ٹریڈ یونین کا رکن یا عہدیدار بننے، نہ بننے، یا رہنے یا چھوڑنے پر مجبور کرنا یا دھمکانا؛(سی) کسی شخص کو دھمکا کر یا فائدہ دے کر یا فائدہ دینے کا وعدہ کر کے اسے ٹریڈ یونین کا رکن یا عہدیدار بننے سے باز رہنے یا رکن یا عہدیدار نہ رہنے پر آمادہ کرنا؛(ڈی) آجر کو کسی مطالبے کو تسلیم کرنے پر دباؤ ڈالنے کے لیے دھمکی، زبردستی، دباؤ، کسی جگہ بند کر دینا یا نکال دینا، قبضہ، حملہ، جسمانی نقصان، فون، پانی یا بجلی کی سہولیات منقطع کرنے یا ایسے دیگر طریقوں سے مجبور کرنا یا مجبور کرنے کی کوشش کرنا؛(ای) کسی غیر قانونی ہڑتال یا سست روی کی تحریک کا آغاز، تسلسل، ترغیب، یا مالی معاونت یا دیگر ذرائع سے حمایت کرنا؛

(ایف) کسی آجر کے ساتھ نیک نیتی کے ساتھ اجتماعی سودا کاری کرنے سے انکار کرنا۔

(2) یہ بھی غیر منصفانہ عمل سمجھا جائے گا اگر کوئی ٹریڈ یونین دفعہ 100 کے تحت ہونے والی بیلٹنگ میں ناجائز اثر و رسوخ، دھمکی، جعلسازی یا رشوت کے ذریعے، اپنی ایگزیکٹو کمیٹی کے ذریعے یا اپنے کسی نمائندے کے ذریعے مداخلت کرے۔

79۔ سازش سے متعلق قانون کا محدود اطلاق:۔رجسٹرڈ ٹریڈ یونین یا اجتماعی سودا کاری کے ایجنٹ کے کسی بھی عہدیدار یا رکن کو، رجسٹرار کی تصدیق کے مطابق، مجموعہ تعزیرات پاکستان 1860 (45بابت 1860) کی دفعہ بی۔120 کی ذیلی دفعہ (2) کے تحت ایسے کسی معاہدے کی بنا پر سزا نہیں دی جائے گی جو اس کے اراکین کے درمیان ٹریڈ یونین کے کسی ایسے مقصد کو آگے بڑھانے کے لیے کیا گیا ہو جو دفعہ 83 میں محولہ اس کے آئین میں مذکور ہو، سوائے اس کے کہ وہ معاہدہ کوئی سنگین جرم کرنے کا معاہدہ ہو یا کسی اور قانون کی خلاف ورزی ہو۔

80۔ مخصوص صورتوں میں دیوانی دعوے سے استثنیٰ:۔ (1) کسی رجسٹرڈ ٹریڈ یونین، اجتماعی سودا کاری کے ایجنٹ یا ان کا کوئی عہدیدار یا رکن، کے خلاف کسی بھی دیوانی عدالت میں کوئی دعویٰ یا قانونی کارروائی قابل سماعت نہیں ہوگی، اگر اس کا تعلق کسی ایسے فعل سے ہو جو کسی لیبر تنازعہ کی پیش بینی یا اس کے فروغ کے مقصد سے کیا گیا ہو جس میں متعلقہ ٹریڈ یونین فریق ہو، اور اس کی واحد بنیاد یہ ہو کہ ایسا فعل کسی دوسرے شخص کو معاہدۂ ملازمت کی خلاف ورزی پر آمادہ کرتا ہے، یا کسی دوسرے شخص کی تجارت، کاروبار یا روزگار میں، یا اس کے سرمائے یا محنت کو استعمال کرنے کے حق میں مداخلت کرتا ہے۔

(2) کسی ٹریڈ یونین کے خلاف کسی بھی دیوانی عدالت میں کسی مقدمے یا قانونی کارروائی میں کوئی ذمہ داری عائد نہیں ہوگی، اگر اس کا تعلق کسی ایسے ضرر رساں فعل سے ہو جو اس کے کسی ایجنٹ نے نیک نیتی کے ساتھ کسی لیبر تنازعہ کی پیش بینی یا اس کے فروغ میں کیا ہو، مگر یہ کہ یہ ثابت کر دیا جائے کہ ایسے شخص نے یہ عمل ٹریڈ یونین کی ایگزیکٹو کمیٹی کے علم یا براہ راست ہدایت کے تحت کیا۔

81۔ چیک آف (ادائیگی میں کٹوتی):۔ (1) اگر کوئی اجتماعی سودا کاری کا ایجنٹ اس کی درخواست کرے، تو آجر یا ورکرز کا پرنسپل، جو کسی ٹریڈ یونین کے رکن ہوں، ان ورکرز کی تنخواہوں سے ٹریڈ یونین کے فنڈز میں رکنیت کے لیے مخصوص رقم اس شرط کے ساتھ کاٹے گا کہ ہر ورکر نے تحریری رضامندی دی ہو، اور اس کا نام ٹریڈ یونین کی طرف سے دیے گئے مطالبہ نامہ میں شامل ہو۔(2) جو آجر یا پرنسپل ذیلی دفعہ (1) کے تحت کٹوتی کرے گا، وہ متعلقہ مدت کے اختتام کے پندرہ دن کے اندر اندر پوری کٹی ہوئی رقم اس ٹریڈ یونین کے اکاؤنٹ میں جمع کروائے گا جس کی طرف سے یہ کٹوتی کی گئی ہو۔(3) اجتماعی سودا کاری کا ایجنٹ کسی شیڈولڈ بینک کی کسی شاخ میں ایسا اکاؤنٹ قائم کرے گا، جس میں آجر کی طرف سے ورکرز کی تنخواہوں سے کی گئی تمام کٹوتیاں جمع کی جائیں گی:

مگر شرط یہ ہے کہ شیڈولڈ بینکس رجسٹرڈ ٹریڈ یونینوں کو ایسے اکاؤنٹس کھولنے اور ان کے تحفظ میں سہولت فراہم کریں گے۔(4) آجر یا پرنسپل، اجتماعی سودا کاری کے ایجنٹ اور رجسٹرار کو یہ سہولیات فراہم کرے گا تاکہ یہ جانچ کی جا سکے کہ آیا ذیلی دفعہ (1) کے تحت ورکرز کی تنخواہوں سے کٹوتیاں کی جا رہی ہیں یا نہیں۔

بی۔ ٹریڈ یونینز اور آجر تنظیموں کی رجسٹریشن

82۔ رجسٹریشن کے لیے درخواست:۔(1) کوئی بھی ٹریڈ یونین یا آجر تنظیم اپنے صدر اور سیکریٹری کے دستخطوں کے ساتھ رجسٹرار کے پاس پنجاب لیبر کوڈ کے تحت رجسٹریشن کے لیے درخواست دے سکتی ہے۔(2) آجر تنظیم کی رجسٹریشن کا طریق کار وہ ہوگا جو مقرر کیا جائے۔

83۔ ٹریڈ یونین کی رجسٹریشن کے لیے درخواست کے تقاضے:۔ ہر ٹریڈ یونین کی رجسٹریشن کے لیے درخواست رجسٹرار کو کاغذی یا الیکٹرانک صورت میں دی جائے گی، اور اس کے ساتھ مندرجہ ذیل دستاویزات لف ہوں گی:(اے) ایک بیان جس میں درج ذیل معلومات شامل ہوں:

(i) ٹریڈ یونین کا نام اور اس کے مرکزی دفتر کا پتہ؛(ii) ٹریڈ یونین کے قیام کی تاریخ؛(iii) ٹریڈ یونین کے عہدیداروں کے عہدے، نام، عمریں، اور پیشے؛(iv) کل ادا شدہ رکنیت کی تفصیل؛(v) اگر یونین کسی ادارے یا اداروں کے گروپ میں شامل ہے تو ان اداروں کے نام اور ان میں کام کرنے والے ورکرز کی کل تعداد؛(vi) ان ٹریڈ یونینزکے لیے جو ذیلی شق (v) میں مذکور نہیں، کام کی وہ قسم جس سے یونین کا تعلق ہو بشمول، مگر محدود نہیں، حصہ چہارم میں بیان کردہ مخصوص کیٹیگری سے؛(vii) اگر یونین ٹریڈ یونینز کی فیڈریشن ہے، تو شامل ٹریڈ یونینز کے نام، پتے اور رجسٹریشن نمبر؛(viii) اگر یونین فیڈریشنز کی کنفیڈریشن ہے، تو شامل فیڈریشنز کے نام، پتے اور رجسٹریشن نمبر؛(بی) ٹریڈ یونین کے آئین کی تین نقول، اور ایک نقل ایسی قرارداد کی جس کے تحت مذکورہ آئین کو یونین کے اراکین نے منظور کیا ہو، جس پر اجلاس کے چیئرپرسن کے دستخط ہوں؛(سی) ٹریڈ یونین کے اراکین کی اس قرارداد کی ایک نقل جس کے تحت صدر اور سیکرٹری کو رجسٹریشن کے لیے درخواست دینے کا اختیار دیا گیا ہو؛(ڈی) اگر یونین، ٹریڈ یونینز کی فیڈریشن ہو، تو ہر شریک ٹریڈ یونین کی اس قرارداد کی ایک نقل جس میں فیڈریشن کی رکنیت قبول کرنے کی منظوری دی گئی ہو؛(ای) اگر یونین فیڈریشنز کی کنفیڈریشن ہو، تو ہر شریک فیڈریشن کی اس قرارداد کی ایک نقل جس میں کنفیڈریشن کی رکنیت قبول کرنے کی منظوری دی گئی ہو۔

84۔ رجسٹریشن کے لیے شرائط:۔ (1) کسی ٹریڈ یونین کو پنجاب لیبر کوڈ کے تحت اس وقت تک رجسٹریشن کا حق حاصل نہیں ہوگا جب تک کہ اس کا آئین مندرجہ ذیل امور کو واضح طور پر شامل نہ کرے:(اے) ٹریڈ یونین کا نام اور پتہ؛(بی) وہ مقاصد جن کے لیے ٹریڈ یونین قائم کی گئی ہے؛(سی) یونین کے عام فنڈز کے استعمال کے مقاصد؛(ڈی) اگر یونین کسی ادارے یا اداروں کے گروپ کے اندر قائم کی گئی ہو، تو اس کی ایگزیکٹو کمیٹی کے ارکان میں سے کم از کم 80 فیصد ارکان ایسے ورکرز ہوں جو مذکورہ ادارے یا اداروں میں درحقیقت ملازمت کر رہے ہوں:

مگر شرط یہ ہے کہ ایسا شخص جو متعلقہ ادارے یا اداروں سے تعلق نہ رکھتا ہو، اسے کسی اور ادارے میں کام کرنا ضروری نہیں ہوگا؛

مزید شرط یہ ہے کہ کسی تیسرے فریق کے ذریعے منسلک کنٹریکٹ ورکر کو بھی اس ادارے یا اداروں کے لیے درحقیقت ملازم تصور کیا جائے گا؛(ای) ان یونینز کے لیے جن کا ذکر شق (ڈی) میں نہیں، ایگزیکٹو کے ارکان کی تعداد، یونین کے اراکین کی کل تعداد کے 10 فیصد یا 25 میں سے جو کم ہو، سے زیادہ نہ ہو، تاہم ایگزیکٹو کی مجموعی تعداد پانچ سے کم نہیں ہوگی؛(ایف) وہ شرائط جن کے تحت رکن کو آئین کے تحت کوئی فائدہ حاصل ہوگا یا اس پر کوئی جرمانہ یا ضبطی عائد کی جا سکتی ہے؛(جی) ٹریڈ یونین کے اراکین کی فہرست کی دیکھ بھال اور عہدیداران و اراکین کو اس کا معائنہ کرنے کی مناسب سہولیات؛(ایچ) آئین میں ترمیم، تبدیلی یا منسوخی کا طریق؛(آئی) فنڈز کی محفوظ تحویل، سالانہ آڈٹ، آڈٹ کا طریق کار، اور اکاؤنٹس کی جانچ پڑتال کے لیے مناسب سہولیات؛(جے) یونین کو تحلیل (ختم) کرنے کا طریق؛(کے) جنرل باڈی کے ذریعے عہدیداروں کے انتخاب کا طریق، اور ان کی مدتِ عہدہ، جو دو سال سے زائد نہیں ہوگی؛(ایل) کسی عہدیدار کے خلاف عدم اعتماد کے اظہار کا طریق کار؛(ایم) ایگزیکٹو اور جنرل باڈی کے اجلاسوں کا انعقاد، تاکہ یہ اجلاس یونین کے آئین یا ضوابط کے مطابق باقاعدگی سے منعقد کیے جائیں۔

(2) ذیلی دفعہ (1) کے تابع، اگر کوئی ٹریڈ یونین کسی ادارے یا اداروں کے گروپ میں شامل کی گئی ہو، تو ایسی ٹریڈ یونین کو پنجاب لیبر کوڈ کے تحت رجسٹریشن کا حق حاصل نہیں ہوگا:(اے) جب تک کہ اس کے تمام اراکین واقعی طور پر متعلقہ ادارے یا اداروں کے گروپ میں ملازمت نہ کر رہے ہوں؛ اور(بی) جب تک کہ اس کی رکنیت متعلقہ ادارے یا اداروں میں ملازم کل ورکرز کی کم از کم پانچ فیصد نہ ہو، یا کم از کم بیس ورکرز پر مشتمل نہ ہو، جو بھی کم ہو؛ اور(سی) جب تک کہ اس نے اپنی ایگزیکٹو باڈی میں خواتین ورکرز کو، ادارے کی افرادی قوت میں ان کی عددی تعداد کے کم از کم تناسب سے، شامل نہ کیا ہو، بشرطیکہ متعلقہ ادارے یا اداروں میں خواتین ورکرز ملازم ہوں، جن سے اس ٹریڈ یونین کا تعلق ہو۔

(3) ان ٹریڈ یونینوں کے معاملے میں جن کا ذکر ذیلی دفعہ (2) میں نہ ہو، کم از کم بیس ورکرز جو کام کی ایک ہی کیٹیگری سے تعلق رکھتے ہوں لازم ہوں گے۔

(4) ذیلی دفعہ (2) یا (3) میں کوئی بھی چیز کسی فیڈریشن یا کنفیڈریشن کی رکنیت کو محدود کرنے کے طور پر نہیں لی جائے گی۔

85۔ ٹریڈ یونین کے عہدیدار بننے کے لیے نااہلی:۔ کوئی بھی ٹریڈ یونین اپنا آئین یا ضوابط کچھ بھی کہیں، اگر کوئی شخص مجموعہ تعزیرات پاکستان 1860 (45بابت1860) کے تحت کسی بھی سنگین جرم کا مجرمانہ مرتکب ہو چکا ہو، تو وہ ٹریڈ یونین کا عہدیدار منتخب ہونے یا عہدہ رکھنے کے لیے نااہل شمار کیا جائے گا۔

مگر شرط یہ ہے کہ اگر کوئی عہدیدار فنڈز میں خیانت یا ان کے ناجائز استعمال کے جرم میں مجرم قرار پاتا ہے، تو اسے باقی ماندہ مدت کے لیے اور اس کے فوراً بعد آنے والی مدت کے لیے بھی عہدہ رکھنے سے روک دیا جائے گا۔

اس دفعہ کی اغراض کے لیے، سنگین جرم سے مراد ایسا جرم ہے جو سنگین، ہولناک، ظالمانہ، سنسنی خیز نوعیت کا یا عوامی اخلاقیات کو جھنجوڑنے والا ہو اور جو مجموعہ تعزیرات پاکستان 1860 (45 بابت 1860) یا فی الوقت نافذ العمل کسی دوسرے قانون کے تحت موت، یا عمر قید، یا سات سال سے زائد قید کی سزا کے قابل ہو، خواہ جرمانے کے ساتھ یا اس کے بغیر۔

86۔ رجسٹریشن:۔ (1) جب رجسٹرار یہ تصدیق کر لے کہ ٹریڈ یونین نے پنجاب لیبر کوڈ کی تمام شرائط پوری کر لی ہیں، تو وہ درخواست کی وصولی کی تاریخ سے پندرہ دن کے اندر رجسٹریشن کے لیے مقرر کردہ رجسٹر میں ٹریڈ یونین کو درج کرے گا اور مقررہ فارم میں رجسٹریشن سرٹیفکیٹ جاری کرے گا۔(2) اگر درخواست میں کوئی سنگین کمی محسوس ہو تو رجسٹرار درخواست کی وصولی سے پندرہ دن کے اندر اس بارے میں تحریری اعتراضات ٹریڈ یونین کو بھیجے گا، اور یونین کو اعتراضات کی وصولی سے پندرہ دن کے اندر جواب دینا ہو گا۔(3) جب اعتراضات کا تسلی بخش جواب موصول ہو جائے، تو رجسٹرار پندرہ دن کے اندر یونین کو رجسٹر کر کے رجسٹریشن سرٹیفکیٹ جاری کرے گا۔(4) اگر رجسٹرار اضافی تاخیر کرے تو رجسٹرار درخواست گزار ٹریڈ یونین کو تاحکم ثانی عارضی طور پر رجسٹر کرے گا۔(5) اگر اعتراضات کے جواب تسلی بخش نہ ہوں، تو رجسٹرار درخواست کو مسترد کر سکتا ہے۔(6) اگر درخواست مسترد ہو جائے، یا رجسٹرار نے رجسٹریشن میں یا سرٹیفکیٹ جاری کرنے میں پندرہ دن سے زائد تاخیر کی ہو، یا عارضی رجسٹریشن نہ کی ہو، تو یونین لیبر کورٹ میں اپیل دائر کر سکتی ہے، جہاں عدالت، اپنے فیصلے میں وجوہات بیان کرتے ہوئے، تیس دن کے اندر رجسٹرار کو یونین کی رجسٹریشن اور سرٹیفکیٹ جاری کرنے کا حکم دے سکتی ہے یا اپیل مسترد بھی کر سکتی ہے۔(7) پنجاب لیبر کوڈ کے باب 2.6، حصہ دوم کے کسی دیگر حکم میں شامل کسی امر کے باوجود، رجسٹرڈ ٹریڈ یونین میں آئین کی ہر تبدیلی یا عہدیداروں کے انتخاب یا تبدیلی کی صورت میں، یونین کو رجسٹرار کو رجسٹرڈ ڈاک یا الیکٹرانکلی طور پر ایسے انتخاب یا تبدیلی کے پندرہ دن کے اندر رجسٹرار کی منظوری کے لیے مطلع کرنا ضروری ہوگا۔(8) اگر یہ تبدیلی پنجاب لیبر کوڈ یا یونین کے آئین کی خلاف ورزی ہو، تو رجسٹرار اس نئے انتخاب یا آئینی ترمیم کو رجسٹر کرنے سے انکار کر سکتا ہے۔(9) ذیلی دفعہ (8) کے حکم کے تابع، ٹریڈ یونینز کی فیڈریشن یا فیڈریشنز کی کنفیڈریشن میں کسی رکن یونٹ کی ہر شمولیت یا اخراج کی صورت میں، متعلقہ فیڈریشن یا کنفیڈریشن ایسی شمولیت یا اخراج کے پندرہ دن کے اندر رجسٹرڈ ڈاک یا الیکٹرانک طور پر رجسٹرار کو مطلع کرے گی۔(10) اگر ٹریڈ یونین کے عہدیداروں کے انتخاب یا عہدیداروں کی تبدیلی یا آئین میں ترمیم کے بارے میں کوئی تنازعہ ہو، تو رجسٹرار یا کوئی ٹریڈ یونین، یا ٹریڈ یونین کا کوئی عہدیدار یا رکن لیبر کورٹ میں درخواست یا اپیل دائر کر سکتا ہے، جو درخواست یا اپیل کی وصولی کے سات دن کے اندر یا تو رجسٹرار کو ٹریڈ یونین کے آئین یا عہدیداروں میں تبدیلی یا ترمیم رجسٹر کرنے کا حکم دے گی یا، تحریری طور پر قلمبند کی جانے والی وجوہات کی بنا پر، رجسٹرار کو اپنی نگرانی میں ٹریڈ یونین کے نئے انتخابات کرانے کی ہدایت کر سکتی ہے۔۔(11) اگر انتخاب، تبدیلی یا آئینی ترمیم دھوکہ دہی یا غلط بیانی سے کی گئی ہو، تو رجسٹرار اراکین کی شکایت پر پندرہ دن میں سماعت کے بعد منظوری واپس لے سکتا ہےاور اس کے خلاف لیبر کورٹ میں اپیل تیس دن کے اندر کی جا سکتی ہے۔

87۔ فیڈریشنز اور کنفیڈریشنز کی رجسٹریشن:۔ (1) اگر دو یا دو سے زیادہ رجسٹرڈ ٹریڈ یونینز اپنی متعلقہ جنرل باڈیز کی قرارداد کے ذریعے اس پر متفق ہوں، تو وہ باہم مل کر ایک فیڈریشن قائم کر سکتی ہیں اور فیڈریشن کے قیام کا معاہدہ مرتب کر کے، کاغذی یا الیکٹرانک صورت میں رجسٹرار کے پاس رجسٹریشن کے لیے درخواست دے سکتی ہیں۔(2) اگر دو یا دو سے زیادہ آجر تنظیمیں اپنی متعلقہ جنرل باڈیز کی قرارداد کے ذریعے اس پر متفق ہوں، تو وہ بھی باہم مل کر فیڈریشن قائم کر سکتی ہیں اور فیڈریشن کے قیام کا معاہدہ مرتب کر کے، کاغذی یا الیکٹرانکلی رجسٹرار کو رجسٹریشن کے لیے درخواست دے سکتی ہیں۔(3) ذیلی دفعہ (1) میں بیان کردہ فیڈریشن درج ذیل اقسام کی ہو سکتی ہے:(اے) کسی ایک آجر کے متعلق؛ یا(بی) درج ذیل سطح پر متعدد آجروں کے متعلق؛(i) کسی پیشے، پروفیشن، شعبے یا شعبہ جات؛ یا(ii) کسی صوبے یا صوبے کے کسی حصے کی سطح پر۔(4) ذیلی دفعہ (2) میں بیان کردہ آجر تنظیموں کی فیڈریشن درج ذیل سطح پر ہو سکتی ہے:(i) کسی شعبے یا مختلف شعبہ جات کی سطح پر؛ یا(ii) کسی صوبے یا صوبے کے کسی حصے کی سطح پر۔(5) اگر دو یا دو سے زیادہ رجسٹرڈ فیڈریشنز، اپنی اپنی شامل شدہ ٹریڈ یونینز کی قرارداد کے ذریعے متفق ہوں، تو وہ باہم مل کر ایک کنفیڈریشن قائم کر سکتی ہیں اور کنفیڈریشن کے قیام کا معاہدہ مرتب کر کے رجسٹرار کے پاس رجسٹریشن کی درخواست دے سکتی ہیں۔(6) ورکرز کی کوئی بھی ٹریڈ یونین ایسی فیڈریشن کا حصہ نہیں بن سکتی جس میں آجروں کی ٹریڈ یونین شامل ہو، اور نہ ہی آجروں کی کوئی ٹریڈ یونین ایسی فیڈریشن کا حصہ بن سکتی ہے جس میں ورکرز کی ٹریڈ یونین شامل ہو۔(7) ورکرز کی ٹریڈ یونینز کی کوئی فیڈریشن ایسی کنفیڈریشن کا حصہ نہیں بن سکتی جس میں آجروں کی فیڈریشن شامل ہو، اور نہ ہی آجروں کی کوئی فیڈریشن ایسی کنفیڈریشن کا حصہ بن سکتی ہے جس میں ورکرز کی فیڈریشن شامل ہو۔(8)فیڈریشن یا کنفیڈریشن کے قیام سے متعلق جو معاہدہ ذیلی دفعات (1)، (2) اور (5) میں مذکور ہے، اُس میں دیگر امور کے ساتھ ساتھ یہ بھی شامل ہوگا کہ شامل شدہ ٹریڈ یونینز اور فیڈریشنز کو کن طریق کار پر عمل کرنا ہوگا، فیڈریشن یا کنفیڈریشن کے کیا حقوق اور ذمہ داریاں ہوں گی اور شامل شدہ ٹریڈ یونینز یا فیڈریشنز کے کیا حقوق و فرائض ہوں گے۔(9) ٹریڈ یونینز کی فیڈریشن کی رجسٹریشن کے لیے دی جانے والی درخواست ان تمام ٹریڈ یونینز کے صدور یا ان کے مجاز عہدیداران کے دستخط سے ہوگی، اور اس کے ساتھ فیڈریشن کے قیام کے معاہدے کی تین نقول لف ہوں گی۔(10) کنفیڈریشن کی رجسٹریشن کے لیے دی جانے والی درخواست ان تمام فیڈریشنز کے صدور یا ان کے مجاز عہدیداران کے دستخط سے ہوگی، اور اس کے ساتھ کنفیڈریشن کے قیام کے معاہدے کی تین نقول لف ہوں گی۔(11) دفعہ ہذا کے تابع، پنجاب لیبر کوڈ کے احکامات، جتنا ممکن ہو اور حسبِ ضرورت ترامیم کے ساتھ، فیڈریشن اور کنفیڈریشن پر بھی اسی طرح لاگو ہوں گی جیسے وہ کسی ٹریڈ یونین پر لاگو ہوتی ہیں۔(12) فیڈریشن یا کنفیڈریشن میں کسی رکن یونٹ کی شمولیت یا اخراج کی صورت میں، متعلقہ فیڈریشن یا کنفیڈریشن کو لازم ہے کہ وہ رجسٹرڈ ڈاک کے ذریعے رجسٹرار کو پندرہ دن کے اندر مطلع کرے۔

88۔ نام کی تبدیلی:۔ کوئی بھی رجسٹرڈ ٹریڈ یونین، اپنے کل اراکین کی کم از کم دو تہائی اکثریت کی رضامندی سے اور باب ہذا کی دفعات کے تابع، مقررہ طریق کار کے مطابق اپنا نام تبدیل کر سکتی ہے۔

89۔ ٹریڈ یونینز کا انضمام:۔ دو یا زیادہ رجسٹرڈ ٹریڈ یونینز، مقررہ طریق سے، بغیر تحلیل یا اپنے فنڈز کی تقسیم کے یا اس کے ساتھ، ایک واحد ٹریڈ یونین میں ضم ہو سکتی ہیں، بشرطیکہ ہر ایسی ٹریڈ یونین کے کم از کم نصف ارکان جنہیں ووٹ دینے کا حق حاصل ہو، اپنا ووٹ ڈالیں، اور ڈالے گئے ووٹوں میں سے کم از کم ساٹھ فیصد اس انضمام کے حق میں ہوں۔

90۔ نام کی تبدیلی اور انضمام کے اثرات:۔ (1) کسی رجسٹرڈ ٹریڈ یونین کے نام کی تبدیلی سے اس کے حقوق یا ذمہ داریوں پر کوئی اثر نہیں پڑے گا، نہ ہی اس کے خلاف یا اس کی طرف سے شروع کی جانے والی کوئی قانونی کارروائی متاثر ہوگی، اور ایسی کوئی بھی کارروائی جو پرانے نام سے جاری یا شروع کی جا سکتی تھی، نئے نام سے بھی جاری یا شروع کی جا سکتی ہے۔(2) دو یا زیادہ رجسٹرڈ ٹریڈ یونینز کے انضمام سے ایسی کسی بھی ٹریڈ یونین یا ان کے کسی قرض دہندہ کے حق کو نقصان نہیں پہنچے گا۔

91۔ رجسٹریشن کی درخواست کے زیر التوا ہونے کے دوران ٹریڈ یونین کے اراکین اور عہدیداروں کا تحفظ:۔ جب تک رجسٹرار سے پیشگی اجازت نہ لی جائے، کسی بھی ورکرز کی ٹریڈ یونین کے رکن یا عہدیدار کو، رجسٹریشن کی درخواست کے زیر التوا ہونے کے دوران، تبادلے، برطرفی، برخاستگی یا کسی اور قسم کی سزا کا نشانہ نہیں بنایا جائے گا، بشرطیکہ ٹریڈ یونین نے اپنے اراکین اور عہدیداروں کے نام تحریری طور پر رجسٹرار کو دے دیے ہوں۔

92۔ رجسٹریشن کا سرٹیفکیٹ:۔ پنجاب لیبر کوڈ کے تحت جب رجسٹرار کسی ٹریڈ یونین کو رجسٹر کرے گا، تو وہ مقررہ فارم میں ایک رجسٹریشن سرٹیفکیٹ جاری کرے گا، جو اس بات کا قطعی ثبوت ہوگا کہ ٹریڈ یونین کو پنجاب لیبر کوڈ کے تحت باقاعدہ طور پر رجسٹر کر دیا گیا ہے۔

93۔ رجسٹرڈ ٹریڈ یونین کی قانونی حیثیت:۔ (1) ہر رجسٹرڈ ٹریڈ یونین، اپنے رجسٹرڈ نام سے ایک باڈی کارپوریٹ ہوگی، اسے دائمی تسلسل حاصل ہوگا اور اس کی ایک مشترکہ مہر ہوگی، وہ معاہدہ کرنے، منقولہ اور غیر منقولہ جائیداد حاصل کرنے، رکھنے اور فروخت کرنے کا اختیار رکھے گی، اور وہ اپنے نام سے مقدمہ دائر کر سکے گی یا اس پر مقدمہ دائر کیا جا سکے گا۔(2) قانون سوسائٹیز رجسٹریشن 1860 (21بابت 1860)، قانون کوآپریٹو سوسائٹیز 1925 (7بابت 1925)، اور قانون کمپنیز 2017 (19 بابت 2017) کا اطلاق کسی رجسٹرڈ ٹریڈ یونین پر نہیں ہوگا، اور ان میں سے کسی قانون کے تحت کسی ٹریڈ یونین کی رجسٹریشن کالعدم تصور کی جائے گی۔

94۔ رجسٹرڈ ٹریڈ یونین کا رجسٹر برقرار رکھنا:۔ہر رجسٹرڈ ٹریڈ یونین درج ذیل مصرحہ فارم میں جیساکہ صراحت کی جائے، رجسٹر مینٹین رکھے گی:(اے) اراکین کا رجسٹر جس میں ہر رکن کی طرف سے ادا کی گئی سبسکرپشن کی تفصیلات درج ہوں؛(بی) ایک اکاؤنٹ بک جس میں تمام وصولیاں اور اخراجات درج ہوں؛ اور(سی) ایک منٹس بک جس میں اجلاسوں کی کاروائیوں کا ریکارڈ ہو۔

95۔ ٹریڈ یونین کے سالانہ گوشوارے:۔(1) ہر رجسٹرڈ ٹریڈ یونین ہرسال رجسٹرار کو اس کی منظوری کے لیے مقررہ تاریخ کو یا اس سے پہلے، ایسی مقررہ تاریخ سے فوراً پہلے 31 دسمبر کو ختم ہونے والے سال کے دوران تمام وصولیوں اور اخراجات کی ایک عمومی سٹیٹمنٹ، جو مقررہ طریق پر آڈٹ شدہ ہو، اور اسی 31 دسمبر کو موجود اثاثہ جات اور واجبات کی تفصیل بھیجے گی۔(2) عمومی سٹیٹمنٹ کے ساتھ، رجسٹرڈ ٹریڈ یونین رجسٹرار کو سال بھر میں کئے گئے تمام عہدیداروں کی تبدیلیوں کی سٹیٹمنٹ، کل ادا شدہ ممبرشپ کی سٹیٹمنٹ اور ٹریڈ یونین کے آئین کی تازہ نقل بھیجے گی۔(3) ٹریڈ یونین کے آئین میں کی گئی ہر تبدیلی اور جنرل باڈی کی کسی بھی قرارداد کی نقل جو آئین کے کسی حکم کا اثر رکھتی ہو، تبدیلی کیے جانے یا قرارداد منظور کیے جانے کے پندرہ دن کے اندر رجسٹرار کو بھیجی جائے گی۔(4) اگر رجسٹرار کو سالانہ گوشوارے میں کوئی نمایاں کمی نظر آئے تو وہ سالانہ گوشوارے کی وصولی سے پندرہ دن کے اندر تحریری طور پر اعتراضات ٹریڈ یونین کو بھیجے گا اور ٹریڈ یونین اعتراضات کی موصولی کے پندرہ دن کے اندر ان کا جواب دے گی۔(5) رجسٹرار کی جانب سےاٹھائے گئے اعتراضات کے قابلِ قبول جواب موصول ہونے پر،رجسٹرار، اعتراضات کے جواب کی ترسیل کی تاریخ سے پندرہ دن کے اندر، ذیلی دفعہ (1) کے مطابق سالانہ گوشوارے کی منظوری دے گا۔(6) اعتراضات کے جوابات تسلی بخش نہ ہوں تو رجسٹرار سالانہ گوشوارہ مسترد کر سکتا ہے۔(7) اگر رجسٹرار سالانہ گوشوارہ مسترد کرے تو رجسٹرار کسی عہدیدار کی رجسٹریشن منسوخ کر سکتا ہے۔(8) اگر رجسٹرڈ ٹریڈ یونین کسی فیڈریشن کی رکن ہو تو فیڈریشن کا نام سالانہ گوشوارے میں شامل کیا جائے گا۔(9) اگر رجسٹرڈ فیڈریشن کسی کنفیڈریشن کی رکن ہو تو کنفیڈریشن کا نام سالانہ گوشوارے میں شامل کیا جائے گا۔

96۔ رجسٹریشن کی منسوخی:۔(1) ٹریڈ یونین کی رجسٹریشن اس وقت منسوخ کی جائے گی اگر لیبر کورٹ رجسٹرار کی تحریری شکایت پر حکم دے کہ ٹریڈ یونین نے:(اے) پنجاب لیبر کوڈ یا قواعد کے کسی بھی حکم کی خلاف ورزی کی ہو یا ان کی خلاف ورزی میں رجسٹرڈ ہوئی ہو؛(بی) اپنے آئین کے کسی بھی حکم کی خلاف ورزی کی ہو؛(سی) اپنےآئین میں کوئی ایسا حکم شامل کیا ہو جو پنجاب لیبر کوڈ یا قواعد سے متصادم ہو؛ اور(ڈی) کوئی ایسا شخص جو دفعہ 85 کے تحت نااہل ہو، رجسٹرڈ ٹریڈ یونین کا عہدیدار منتخب ہوا ہو بطور رجسٹرڈ ٹریڈ یونین کے آفس بیرئیر کے۔

(2) ٹریڈ یونین کی رجسٹریشن رجسٹرار کی جانب سے، ایسی منسوخی کی تحریری وجوہات دیتے ہوئے، اگر ضروری ہو تو انکوائری کرنے کے بعد منسوخ کردی جائے گی اگر پتہ چلے کہ ٹریڈ یونین نے :

(اے) خود کو تحلیل کر دیا ہو یا وجود نہ رکھتی ہو؛ یا(بی) اجتماعی سودا کاری کے ایجنٹ کے تعین کے لیے کسی ریفرنڈم میں حصہ نہ لیا ہو؛ یا(سی) دفعہ 100 کے تحت ادارے یا اداروں کے گروپ میں اجتماعی سودا کاری کے ایجنٹ کے تعین کے لیے درخواست نہ دی ہو جبکہ ایجنٹ کی دو سالہ مدت ختم ہو چکی ہو؛ یا(ڈی) بطور دیگر ٹریڈ یونین اپنی رجسٹریشن سے، یا پنجاب لیبر کوڈ کے آغاز نفاذ سے، جو بھی پہلے ہو، دو ماہ کے اندر اجتماعی سودا کاری کے ایجنٹ کے تعین کے لیے درخواست نہ دی ہو، بشرطیکہ ادارے یا اداروں کے گروپ میں پہلے سے کوئی اجتماعی سودا کاری کا ایجنٹ موجود نہ ہو؛ یا

(ای) اجتماعی سودا کاری کے ایجنٹ کے تعین کے لیے دو مسلسل ریفرنڈمز میں بطور ووٹرز کی حتمی فہرست میں ڈالے گئے ووٹوں میں پندرہ فیصد سے کم ووٹ حاصل کیے ہوں۔

97۔ ٹریڈ یونین سے متعلق تعمیلی احکامات:۔(1) پانچ یا زائد ٹریڈ یونین کے ارکان (دفعہ ہذا میں جسے "درخواست گزار" کہا گیا ہے) اگر سمجھیں کہ ٹریڈ یونین کا ایگزیکٹو اپنے آئین یا پنجاب لیبر کوڈ کی تعمیل نہیں کر رہا، تو رجسٹرار کو تحریری شکایت دے سکتے ہیں تاکہ وہ ایگزیکٹو کو شکایات کی تاریخ سے چودہ دن میں تعمیل کا حکم دے۔(2) اگر ایگزیکٹو، رجسٹرار کے حکم کی تعمیل سے انکار کرے یا ناکام رہے تو رجسٹرار پوری ایگزیکٹو باڈی کو تحلیل کر سکتا ہے یا ذمہ دار افراد کو الگ کر سکتا ہے، یا خالی عہدوں کے لیے انتخاب کرانے کا حکم دے سکتا ہے اور عملدرآمد کے لیے آخری تاریخ مقرر کر سکتا ہے۔(3) مذکورہ ذیلی دفعہ کےتحت، حکم جاری کرنے سے پہلے، رجسٹرار اس شخص کوشنوائی کا موقع دے گا جس کے خلاف حکم یا ہدایات دی جارہی ہوں۔

98۔ منسوخی کے خلاف اپیل:۔ کسی دئیے گئے حکم سے متاثرہ کوئی ٹریڈ یونین :

(اے) دفعہ 96 کی ذیلی دفعہ (1) کے تحت، لیبر کورٹ کے حکم کے خلاف کسی بھی ٹریڈ یونین کو حکم جاری ہونے کے تیس دن کے اندر ٹربیونل میں اپیل دائر کرنے کا حق ہوگا؛ اور(بی) دفعہ 96 کی ذیلی دفعہ (2) کے تحت رجسٹرار کے حکم کے خلاف اپیل لیبر کورٹ میں تیس دن کے اندر کی جا سکتی ہے۔

سی۔ اجتماعی سودا کاری

99۔ اجتماعی سودا کاری کی سطحیں:۔اجتماعی سودا کاری اس سطح پر کی جا سکتی ہے جہاں فریقین متفق ہوں، بشمول درج ذیل سطحیں:(اے) ایک ادارہ یا اداروں کا گروپ؛ یا(بی) آرگنائزیشن یا آجروں کی آرگنائزیشن کے ساتھ یونینز کی فیڈریشن یا کنفیڈریشن کی جانب سے اجتماعی سودا کاری کی صورت میں:(i) پیشہ، پروفیشن، سیکٹر یا سیکٹرز؛ یا(ii) صوبہ یا صوبے کا حصہ۔

100۔ ادارہ یا اداروں کے گروپ کے لیے اجتماعی سودا کاری کے ایجنٹ کا تعین:۔(1) اگر کسی ادارہ یا اداروں کے گروپ میں صرف ایک رجسٹرڈ ٹریڈ یونین ہو، اور وہ اپنے ارکان کی تعداد اس ادارے یا گروپ کے کل ملازمین کا کم از کم ایک تہائی ہو، تو رجسٹرار اسے مقررہ طریقے سے اجتماعی سودا کاری کا ایجنٹ سرٹیفائی کرے گا بشرطیکہ اس حوالے سے درخواست دی جائے۔(2) اگر کسی ادارے یا اداروں کے گروپ میں ایک سے زائد رجسٹرڈ ٹریڈ یونینز ہوں، تو رجسٹرار، کسی ایسی ٹریڈ یونین کی جانب سے جس کے اراکین ایسے ادارے یا اداروں کے گروپ میں ملازم ورکرز کی کل تعداد کے پانچویں حصے (20 فیصد) سے کم نہ ہوں، یا آجر یا حکومت کی جانب سے، اس سلسلے میں دی گئی درخواست پر، درخواست دیے جانے سے پندرہ دن کے اندر خفیہ رائے شماری کرائے گا تاکہ یہ طے کیا جا سکے کہ ایسی ٹریڈ یونینز میں سے کون سی اجتماعی سودا کاری کی ایجنٹ ہوگی۔(3) رجسٹرار، بڑے ادارے کی صورت میں، ایک سے زائد شہر میں اس کی شاخیں ہونے کی صورت میں، درخواست دینے کے تیس یوم کے اندر خفیہ بیلٹ کا انعقاد کرے گا۔

(4) رجسٹرار، ذیلی دفعہ (2)کے تحت ادارہ یا اداروں کے گروپ پر مشتمل یا بشمول سیزنل ادارہ کے تناظر میں کسی درخواست پر عملدرآمد نہ کرے گا تاوقتیکہ ایسی درخواست ایسے مہینہ کے دوران دی جائے جس میں ایسے ادارے میں برسرروزگارورکرز کی تعداد سال میں عموماًزیادہ سے زیادہ ہو۔(5) ذیلی دفعہ (2)کے تحت، درخواست کی وصولی پر، رجسٹرار بذریعہ تحریری نوٹس ادارہ یا اداروں کے گروپ میں ہر رجسٹرڈ ٹریڈ یونین کو بلائے گا جس کے متعلقہ درخواست ہو :

(اے) دس یوم کے اندر نشاندہی کرے گا آیا ایسے ادارہ یا اداروں کے گروپ کے تناظر میں اجتماعی سودا کاری کے ایجنٹ کے تعین کے لیے خفیہ بیلٹ کے امیدوار ہونے کی خواہش رکھتا ہو؛ اور

(بی) اگروہ ایسی خواہش رکھتا ہو تو رجسٹر ار کو ہر رکن سیکشن یا شعبہ اور جگہ جہاں ورکر برسرروزگار ہو اور رکن بننے کی تاریخ کے تناظر میں، اس کے اراکین کے ناموں پر مشتمل فہرست اور اگر یونین ٹریڈ یونینز کی فیڈریشن ہو، تو الحاق شدہ ٹریڈ یونینز کی فہرست کے ساتھ ہر ایسے رکن کے مذکورہ کوائف کے تناظر میں ایسی ٹریڈ یونین کے اراکین کی فہرست بیس یوم کے اندر جمع کروائے گا۔(6) ہر آجر کرے گا :

(اے) رجسٹر ار کی جانب سے اگرمطلوب ہو، تو ادارہ یا اداروں کے گروپ میں برسرروزگار تمام ورکرز کی فہرست ان کے علاوہ جن کی ادارہ یا اداروں کے گروپ میں ملازمت کی مدت تین ماہ سے کم ہو اور ہر ورکر کے تناظر میں ورکر کی عمر، سیکشن یا شعبہ اور روزگار کی جگہ اور ادارہ یا اداروں کے گروپ میں روزگار کی تاریخ والی فہرست جمع کروائے گا؛ اور

(بی) آجر اور ٹریڈ یونینز کی جانب سے جمع کروائی گئی فہرستوں کو تصدیق کے لیے ایسی سہولیات کی فراہمی جیسی رجسٹرار کو درکار ہو۔

(7) سیزنل ادارے میں ملازم ورکر کے معاملے میں ذیلی دفعہ (6) میں مذکور تین ماہ کی مدت کا شمار کرتے ہوئے، وہ مدت بھی شمار کی جائے گی جس کے دوران ورکر گزشتہ سیزن میں اسی ادارے میں ملازم رہا ہو۔

(8) رجسٹرار، ٹریڈیونینز کی جانب سے جمع کرائی گئی فہرستوں کی تصدیق کے بعد، ووٹرز کی فہرست تیار کرے گا جس میں ہرورکر کا نام شامل ہوگا جس کی مدت ملازمت ذیلی دفعہ (6)کے مطابق بطور اکٹھی کی گئی جو کہ تین ماہ سے کم نہ ہو اور جو کسی انتخاب لڑنے والی ٹریڈ یونین کا رکن ہو، اور پول کےلیے مقررہ تاریخ سے کم ازکم چاریوم قبل ہر انتخاب لڑنے والی ٹریڈ یونینز کو ایسی تیار کی گئی ووٹرز کی فہرست مصدقہ نقل بھجوائے گا۔(9) ہر ورکر جو کسی بھی انتخاب لڑنے والی ٹریڈ یونینز کا رکن ہو اور جس کا نام ذیلی دفعہ (8)کے تحت تیار کردہ ووٹرز کی فہر ست میں ہو، اجتماعی سودا کاری ایجنٹ کے تعین کےلئے انتخاب میں ووٹ دینے کا حقدار ہوگا۔

(10) ہر آجر تمام ایسی سہولیات فراہم کرے گا بشمول اپنے ادارہ میں حقیقی اخراجات کے جیسا کہ رجسٹرار کو انتخابات کے انعقاد کے لیے درکار ہوں، لیکن ووٹنگ میں مداخلت یا کسی صورت اثرانداز نہیں ہوگا۔

(11) پولنگ اسٹیشن کے پچاس میٹر کے دائرہ میں کوئی شخص ووٹ کے حصول کے لیے انتخابی مہم نہیں چلا سکتا۔

(12) اجتماعی سودا کاری کے ایجنٹ کے تعین کے لیے خفیہ ووٹ (سیکریٹ بیلٹ) کے انعقاد کے مقصد کے لیے رجسٹرار درج ذیل اقدامات کرے گا:(اے)پولنگ کی تاریخ مقرر کرے گا اور اس کی اطلاع تمام مقابلہ کرنے والی یونینز اور ہر آجر کو دے گا؛(بی)مقررہ تاریخ کو پولنگ اسٹیشن پر بیلٹ باکس رکھے گا اور ان باکسز کو مقابلہ کرنے والی یونینز کے نمائندگان کی موجودگی میں مہر بند کرے گا؛(سی)پولنگ اسٹیشن پر پولنگ کرائے گا جہاں مقابلہ کرنے والی یونینز کے نمائندگان کو موجود رہنے کا حق ہوگا؛(ڈی)پولنگ ختم ہونے پر اور موجود نمائندگان کی موجودگی میں بیلٹ باکس کھول کر ووٹ گنے گا؛ اور(ای)ووٹ گنتی کے بعد سب سے زیادہ ووٹ حاصل کرنے والی یونین کو دو سال کے لیے اجتماعی سودا کاری کے ایجنٹ کے طور پر سرٹیفائی کرے گا۔

(13) کوئی بھی یونین اجتماعی سودا کاری کے ایجنٹ کے طور پر سرٹیفائی نہیں ہوگی جب تک کہ اسے ملنے والے ووٹوں کی تعداد ایسے ادارے یا اداروں کے گروپ میں ملازم ورکرز کی کل تعداد کا کم از کم ایک تہائی (33 فیصد) نہ ہو۔

(14) اگر پہلی پولنگ میں کوئی یونین مطلوبہ تعداد کے ووٹ حاصل نہ کرے، تو پہلے دو سب سے زیادہ ووٹ حاصل کرنے والی یونینز کے درمیان دوبارہ پولنگ ہوگی، اور جو یونین اس پولنگ میں اکثریتی ووٹ حاصل کرے گی، اسے مقررہ طریقے سے اجتماعی سودا کاری کے ایجنٹ کے طور پر سرٹیفائی کیا جائے گا۔

(15) اگر دو یا دو سے زیادہ یونینز برابر ووٹ حاصل کریں تو ان کے درمیان مزید پولنگ ہوگی جب تک کہ کوئی اکثریت حاصل نہ کرے۔

(16) اگر کوئی یونین ذیلی دفعہ (5) کی شق (اے) کے تحت خفیہ رائے شماری میں حصہ لینے کی خواہش ظاہر نہیں کرتی، تو رجسٹرار اس ٹریڈ یونین کو، جس نے ذیلی دفعہ (2) کے تحت درخواست دی ہو، اجتماعی سودا کاری کے ایجنٹ کے طور پر سرٹیفائی کرے گا۔

(17) کسی ٹریڈ یونین کو ذیلی دفعہ (16) کے تحت کسی ادارے یا اداروں کے گروپ کے لیے اجتماعی سودا کاری کے ایجنٹ کے طور پر سرٹیفائی نہیں کیا جائے گا جب تک کہ اس کے اراکین کل ورکرز کا کم از کم ایک تہائی نہ ہوں۔

(18) اگر رجسٹرڈ یونین کو، ذیلی دفعہ (1) کے تحت اجتماعی سودا کاری کے ایجنٹ کے طور پر سرٹیفائی کیا گیا ہو، ادارہ یا اداروں کے گروپ کےلیے ذیلی دفعہ (12) کی شق (ای) کے تحت بطور اجتماعی سودا کاری کے ایجنٹ، ایسی سرٹیفکیشن کی تاریخ سے دوسال کی مدت کے اندر ایسے ادارہ یا اداروں کے گروپ کےلئے اجتماعی سودا کاری کے ایجنٹ کے تعین کےلئے کوئی درخواست منظور نہ کی جائے گی ماسوائے جہاں ایسی رجسٹرڈ ٹریڈ یونین کی رجسٹریشن مدت کے اختتام سے پہلے منسوخ ہوجائے۔

(19) وہ یونین فیڈریشن جو صرف ایک آجر کو کور کرتی ہے (جسے پہلے"صنعتی فیڈریشن"کہا جاتا تھا) دفعہ ہذا کے تحت رجسٹرار سے اجتماعی سودا کاری کے ایجنٹ کی سرٹیفیکیشن کے لیے درخواست دے سکتی ہے۔

(20) رجسٹرار کسی بھی افسر کو دفعہ ہذاکے تحت تمام یا کسی بھی فرض کی ادائیگی کے لیے تحریری اجازت دے سکتا ہے۔

101۔ اجتماعی سودا کاری کے ایجنٹ کے حقوق:۔(1) کسی ادارے یا گروپ کے اجتماعی سودا کاری کے ایجنٹ کو درج ذیل حقوق حاصل ہوں گے:(اے)آجر یا آجرین کے ساتھ ملازمت، عدم ملازمت، ملازمت کی شرائط یا کام کے حالات سے متعلق معاملات پر اجتماعی سودا کاری کرنا، سوائے ایسے معاملات کے جو کسی قانون، ایوارڈ یا اجتماعی معاہدے کے تحت محفوظ یا ضمانت شدہ حقوق کے نفاذ سے متعلق ہوں؛(بی)کسی بھی مقدمے میں تمام یا کسی بھی ورکر کی نمائندگی کرنا؛(سی)پنجاب لیبر کوڈ کے احکامات کے تحت ہڑتال کا نوٹس دینا اور ہڑتال کا اعلان کرنا؛(ڈی)کسی فلاحی ادارے یا پراویڈنٹ فنڈز اور پنجاب لیبر کوڈ کے تحت قائم کردہ ورکرز پرافٹ پارٹیسپیشن فنڈ کے بورڈ آف ٹرسٹیز پر ورکرز کے نمائندے نامزد کرنا؛(ای) دفعہ 53 کے تحت سیفٹی اینڈ ہیلتھ کے نمائندے نامزد کرنا؛ اور(ایف)پنجاب لیبر کوڈ میں صراحت کردہ دیگر اختیارات کا استعمال کرنا۔

(2) اجتماعی سودا کاری کا ایجنٹ یقینی بنائے گا کہ اجتماعی معاہدے میں شامل تمام ورکرز کے مفادات کی مکمل اور مناسب نمائندگی ہو، چاہے وہ آرگنائزیشن کے اراکین ہوں یا نہیں۔

102۔ اجتماعی سودا کاری کے ایجنٹ کے تعین تک ٹریڈ یونین کے فرائض و اختیارات:۔پنجاب لیبر کوڈ کے تحت، اجتماعی سودا کاری کے ایجنٹ کے ذمہ جو اختیارات یا فرائض تفویض کیے گئے ہوں، بشمول دفعہ ہذا کے تحت دیئے گئے اختیارات پر عملدرآمد کے وہ اجتماعی سودا کاری کے ایجنٹ کی سرٹیفیکیشن تک ایسی رجسٹرڈ ٹریڈ یونین کے ذریعے انجام دیے جا سکتے ہیں جو آجر یا آجرین کی طرف سے تسلیم شدہ ہو۔

103۔ اجتماعی سودا کاری کی اکائی کا تعین:۔(1)

حکومت، عمومی یا خصوصی حکم کے ذریعے، کسی رجسٹرار کو یہ اختیار دے سکتی ہے کہ وہ کسی ٹریڈ یونین یا ٹریڈ یونینز کی فیڈریشن یا آجر کی جانب سے دی گئی درخواست پر، یا محکمہ کی جانب سے بھیجے گئے ریفرنس پر، ورکرز اور آجروں کے نمائندوں کی مشاورت سے انکوائری کرنے کے بعد، اگر وہ مطمئن ہو کہ ایک ہی آجر کے ادارے یا اداروں کے گروپ میں ملازم ورکرز کے مفاد کے تحفظ کے لیے، اجتماعی سودا کاری کے سلسلے میں، ایسے ورکرز کے ایک یا زائد اجتماعی سودا کاری یونٹس کا تعین ضروری، منصفانہ اور قابل عمل ہے، تو ورکرز کی تقسیم، ادارے یا گروپ کے اجزاء کی موجودہ حدود، مواصلات کی سہولیات، عمومی سہولت، معاشی سرگرمی کی یکسانیت یا مماثلت اور دیگر متعلقہ عوامل کو مدنظر رکھتے ہوئے:

(اے) ایسے ادارہ یا گروپ میں ایک یا زائد مشترکہ بارگیننگ یونٹ کا تعین اور سرٹیفیکیشن کرے؛(بی) دفعہ ہذا کے تحت فیصلہ کے تناظر میں جوتبدیلیاں ہوں کی صراحت کرنا اور ایسے فیصلہ سے متاثرہ ٹریڈ یونینز اور فیڈریشن آف ٹریڈ یونینز کی رجسٹریشن کے تناظر میں قابل عمل ہوں گی اور ایسی یونینز کے مابین اجتماعی سودا کاری کے ایجنٹس اور فیڈریشنز کی سرٹیفکیشن، شاپ اسٹیورڈز اور ورکرز، اداروں کے ورک کونسلز کے نمائندگان کی نامزدگی یا الیکشن، اگر کوئی ہوں، ایسے فیصلہ سے متاثرہ ہو؛

(سی) وہ تاریخ یا تواریخ جن سے، اور وہ مدت جس کے لیے، ایسی تمام یا کوئی تبدیلیاں مؤثر ہوں گی، صراحت کرنا، لیکن اس طرح صراحت کردہ تاریخ کسی ادارے یا اداروں کے گروپ کے لیے سرٹیفائیڈ اجتماعی سودا کاری کے ایجنٹ پر اطلاق کے لحاظ سے دفعہ 100 کی ذیلی دفعہ (18) میں مذکور دو سال کی مدت کے اندر کی کوئی تاریخ نہیں ہوگی؛

(ڈی) کسی ادارہ یا اداروں کے گروپ کے لیے دفعہ 100 کے تحت اجتماعی سودا کاری کے ایجنٹ کے تعین کے لیے کارروائیوں کو روکنا یا ممنوع کرنا جو دفعہ ہذا کے تحت کیے گئے فیصلہ سے متاثرہ ہو؛ اور

(ای) رجسٹرار، ایسے اقدامات اٹھاسکتا یا ایسی ہدایات جاری کرسکتا ہےجو ایسی تبدیلیوں کو مؤثر بنانے کے لیے ضروری ہو

(2) اجتماعی سودا کاری کے یونٹ کی سرٹیفیکیشن کے بعد، اجتماعی سودا کاری کے یونٹ کے کسی حصے یا اجتماعی سودا کاری کے یونٹس کے کسی گروپ کے لیے دفعہ 100 کے تحت اجتماعی سودا کاری کے ایجنٹ کے تعین کے لیے سرٹیفیکیشن یا کارروائیاں نہ ہوں گی۔

(3) رجسٹرار کا دفعہ ہذا کے تحت حکم پنجاب لیبر کوڈ میں شامل کسی متضاد امر کے باوجود، مؤثر ہوگا۔

104۔ اجتماعی سودا کاری کی اکائیوں سے متعلق اپیلیں:۔(1) بلالحاظ اس امر کے کہ پنجاب لیبر کوڈ یا کسی دیگر قانون میں کچھ مذکور ہو، رجسٹرار کے صادر کردہ اجتماعی سودا کاری کے یونٹ کے تعین کے لیے، حکم سے متاثر کوئی بھی شخص تیس یوم کے اندر لیبر اپیلٹ ٹربیونل میں اپیل دائر کر سکتا ہے۔(2) ذیلی دفعہ (1)کے تحت ٹربیونل اپیل کی سماعت کرکے رجسٹرار کے حکم کو برقرار، منسوخ، تبدیل یا ترمیم کر سکتا ہے۔

105۔ ایک آجر سے زائدٹریڈ یونینزکی فیڈریشنز اور کنفیڈریشنز کی جانب سے اجتماعی سودا کاری:۔(1) اگر فریقین کی رضا مندی ہو تو ٹریڈ یونینز کی فیڈریشن یا کنفیڈریشن آجروں کی کسی تنظیم یا تنظیموں کے ساتھ اجتماعی سودا کاری کر سکتی ہے، اور یہ کسی بھی سطح پر ہو جو دفعہ ‎99 کے تحت بیان کی گئی ہو۔(2) اگر فیڈریشن یا کنفیڈریشن نے آجروں کی کسی تنظیم یا تنظیموں سے درخواست کی ہو، وہاں فریقین اپنی کارروائیوں کا طریق کار طے کر سکتے ہیں۔(3) حکومت، ورکرز اور آجرین کے نمائندوں سے مشاورت کے بعد، دفعہ ہذا کے تحت مذاکرات کے لیے رہنما اصول طے کر سکتی ہے۔(4) ضروری تبدیلیوں کے ساتھ، دفعات 109، 110، 111، 112، اور 113 کے احکامات کا اجتماعی سودا کاری کےلئے اطلاق ہوگا۔

106۔ اجتماعی سودا کاری کا آغاز:۔(1) اجتماعی سودا کاری کی کارروائی اُس وقت شروع سمجھی جائے گی جب آجر یا اجتماعی سودا کاری کا ایجنٹ دوسرے فریق کو ملازمت کی شرائط اور دیگر مشترکہ مفادات سے متعلق اجتماعی معاہدہ کرنے کے لیے تحریری درخواست دے۔(2) جس فریق کو ذیلی دفعہ (1) کے تحت درخواست موصول ہو، وہ درخواست کی وصولی کے بعد سات کیلنڈر دنوں کے اندر اجتماعی مذاکرات کے آغاز کنندہ کو اپنا جواب بھیج کر بات چیت شروع کرے گا اور ان افراد کے نام بتائے گا جو اجتماعی مذاکرات میں ان کی نمائندگی کریں گے۔(3) جب کسی معاملے کے بارے میں لیبر کورٹ یا ٹربیونل کا فیصلہ مؤثر ہو، تو کوئی بھی آجر یا اجتماعی سودا کاری کا ایجنٹ اس معاملے سے متعلق کسی بھی مطالبے کو اٹھانے کا حق نہیں رکھے گا۔

107۔ اجتماعی سودا کاری کے مذاکرات کا طریق کار:۔(1)اجتماعی معاہدے کے مذاکرات میں شریک تمام فریقین نیک نیتی سے سودا کاری کریں گے اور اجتماعی معاہدہ طے کرنے کی ہر معقول کوشش کریں گے۔

(2) ذیلی دفعہ (1) کے تحت "نیک نیتی سے مذاکرات"کا مطلب ہے:(اے)مناسب اوقات میں اجلاسوں میں شریک ہونا اور اس میں حصہ لینا؛(بی)متعلقہ معلومات (جو خفیہ یا تجارتی طور پر حساس نہ ہوں) بروقت فراہم کرنا؛(سی) دیگر فریق کی طرف سے پیش کردہ تجاویز کا بروقت جواب دینا؛(ڈی)دوسرے فریق کی تجاویز پر سنجیدہ غور کرنا اور ان تجاویز پر جواب دینے کے لیے وجوہات فراہم کرنا؛(ای) ایسے من مانے یا غیر منصفانہ طرزعمل سے گریز کرنا جو آزادی تنظیم یا اجتماعی سودا کاری کو نقصان پہنچائے۔

(3) نیک نیتی سے مذاکرات کا تقاضا یہ نہیں ہے کہ:(اے)کسی فریق کو مذاکرات کے دوران کسی رعایت پر اتفاق کرنا ضروری ہے؛ یا(بی)کسی فریق کو معاہدے کی شرائط پر اتفاق کرنا ضروری ہے۔

(4) آجر یا آجروں کی تنظیم، مطالبے پر، اجتماعی سودا کاری کی اغراض کے لیے ورکرز کے نمائندوں کو اپنی مالی حالت کے بارے میں ایسی تمام معلومات فراہم کرے گی جو اجتماعی معاہدہ طے پانے کے لیے اہم ہوں، اور جو معلومات اجتماعی سودا کاری کے مقصد کے لیے ظاہر کی جاتی ہیں اور جوعام طور پر دستیاب نہیں ہوں، وہ معلومات وصول کرنے والے فریق کی جانب سے خفیہ رکھی جائیں گی اور کسی تیسرے فریق کو ظاہر نہیں کی جائیں گی۔ مصالحت کی کارروائی کے دوران، آجر یا آجروں کی تنظیم ایسی تمام معلومات مصالحت کار کو فراہم کرے گی جو اجتماعی معاہدہ طے پانے کے لیے اہم ہوں۔

108۔ اجتماعی سودا کاری کے تنازعہ کا ورکس کونسل کو ریفرنس:۔(1) اگر کسی وقت آجر یا اجتماعی سودا کاری کے ایجنٹ کو کسی ادارے یا گروپ میں کسی تنازعہ کا سامنا ہو یا ہونے کا امکان ہو جس میں ورک کونسل دفعہ ‎200 کے تحت قائم کی گئی ہو، تو آجر یا اجتماعی سودا کاری کا ایجنٹ اپنی آراء ورک کونسل کو تحریری طور پر بھیج سکتے ہیں۔ آراء کی ایک کاپی دوسرے فریق کو بھی بھیجی جائے گی۔(2) ذیلی دفعہ (1) کے تحت تحریری درخواست وصول کرنے کے بعد، ورک کونسل تیس دنوں کے اندر یا فریقین کے درمیان متفقہ مدت میں اس تنازعے کو دو طرفہ مذاکرات کے ذریعے حل کرنے کی کوشش کرے گی۔

109۔ میڈی ایٹر (مفاہمت کار) یا مصالحت کار کی معاونت:۔ (1) اگر آجر اور اجتماعی سودا کاری کے ایجنٹ کے درمیان اجتماعی معاہدہ نہیں ہو پاتا، اور مذاکرات کے آغاز کے تیس دن گزر چکے ہوں، تو آجر یا اجتماعی سودا کاری کا ایجنٹ اس معاملے کو میڈی ایٹر (مفاہمت کار) (دفعہ ‎290 کے تحت مقرر) یا مصالحت کار (دفعہ ‎291 کے تحت مقرر) کے پاس بھیج سکتے ہیں۔(2) میڈی ایٹر (مفاہمت کار) یا مصالحت کار فریقین کو اجتماعی معاہدے تک پہنچنے میں مدد دینے کے لیے اپنی تدابیر اختیار کر سکتا ہے جو وہ مناسب سمجھے۔(3) دفعہ 105 میں فریقین کسی بھی وقت ذیلی دفعہ (1) میں بیان کردہ طریق کار کا استعمال کر سکتے ہیں۔

110۔ اجتماعی معاہدے طے پانا:۔(1) جہاں فریقین دفعہ ‎105 اور دفعہ‎106 کے تحت اٹھائے گئے معاملات کے حوالے سے کسی تصفیے پر پہنچ جائیں، تو وہ اپنے تصفیے کو اجتماعی معاہدے میں ریکارڈ کریں گے جس پر ان کے مجاز نمائندگان دستخط کریں گے۔(2) اجتماعی معاہدے کی ایک کاپی دستخط کے سات دن کے اندر آجر یا آجرین کی آرگنائزیشن کے نمائندے کی طرف سے محکمے کو رجسٹریشن کے لیے بھیجی جائے گی، اور اجتماعی معاہدے کا نافذ العمل ہونا رجسٹریشن کے امر سے متاثر نہیں ہوگا۔

111۔ اجتماعی معاہدوں کی شکل اور مندرجات:۔(1) اجتماعی معاہدہ ہوگا:(اے)تحریری طور پر ہو اور معاہدہ کے فریقین کے دستخط شدہ ہو؛(بی)فریقین اور ورکرز کا تعین کیا جائے جس پر یہ معاہدہ لاگو ہوگا؛(سی)اس کی مؤثر ہونے کی تاریخ اور مدت جس کا یہ احاطہ کرے؛(ڈی)اجرت، ملازمت کی شرائط وقیود، فریقین کے مابین تعلقات؛(ای)معاہدے کی تشریح، اطلاق اور انتظام سے متعلق فریقین کے مابین تنازعات کے حل کے طریق کار شامل ہوں؛ اور(ایف)دیگر وہ امور جو فریقین کے درمیان متفق ہوں۔

(2) کسی بھی اجتماعی معاہدے کی ایسی شرط جو پنجاب لیبر کوڈ سے متصادم ہو، وہ کالعدم اور قانونی طور پر غیر مؤثر ہوگی۔

112۔ اجتماعی معاہدوں کا واجب التعمیل ہونا:۔(1) دفعہ ‎110 کے تحت طے شدہ اجتماعی معاہدہ لازم ہوگا:(اے)تمام فریقین پر؛(بی)فریقین کے وارث، جانشین یا تفویض شدگان پر؛(سی)اگر معاہدہ آجرین کی تنظیم نے طے کیا ہو، تو ان تمام آجرین پر جو اس تنظیم کو اپنے نمائندے کے طور پر تسلیم کرتے ہیں؛(ڈی)اگر معاہدہ ٹریڈ یونینز کی فیڈریشن یا کنفیڈریشن کے طے کرنے کی صورت میں، تو ان تمام ٹریڈ یونینز پر جنہوں نے اس فیڈریشن یا کنفیڈریشن کو اپنی نمائندگی کا اختیار دیا ہو؛(ای) آجرین کی جانب سے، جو معاہدے کے دائرہ کار میں آتے ہوں، منسلک کیے گئے تمام ورکرزپر۔

(2) اگر دفعہ 100 کے تحت اجتماعی سودا کاری کا ایجنٹ یا وہ ٹریڈ یونین جو اجتماعی سودا کاری کے ایجنٹ کے فرائض انجام دے رہی ہو، موجود ہو، آجر کسی دوسری ٹریڈ یونین سے اجتماعی معاہدہ نہیں کر سکتا جو اسی ادارے یا گروپ کے لیے ہو اور جس سے متعلق معاہدہ پہلے ہو چکا ہو تو اس کی خلاف ورزی کو دفعہ ‎77 کے تحت ایک غیر منصفانہ محنتی عمل سمجھا جائے گا۔

(3) ذیلی دفعہ (2) میں شامل کسی امر کے باوجود، ادارہ یا اداروں کے گروپ کی سطح پر اجتماعی معاہدہ پر گفت وشنید ہو سکتی ہےجو ایسی شرائط رکھتا ہو جو اس اجتماعی معاہدے کی شرائط سے کم فائدہ مند نہ ہوں جوفیڈریشن یا ٹریڈیونینز کی کنفیڈریشن اور آجرین کی آرگنائزیشن کےمابین اجتماعی معاہدہ پایہ تکمیل ہواہو۔

(4) فریقین متعلقہ ورکرز کے نوٹس میں قابل اطلاق معاہدہ کے مندرجات لانے کے لیےمناسب اقدامات اٹھائیں گے۔

(5) آجریاآجرین کی آرگنائزیشن اجتماعی معاہدات جمع کروائیں گےاور اس میں وضع کی گئی کوئی مابعد تبدیلیاں مصالحت کار کے پاس جمع کروائیں گے جو اس مقصد کے لیےجیسا کہ مقرر کیا جائے، خصوصی رجسٹر برقرار رکھے گا۔

113۔ اجتماعی معاہدے یا ایوارڈ کی مؤثر تاریخ:۔(1) ایک اجتماعی معاہدہ مؤثر ہوگا:(اے)اگر فریقین کے درمیان اس سے متعلق کسی تاریخ پر اتفاق ہو، تو اس تاریخ پر؛ اور(بی)اگر اس طرح کی کوئی تاریخ پر اتفاق نہ ہو، تو اس تاریخ پر جب اجتماعی معاہدہ فریقین کے دستخط سے مکمل ہو جائے۔

(2) ایک اجتماعی معاہدہ اتنی مدت کے لیے لاگو ہوگا جتنی مدت پر فریقین کے درمیان اتفاق ہو، لیکن یہ مدت دو سال سے زیادہ نہیں ہوگی، اور اگر اس طرح کی کوئی مدت پر اتفاق نہ ہو، تو یہ فریقین کے دستخط کی تاریخ سے ایک سال تک مؤثر رہے گا، اور اس کے بعد وہ فریقین پرلاگو رہے گا جب تک کہ ایک فریق دوسرے فریق کو تحریری طور پر اطلاع نہ دے دے کہ وہ اس اجتماعی معاہدہ کا مزید پابند نہیں رہنا چاہتا، اور ایسی اطلاع کی تاریخ سے دو ماہ کی مدت ختم ہونے تک یہ معاہدہ فریقین پر لاگو رہے گا۔

114۔ اجتماعی معاہدہ میں باہمی رضامندی سے ترمیم کی اجازت:۔ اجتماعی معاہدہ جو مؤثر ہو چکا ہو، فریقین کی باہمی رضا مندی سے تبدیل کیا جا سکتا ہے۔

115۔ پرنسپلز اور ورکرز کے مابین اجتماعی سودا کاری:۔ پرنسپلز کے ساتھ منسلکہ ورکرز درج ذیل کے مطابق ان کے ساتھ اجتماعی سودا کاری کر سکتے ہیں :

(اے) پنجاب لیبر کوڈ کے حصہ چہارم کے مطابق؛ یا(بی) اگر حصہ چہارم کے احکام لاگو نہ ہوں، تو مقررہ طریقے کے مطابق۔

ڈی۔ ہڑتال اور تالہ بندی

116۔ ہڑتال کا حق:۔ (1) دفعہ ‎122 کے تابع، اجتماعی سودا کاری کے ایجنٹ کو ہڑتال کا حق ہوگا جب:(اے)اجتماعی سودا کاری کے مذاکرات تعطل کا شکار ہو جائے؛ یا(بی)کوئی صنعتی تنازعہ ہو جو اجتماعی معاہدے سے متعلق نہ ہو اور بات چیت تعطل کا شکار ہو جائے۔

(2) مذاکرات کو تعطل میں سمجھا جائے گا اگرپینتالیس یوم بارگیننگ کے آغاز سے گزرچکے ہوں اور کوئی اجتماعی معاہدہ طے نہیں پایا ہو۔"(3) صنعتی تنازعہ جو اجتماعی معاہدے سے متعلق نہیں ہے" کا مطلب ہے کہ ایسا تنازعہ جو:(i)موجودہ اجتماعی معاہدے کے تحت شامل نہ ہو؛ اور(ii) جو اجتماعی معاہدے کے حوالے سے بات چیت کا موضوع نہ ہو۔

(4) درج ذیل کے تحت کام کی بندش:(اے) دفعہ ‎67؛ اور(بی) دفعہ 153 ( آجر معاوضہ ادائیگی کی ذمہ داری کی خلاف ورزی میں) ہڑتال نہ ہوگی اور صنعتی تنازع کا موضوع نہ ہوگی۔

117۔ ہڑتال کے حق کا تحفظ:۔ (1) ذیلی دفعہ (3) کے تابع، کسی ورکر کو ملازمت سے برخاست نہیں کیا جا سکتا یا اس کو ملازمت میں کوئی نقصان نہیں پہنچایا جا سکتا اس بنا پر کہ اس نے دفعہ 116 کے تحت ہڑتال کا حق استعمال کیا ہے، استعمال کر رہا ہے یا استعمال کرنے کا ارادہ رکھتا ہے، ماسوائے اس کے کہ ورکر لیبر کورٹ کی جانب سے ہڑتال کو غیر قانونی قرار دیے جانے کے بعد بھی اسے جاری رکھے۔(2) اگر ورکرز نے پنجاب لیبر کوڈ کےتحت ہڑتال میں شرکت کی ہو یا جسے آجر نے تالہ بندی کا نشانہ بنایا ہو، ہڑتال یا تالہ بندی کے اختتام پر کام کے لیے رپورٹ کرتا ہے۔ آجر معقول مدت کے اندر ملازمت میں ایسے ملازم کو اس آسامی پر بحال کرے گا جو اس کے پاس ہڑتال یا تالہ بندی سے فوراً پہلے تھی۔

(3) آجر اس ورکر کو اجرت دینے کا پابند ہوگا جب وہ قانونی ہڑتال پر ہو، جب تک کہ لیبر کورٹ یا ثالث کوئی دیگر حکم نہ دے۔(4) اگر ورکرز دفعہ ‎125 کے تحت کم سے کم خدمت فراہم کرتے ہیں، آجر ان ورکرز کو اجرت فراہم کرے گا جو وہ خدمت فراہم کر رہے ہیں۔

118۔ لیبر کی عارضی متبادل بھرتی کی ممانعت:۔ آجر کسی ایسے ملازم کا کام انجام دینے کے لیے، جو ہڑتال میں شریک ہو یا جسے تالہ بندی کا سامنا ہو، کسی شخص کو کام پر نہیں رکھے گا، تاوقتیکہ ایسا کام کم از کم دیکھ بھال کی خدمات برقرار رکھنے کے لیے ضروری ہو، جن کے تعطل کے نتیجے میں کام کی جگہ یا مشینری کو نمایاں نقصان پہنچے۔

119۔ بعض ہڑتالوں سے پہلے مصالحت کی ضرورت:۔ (1) اجتماعی سودا کاری کا ایجنٹ ہڑتال کرنے سے پہلے دفعہ ‎351 کے تحت کم از کم چودہ دن تک مصالحت کی کارروائی کرے گا، سوائے اس صورت کے جب کوئی فوری خطرہ ہو جو حفاظت اور صحت سے متعلق ہو۔(2) آجر تالہ بندی نہیں کر سکتا جب تک کہ دفعہ 351 کے تحت مصالحت کی کارروائی کے آغاز سے چودہ دن نہ گزر جائیں۔

120۔ ہڑتال کا اعلان:۔ہڑتال کرنے کا فیصلہ اجتماعی سودا کاری کے ایجنٹ کی ایگزیکٹو باڈی کی طرف سے کیا جائے گا، اور ہڑتال کا نوٹس آجر کو دفعہ ‎121 کے مطابق دیا جائے گا۔

121۔ بعض ہڑتالوں سے پہلے ہڑتال اور تالہ بندی کا نوٹس:۔ (1) اجتماعی سودا کاری کا ایجنٹ ہڑتال کا نوٹس دے گا۔

(2) آجر اس وقت تک تالہ بندی نہیں کر سکتا جب تک کہ تالہ بندی کا نوٹس نہ دیا جائے۔

(3) ہڑتال یا تالہ بندی کے نوٹس کی مدت:(اے)اجتماعی مذاکرات کے تعطل کی صورت میں:(i) گو سلو کے علاوہ ہڑتال کے لیے چودہ دن : اور(ii) گو سلو کے لیے پانچ دن؛(بی)اجرت کی مسلسل عدم ادائیگی کی صورت میں پانچ دن۔

(4) نوٹس کی مدت ختم ہونے کے بعد، ورکرز ہڑتال کر سکتے ہیں، یا آجر تالہ بندی کر سکتا ہے، جیسا کہ معاملہ ہو۔

122۔ غیر قانونی ہڑتال یا تالہ بندی - (1) ہڑتال یا تالہ بندی، صحت اور حفاظت کو فوری خطرے سے متعلق ہڑتال کے ماسوا، غیر قانونی ہوگی اگر:۔

(اے) اس کا اعلان، آغاز یا اسے جاری اس مدت کے دوران کیا جائے جب اجتماعی معاہدہ یا ایوارڈ کسی بھی معاملے کے بارے میں مؤثر ہو جو اجتماعی معاہدے یا ایوارڈ کے تحت آتا ہو؛(بی) دفعہ 119 کے تحت مصالحت کی کارروائی کیے بغیر اس کا اعلان، آغاز یا اسے جاری کیا جائے؛

(سی) دفعہ 121 کے تحت مقررہ طریق پر ہڑتال یا تالہ بندی کا نوٹس تنازعہ کے دوسرے فریق کو دیے بغیر اس کا اعلان، آغاز یا جاری رکھا جانا؛

(ڈی) ایسے نوٹس میں صراحت کردہ تاریخ سے پہلے ہڑتال یا تالہ بندی؛ یا

(ای) یہ دفعات ‎123، ‎124، ‎125، ‎126 یا ‎127 کی خلاف ورزی کرتے ہوئے جاری رکھی جائے؛ اور(ایف)ہڑتال اجتماعی سودا کاری کے ایجنٹ سے منظور نہ ہو۔

(2) ایسی تالہ بندی جو غیر قانونی ہڑتال کے نتیجے میں کی گئی ہو اور ایسی ہڑتال جو غیر قانونی تالہ بندی کے نتیجے میں کی گئی ہو، غیر قانونی نہیں سمجھی جائے گی۔

123۔ کمیونٹی کے لیے سنگین مشکلات یا قومی مفاد کے لیے نقصان دہ ہڑتالیں:۔(1) اگر ہڑتال یا تالہ بندی تیس دن سے زیادہ جاری رہے، محکمے کو اس معاملے کو لیبر کورٹ کے پاس مناسب احکام کے لیے بھیجنے کا اختیار ہوگا اگر وہ یہ سمجھتا ہو کہ ہڑتال کمیونٹی کے لیے سنگین مشکلات پیدا کر رہی ہے یا قومی مفاد کے لیے نقصان دہ ہے۔(2) محکمے کو یہ اختیار ہوگا کہ اگر وہ مطمئن ہو کہ ایسی ہڑتال یا تالہ بندی کا جاری رہنا کمیونٹی کے لیے سنگین مشکلات پیدا کر رہا ہے یا قومی مفاد کے لیے نقصان دہ ہے، تو وہ تیس دن کی مدت ختم ہونے سے پہلے کسی بھی وقت معاملے کو مناسب احکام کے لیے لیبر کورٹ کے پاس بھیج سکتا ہے۔(3) لیبر کورٹ تنازع کے دونوں فریقین کو شنوائی کا موقع دینے کے بعد ایسا ایوارڈ دے گی جیسا یہ ضروری سمجھے، اتنی تیزی سے جتنا ممکن ہو، لیکن اسے تنازع بھجوائے جانے کی تاریخ سے زیادہ سے زیادہ تیس یوم کے اندر۔

(4) لیبرکورٹ تنازع میں کسی معاملہ پر بھی عبوری ایوارڈ جاری کر سکتی ہے۔

124۔ ضروری خدمات کی صورتوں میں ہڑتال یا تالہ بندی:۔ ضروری خدمت میں مصروف کوئی ملازم یا آجر ہڑتال یا تالہ بندی کے ذریعے کوئی کارروائی نہیں کرے گا۔

125۔ عوامی سہولیات کی فراہمی میں ہڑتال یا تالہ بندی:۔ (1) کوئی بھی آجر یا ملازم جو عوامی سہولیات کی فراہمی کی خدمات انجام دے رہا ہو، ہڑتال یا تالہ بندی کے دوران کم از کم چالیس فیصد ملازمین کی حاضری کو یقینی بنائے گا۔(2) یہ کم از کم سروس اس طرح کی ہوگی کہ عوام کی زندگی، صحت اور ذاتی حفاظت مناسب طریقے سے یقینی بنائی جا سکے۔(3) فریقین ہڑتال کی صورت میں پُر کی جانے والی آسامیوں کی تعداد اور نوعیت اور ان افراد پر اتفاق کرنے کی کوشش کریں گے جنہیں اس مقصد کے لیے کام پر موجود رہنا ہوگا۔(4) اگر فریقین، کم از کم سروس پر اتفاق کرنے میں ناکام رہیں، تو کوئی بھی فریق یا حکومت اس مسئلے کو لیبر کورٹ کے سامنے فیصلہ کے لیے پیش کر سکتا ہے۔

126۔ زیر التواء کار روائیوں کے دوران ہڑتال یا تالہ بندی کا نوٹس دینے کی ممانعت:۔ صنعتی تنازع کا کوئی فریق، جب کوئی رسمی کار روائی مصالحت کار، ثالث، لیبر کورٹ یا ٹربیونل کے سامنے ایسے صنعتی تنازع میں تشکیل پانے کے تناظر میں زیر التواء ہونے پر ہڑتال یا تالہ بندی کا نوٹس نہیں دے گا۔

127۔ پہلے سے جاری ہڑتال یا تالہ بندی کے بعد لیبر کورٹ اور ٹربیونل میں درخواست:۔ (1) جب کسی صنعتی تنازع کے سلسلے میں، خواہ وہ اجتماعی سودا کاری سے متعلق صنعتی تنازع ہو یا نہ ہو، کوئی ہڑتال یا تالہ بندی پہلے ہی شروع ہو چکی ہو اور اس وقت جاری ہو جب ایسے صنعتی تنازع کے بارے میں لیبر کورٹ کو درج ذیل کے تحت درخواست دی جائے یا اس کے سامنے زیر التواء ہو: (اے) دفعہ 353؛ یا (بی) دفعہ 354؛ تو لیبر کورٹ تحریری حکم کے ذریعے ہڑتال یا تالہ بندی کے جاری رہنے کی ممانعت کر سکتی ہے۔(2) جب ذیلی دفعہ (1) کے تحت کسی معاملے کے سلسلے میں دفعہ 304 کے تحت ٹربیونل میں اپیل کی گئی ہو، تو ٹربیونل بھی تحریری حکم سے ایسے صنعتی تنازع کے سلسلے میں کسی ایسی ہڑتال یا تالہ بندی کے جاری رہنے پر پابندی لگا سکتا ہے جو اپیل دائر کیے جانے کی تاریخ کو پہلے سے شروع ہو چکی اور جاری تھی۔

128۔ غیر قانونی ہڑتال یا تالہ بندی کی صورت میں کارروائی:۔ (1) دفعہ 122 کے تحت غیر قانونی ہڑتال یا تالہ بندی قرار دینے کے لیے ذیلی دفعہ (2) میں مذکور افراد لیبر کورٹ میں درخواست دائر کر سکتے ہیں۔(2) درخواست دائر کرنے والے افراد میں شامل ہیں:(اے) متعلقہ محکمہ کا بی ایس-17 یا اس سے اوپر کا افسر؛ یا(بی) آجر، یا کوئی ٹریڈ یونین بشمول اجتماعی سودا کاری کا ایجنٹ، جس کے سلسلے میں ہڑتال یا تالہ بندی کی کارروائی کی گئی ہو۔

(3) لیبر کورٹ درخواست موصول ہونے کے دس دن کے اندر، پیش ہونے والے فریقین کو سننے کے بعد فیصلہ کر سکتی ہے کہ آیا ہڑتال یا تالہ بندی دفعہ 122 کی خلاف ورزی ہے یا نہیں۔(4)اگر عدالت فیصلہ کرے کہ ہڑتال یا تالہ بندی ذیلی دفعہ (3) کے تحت غیر قانونی ہے، تو وہ ہڑتال ختم کرنے یا تالہ بندی ختم کرنے کا حکم دے سکتا ہے۔(5) اگر آجر لیبر کورٹ کے حکم کی خلاف ورزی کرے اور کورٹ کو یقین ہو جائے کہ تالہ بندی کے جاری رہنے کی وجہ سے عوام کو شدید مشکلات ہو رہی ہیں یا قومی مفاد کو نقصان پہنچ رہا ہے، تو وہ متعلقہ ادارے یا اداروں کے گروپ کو قرق کرنے اور ایک سرکاری وصول کنندہ مقرر کرنے کا حکم جاری کر سکتا ہے، جس مدت کے لیے وہ مناسب سمجھے اور جو وقتاً فوقتاً تبدیل بھی ہو سکتی ہے۔

(6) سرکاری وصول کنندہ انتظامیہ کے اختیارات استعمال کرے گا اور امور کی انجام دہی کے لیے ضروری تمام کام کرے گا یا نہ کرے گا، بشمول کارروائی چلانے کے لیے معاہدے کرنا، وصول شدہ تمام رقم کی جائز رسید دینا وغیرہ۔

(7) لیبر کورٹ سرکاری وصول کنندہ کی تعیناتی اور کام کی باقاعدہ تنظیم میں، مجموعہ ضابطہ دیوانی 1908 (5 بابت 1908) کے تحت دیوانی عدالت کے اختیارات استعمال کر سکتا ہے۔

(8) اگر ورکر لیبر کورٹ کے حکم کی سنگینی سے خلاف ورزی کریں ذیلی دفعہ (4) کے تحت، عدالت ہڑتال کرنے والے تمام یا کسی بھی ورکر کو برخاست کرنے کے احکامات جاری کر سکتی ہے۔ اور پنجاب لیبر کوڈ میں شامل کسی متضاد امر کے باوجود، اگر عدالت ایسی انکوائری کے بعد جو وہ مناسب سمجھے یہ فیصلہ کرے کہ کسی رجسٹرڈ ٹریڈ یونین نے اس خلاف ورزی کو کیا یا اس کی حمایت کی، تو اس فیصلے کا اثر یہ ہوگا کہ وہ خلاف ورزی کرنے والے یونین کے عہدیدار اپنے عہدوں کی باقی ماندہ مدت کے لیے عہدہ رکھنے سے محروم ہوں گے۔

(9) متاثرہ ورکر کو برخاستگی کے حکم کے بعد پندرہ دن کے اندر اگر اچھی اور معقول وجہ دکھائے، تو لیبر کورٹ اپنےحکم پر ذیلی دفعہ (8) کے تحت نظر ثانی کر سکتی ہے۔

(10) حکومت کی طرف سے اس حوالے سے بنائے گئے قواعد و ضوابط کے تابع، مذکورہ افسر ذیلی دفعہ (1) کے مقاصد کے لیے، اپنی تعیناتی کے مقامی دائرہ اختیار میں، اپنی معاونت میں پاکستان کی خدمت میں موجود افراد کے ساتھ کسی ایسے ادارے یا اداروں کے گروپ میں داخل ہو سکتا ہے جہاں اسے شبہ ہو کہ غیر قانونی ہڑتال یا تالہ بندی جاری ہےوہ وہاں موجود مقامات، پلانٹس، رجسٹرز کا معائنہ کر سکتا ہے، فوری یا بعد میں گواہوں کے بیانات حاصل کر سکتا ہے اور اس دفعہ کے مقاصد کے لیے ضروری دیگر اختیارات استعمال کر سکتا ہے۔

(11) اگر کسی غیر قانونی ہڑتال یا تالہ بندی کے فریق کو افسر یا لیبر کورٹ کے سامنے پیش ہونے کا کہا جائے اور وہ پیش نہ ہو، تو لیبر کورٹ پنجاب لیبر کوڈ کے تحت دیگر ممکنہ کارروائیوں کے علاوہ، یک طرفہ کارروائی کر سکتا ہے۔

129۔ مستقل اثاثوں کی منتقلی کی ممانعت:۔ (1) کوئی آجر غیر قانونی تالہ بندی یا غیر قانونی نہ ہونے والی ہڑتال کے دوران ادارے کے کسی بھی مستقل اثاثے کو منتقل نہیں کرے گا۔(2) لیبر کورٹ حفاظتی اقدامات کے تحت، ایسی شرائط لگا کر، سیلاب، آگ، آفت یا شہری فساد کی وجہ سے اثاثوں کو نقصان سے بچانے کے لیے ان اثاثوں کو محفوظ رکھنے کے لیے منتقل کرا سکتا ہے۔

130۔ باب 3 کا اطلاق:۔اگر کوئی مخصوص استثناء فراہم نہ کیا جائے، تو اس حصے کے احکامات کا اطلاق ہوگا:(اے) آجران بشمول ٹھیکیدار اور ملازمین؛ اور(بی)وہ دیگر افراد جو اس حصے میں ذکر کیے گئے ہوں اور جیسا کہ مقرر کیا جائے۔

131۔ تعریفات:۔باب ہذا میں:(اے) "قابل موازنہ کل وقتی ملازم"سے مراد وہ کل وقتی ملازم ہے جو اسی ادارے میں ہو، اور جس کا ملازمت کا معاہدہ یا تعلق اسی نوعیت کا ہو، جو وہی یا مماثل کام یا پیشہ انجام دے رہا ہو، جبکہ دیگر عوامل جیسے سنیارٹی، قابلیت اور مہارت کو بھی مناسب حیثیت دی جائے۔(بی)"کور آپریشنز" سے مراد وہ آپریشنز ہیں جو کسی ادارے کے کام کا لازمی جزو ہوں، جیسا کہ متعلقہ ادارہ محکمہ کو نوٹیفائی کرے؛(سی) "ملازمت ایجنسی" سے مراد وہ کمپنی، ایجنسی یا ٹھیکیدار ہے جو:(i) نوکری تلاش کرنے والوں کے لیے روزگار کا بندوبست کرے؛(ii) آجر کے لیے ملازمین کی بھرتی کرے، جن میں گھریلو ملازمین، گھر سے کام کرنے والے وغیرہ شامل ہوں؛ یا(iii) ورکرز فراہم کرے تاکہ وہ کسی پرنسپل کے ساتھ معاہدے کے تحت اس بنیاد پر کام کریں کہ:

(1) ملازمت ایجنسی ان ورکرز کا آجر ہو؛ اور

(2) پرنسپل ان ورکرز کا آجر نہ ہو؛(ڈی)"کام کے اوقات" سے مراد وہ مدت ہے جس کے دوران ملازم آجر کی خدمت میں ہو، وقفہ آرام کو چھوڑ کر جو کوڈ یا اس کے تحت بنائے گئے قواعد کی مقرر کردہ حدود کے اندر مقرر یا طے شدہ ہوں؛

(ای) "انٹرنل ورک ریگولیشنز" سے مراد وہ داخلی ضوابط ہیں جو کسی ادارے نے اپنے لیے ترتیب دیئے ہوں؛(ایف) "نوکری تلاش کرنے والا" سے مراد وہ شخص ہے جو ملازمت ایجنسی میں رجسٹرڈ ہو روزگار کی تلاش کے لیے، یا جسے روزگار کی پیشکش کی گئی ہو یا جس نے قبول کر لیا ہو، البتہ پاکستانی کے علاوہ دیگر افراد شامل نہیں؛(جی) "مائیکرو انٹرپرائز" ایسا ادارہ ہے جہاں دس سے کم ملازمین براہ راست یا کسی دوسرے شخص کے ذریعے کام کرتے ہوں، یا گزشتہ بارہ مہینوں کے دوران کسی بھی دن اس طرح ملازم رہے ہوں؛(ایچ) "کم از کم اجرت"سے مراد مختلف ملازمین کی اقسام کے لیے حکومت کی جانب سے وقتاً فوقتاً نوٹیفائی کردہ وہ کم از کم اجرت ہے جو آجر کو مقررہ مدت میں کام کرنے والے ملازمین کو ادا کرنی ہوتی ہے؛(آئی) "رات کےوقت ملازم" سے مراد وہ ملازم ہے جو مسلسل 24 گھنٹوں میں اوسطاً کم از کم تین گھنٹے رات کے وقت کام کرتا ہو؛(جے) "رات کےوقت کا کام" سے مراد وہ کام ہے جو رات 10 بجے سے صبح 6 بجے کے درمیان کیا جائے؛

مگرشرط یہ ہے کہ نوجوان ملازمین کے لیے شام 7 بجے سے صبح 8 بجے کے درمیان کام کو رات کا کام سمجھا جائے گا۔(کے) "اوور ٹائم" سے مراد وہ کام جو معمول کے کام کے اوقات سے زیادہ کیا جائے، جیسا کہ پنجاب لیبر کوڈ، اجتماعی معاہدہ یا آجر کے انٹرنل ورک ریگولیشنز میں بتایا گیا ہو، بشرطیکہ کوئی بھی معاہدہ یا انٹرنل ورک ریگولیشنز معمول کے کام کے گھنٹے یا اضافی وقت میں اضافہ کا باعث نہ بنیں۔(ایل) "عوامی روزگارکی فراہمی"سے مراد وہ دفتر، ایجنسی یا سروس ہے جو حکومت نے نوکری تلاش کرنے والوں کے لیے روزگار تلاش کرنے یا فراہم کرنے کی غرض سے قائم کی ہو اور برقرار رکھی ہو؛(ایم) "بھرتی کرنا" سے مراد وہ سرگرمیاں ہیں جو ملازمت ایجنسی انجام دیتی ہے، جن میں اشتہاری سرگرمیاں شامل ہیں، جو آجر اور نوکری تلاش کرنے والے کے درمیان درمیانی واسطے کا کردار ادا کرتی ہیں تاکہ روزگار کی تلاش، پیشکش یا حصول ممکن بنایا جا سکے؛(این) "ریلے اور شفٹ" سے مراد وہ نظام ہے جس میں ایک ہی نوعیت کا کام دن کے مختلف اوقات میں مختلف گروپوں کے ذریعے انجام دیا جاتا ہے، ہر گروپ کو "ریلے" کہتے ہیں، اور جس مدت کے لیے وہ کام کرے اسے "شفٹ" کہتے ہیں؛(او) "سیکیورٹی گارڈ" میں کوئی بھی گارڈ، چوکیدار یا وہ شخص شامل ہے جو افراد یا جائیداد کی حفاظت کے لیے ملازم ہو یا چوری یا ڈکیتی روکنے کا کام کرے؛(پی) "دکان" سے مراد وہ کوئی بھی جگہ ہے جو مکمل یا جزوی طور پر اشیاء کی تھوک یا خوردہ فروخت کے لیے استعمال ہو، نقد یا ادھار پر، یا جہاں صارفین کو خدمات فراہم کی جائیں، اور اس میں دفتر، اسٹور روم، گودام، ویئرہاؤس یا کام کی جگہ شامل ہے، خواہ وہ اسی عمارت میں ہو یا کہیں اور، جو بنیادی طور پر ایسی تجارت یا کاروبار کے سلسلے میں استعمال ہو؛(کیو) "تیسری پارٹی کاکنٹریکٹ ورکر" سے مراد وہ ورکر ہے جو ملازمت ایجنسی کی طرف سے فراہم کیا گیا ہو تاکہ وہ پرنسپل کے ساتھ معاہدے کے تحت اس بنیاد پر کام کرے کہ:(i) ملازمت ایجنسی ان ورکرز کا آجر ہو؛ اور(ii) پرنسپل ان ورکرز کا آجر نہ ہو۔

(2) باب ہذا میں بیان کردہ تمام اصطلاحات جن کا یہاں تعین نہیں کیا گیا، ان کا مفہوم پنجاب لیبر کوڈ کے حصہ اول میں دیے گئے معنی کے مطابق ہوگا۔

132۔ ملازمت کے تعلق کی موجودگی کا تعین:۔(1) پنجاب لیبر کوڈ کے مقاصد کے لیے ملازمت کے تعلق کی موجودگی کا تعین اور کسی معاہدے کو ملازمت کا معاہدہ قرار دینا بنیادی طور پر ان حقائق کی بنیاد پر کیا جائے گا جو کام کی انجام دہی اور ورکر کی اجرت سے متعلق ہوں، چاہے فریقین کے درمیان کسی متفقہ، معاہدتی یا غیر معاہدتی، مخالف تشریح کی گئی ہو۔

(2) پنجاب لیبر کوڈ کے مقاصد کے لیے، اگر کوئی شخص کسی ورکر کو ملازمت پر رکھتا ہے:

(اے) تو اس ورکر کو ٹھیکیدار یا خود مختار ورکر کے بجائے ملازم سمجھا جائے گا؛ اور(بی) اس شخص کو آجر سمجھا جائے گا؛

جب تک کہ وہ شخص درج ذیل تمام شرائط پوری کرنے کا ثبوت نہ دے دے کہ:(i) ورکر کام کی انجام دہی کے سلسلے میں آجر کے کنٹرول اور ہدایت سے آزاد ہے، کام کی انجام دہی کے معاہدے کے تحت بھی؛(ii) ورکر وہ کام انجام دیتا ہے جو آجر کے کاروبار کے معمول کے دائرے سے باہر ہے؛ اور(iii) ورکر عموماً آزاد طور پر قائم شدہ تجارت، پیشہ یا کاروبار میں مصروف ہو جو انجام دیے جانے والے کام کی نوعیت کے مماثل ہو۔

مگر شرط یہ ہے کہ ذیلی دفعہ (2) میں استعمال ہونے والا لفظ " مصروف" کا مفہوم دفعہ 8 میں دئیے گئے معنی کے برابر ہوگا۔

(3) کوئی بھی ورکر جو کام کے دوران یا آرام کے وقفے کے علاوہ کسی وقت کام کی جگہ پر پایا جائے، تاوقتیکہ اس کے برعکس کچھ ثابت نہ ہو، اس وقت کام کی جگہ پر ملازم سمجھا جائے گا۔

133۔ ملازم کی بطور ٹھیکیدار یا خود مختار جان بوجھ کر غلط درجہ بندی:۔ (1) آجر کسی ملازم یا ممکنہ ملازم کو یہ نہیں بتائے گا کہ ان کا ملازمت کا معاہدہ، سروسز کا معاہدہ ہے اور یہ کہ وہ ایک آزاد ٹھیکیدار یا خود مختار (سیلف ایمپلائڈ) ہیں۔

(2) ذیلی دفعہ (1) لاگو نہیں ہوگی اگر آجر یہ ثابت کر دے کہ جب یہ بیان دیا گیا تھا، تو اسے معقول وجوہات کی بنا پر یقین تھا کہ معاہدہ ملازمت کا معاہدہ نہیں ہے۔

(3) آجر کسی ملازم کو برطرف نہیں کرے گا، اور نہ ہی برطرفی کی دھمکی دے گا، تاکہ اسے ٹھیکیدار کے طور پر رکھ کر وہی یا بنیادی طور پر وہی کام سروسز کے معاہدے کے تحت کرایا جائے۔

اے۔ معاہدہ ہائے ملازمت

134۔ معاہدہ ہائے ملازمت کی اقسام:۔(1) روزگار کا معاہدہ درج ذیل میں سے کسی ایک صورت میں ہوگا:(اے) ایک مستقل روزگار کا معاہدہ؛ یا(بی)ایک معینہ مدت کا روزگار کا معاہدہ؛

(2) روزگار کا معاہدہ کل وقتی یا جز وقتی روزگار کے لیے طے کیا جا سکتا ہے۔

(3) جب تک کہ پنجاب لیبر کوڈ میں کچھ دیگرمذکور نہ ہو، اس حصے کا اطلاق تمام اقسام کے روزگار کے معاہدوں پر ہوگا۔

135۔ کل وقتی روزگار:۔ (1) ملازم اس وقت کل وقتی ملازمت پر تصور کیا جائے گا جب اس کے معمول کے اوقات کار یومیہ آٹھ گھنٹے اور ہفتہ وار اڑتالیس گھنٹے ہوں۔(2) اجتماعی معاہدہ، ورکس کونسل اور آجر کے مابین کیا گیا معاہدہ، ملازمت کا معاہدہ، یا انٹرنل ورک ریگولیشنز کل وقتی کام کے ایسے ہفتہ وار اوقات کار مقرر کر سکتے ہیں جو اڑتالیس گھنٹوں سے کم ہوں۔

136۔ جز وقتی روزگار:۔ (1) ملازم اس وقت جزوقتی ملازمت پر تصور کیا جائے گا جب اس کے یومیہ یا ہفتہ وار اوقات کار کسی مماثل کل وقتی ملازم کے اوقات کار سے کم ہوں۔(2) جزوقتی ملازمت کا معاہدہ کرتے وقت، ملازم کو اپنے آجر کو ان دیگر آجرین کے ساتھ موجودہ جزوقتی معاہدوں سے مطلع کرنا ہوگا۔(3) ذیلی دفعات (4) سے (6) کے تابع، ملازمت کی شرائط کے حوالے سے، جزوقتی ملازمین کو صرف اس وجہ سے کم تر سلوک کا نشانہ نہیں بنایا جائے گا کہ وہ جزوقتی کام کرتے ہیں، جب تک کہ مختلف سلوک کی کوئی معروضی وجوہات نہ ہوں۔(4) پنجاب لیبر کوڈ کے تحت اجرت، بونس اور دیگر الاؤنسز طے شدہ کام کے اوقات کے تناسب سے "پرو ریٹا ٹیمپوریس" (یعنی وقت کے تناسب سے) اصول کے تحت دیے جائیں گے۔(5) جزوقتی ملازم کو درج ذیل معاملات میں کل وقتی ملازمین کے مساوی تحفظ حاصل ہوگا:(اے) تنظیم سازی، اجتماعی سودا کاری، اور ملازمین کے نمائندوں کے طور پر کام کرنے کا حق؛(بی) پیشہ ورانہ صحت و سلامتی؛ اور(سی) ملازمت اور پیشے میں امتیاز۔

(6) جزوقتی ملازم کو درج ذیل شعبوں میں کل وقتی ملازمین کے مساوی شرائط حاصل ہوں گی:(اے) زچگی کا تحفظ؛(بی) ملازمت کا خاتمہ؛(سی) تنخواہ کے ساتھ سالانہ تعطیلات اور سرکاری تعطیلات؛ اور(ڈی) بیماری کی چھٹی اور اتفاقیہ رخصت:مگرشرط یہ ہے کہ مالیاتی حقوق کام کے گھنٹوں کے تناسب سے متعین کیے جائیں گے۔

(7) آجر یہ یقینی بنائے گا کہ جز وقتی ملازم کے لیے وہی کام کرنے کی شرائط ہوں جو کل وقتی ملازم کے لیے ہیں، بشرطیکہ ان کے پاس وہی یا ایک جیسا پیشہ ورانہ علم اور مہارت ہو اور وہ وہی یا ایک جیسا کام انجام دے رہے ہوں۔

(8) آجر کسی ایسے ملازم کی درخواست پر غور کر سکتا ہے جو کل وقتی معاہدۂ ملازمت کا فریق ہو اور جز وقتی معاہدے میں تبدیل ہونے کی درخواست کرے، اور کسی ملازم کی درخواست پر بھی جو جز وقتی معاہدے کا فریق ہو اور کل وقتی معاہدے میں تبدیل ہونے کی درخواست کرے، اور آجر درخواست کو اس صورت میں مسترد نہیں کرے گا جب تک کہ اس کے پاس اس کے مسترد کرنے کے لیے معقول کاروباری وجوہات نہ ہوں۔

137۔ مستقل معاہدۂ ملازمت:۔ (1) ایک مستقل روزگار کا معاہدہ وہ معاہدہ ہوگا جس میں دونوں فریقین مدت یا معاہدے کے خاتمے کی تاریخ طے نہیں کرتے۔(2) ایک روزگار کا معاہدہ مستقل روزگار کا معاہدہ سمجھا جائے گا، جب تک کہ پنجاب لیبر کوڈ میں بصورت دیگر تعین نہ کیا گیا ہو۔(3) اگر روزگار کے معاہدے میں اس مدت کا ذکر نہ ہو جس کے لیے یہ طے کیا گیا تھا، تو اسے مستقل روزگار کا معاہدہ سمجھا جائے گا۔

138۔ معینہ مدت کی ملازمت کا معاہدہ:۔ (1) معینہ مدت کی ملازمت کا معاہدہ ایسا روزگارمعاہدہ ہوگا جس کی مدت یا اختتام درج ذیل طریقوں سے متعین ہو:(اے) کسی مخصوص تاریخ کے آ جانے پر؛(بی) کسی مخصوص کام یا منصوبے کی تکمیل پر؛ یا(سی) کسی مخصوص واقعے کے رونما ہونے پر۔

(2) معینہ مدت کا ملازمت کا معاہدہ اس وقت کیا جا سکتا ہے جب اس کی مدت اور خاتمہ پہلے سے معروضی وجوہات کے تحت ذیلی دفعہ (3) کے مطابق طے کر لیا گیا ہو۔

(3) معروضی وجوہات جن کی بنیاد پر معینہ مدت کا ملازمت کا معاہدہ کیا جا سکتا ہے، اور جو اس معاہدے میں درج ہونی چاہئیں، ان میں شامل ہوں گی:(اے) کسی عارضی طور پر غیر حاضر ملازم کا متبادل مقرر کرنا؛ یا(بی)ایسا کام جس کی مدت اس کے نوعیت کے مطابق ایک وقت کی حد سے مشروط ہو، یا جو کسی خاص کام یا پروجیکٹ سے متعلق ہو، یا کسی خاص واقعے کے وقوع پذیر ہونے سے جڑا ہو۔

(4) معینہ مدت ملازمت کا معاہدہ کسی ایسے کام کے لیے نہیں کیا جائے گا جو مستقل نوعیت کا ہو۔

(5) معینہ مدت ملازمت کا معاہدہ مستقل ملازمت کے معاہدے میں تبدیل تصور کیا جائے گا اگر:(اے) اس کا مقصد یا نتیجہ کسی ایسے عہدے کو مستقل طور پر پر کرنا ہو جو ادارے کی بنیادی سرگرمیوں سے متعلق ہو؛ یا(بی) یہ معاہدہ ذیلی دفعات (7) اور (8) میں دی گئی مدت سے طویل ہو؛ یا

(سی) اسے دو سے زائد مسلسل مدتوں کے لیے تجدید کیا گیا ہو۔

(6) معینہ مدت کا ملازمت کا معاہدہ ہو سکتا ہے:(اے) عمومی معینہ مدت کا ملازمت کا معاہدہ؛ یا(بی) خصوصی منصوبے سے متعلق معینہ مدت کا معاہدہ۔

(7) عمومی معینہ مدت کا ملازمت کا معاہدہ درج ذیل صورتوں میں مکمل کیا جا سکتا ہے، اور ان صورتوں کا ذکرروزگار معاہدے میں ہونا لازمی ہے:(اے) عارضی کام کی مدت کے لیے، جو تین ماہ تک ہو؛(بی) سیزنل کام کی انجام دہی کے لیے، جب قدرتی حالات کے باعث کام صرف کسی مخصوص مدت یا موسم میں ممکن ہو؛ اور(سی) غیر حاضر ملازمین کا عارضی متبادل۔

(8) خصوصی منصوبے سے متعلق معینہ مدت کا معاہدۂ ملازمت کسی ملازم کے ساتھ نہیں کیا جائے گا ماسوائے ان صورتوں کے جہاں ملازم کو کم از کم اجرت کے پانچ گنا کے برابر معاوضہ دیا جائے۔

(9) خصوصی منصوبے سے متعلق معینہ مدت کا ملازمت کا معاہدہ درج ذیل صورتوں میں کیا جا سکتا ہے:(اے) کسی مخصوص کام کے لیے مہارت یافتہ خدمات جیسے کہ تعمیر نو، تنصیب، کمیشننگ اور دیگر کام؛(بی) ایسے افراد کے ساتھ جو ایسی تنظیموں میں ملازمت اختیار کریں جو کسی مقررہ مدت یا مخصوص کام کے لیے قائم کی گئی ہوں، مثلاً: سرکاری گرانٹس، فلاحی فنڈنگ یا وقت مقررہ منصوبہ جاتی کام؛(سی) ایسے افراد کے ساتھ جو کسی مخصوص کام کے لیے رکھے جائیں، جہاں تکمیل کسی مخصوص تاریخ سے مشروط نہ ہو، مثلاً: مشاورتی خدمات؛ اور(ڈی) دیگر صورتیں، جو پنجاب لیبر کوڈ یا دیگر قابل اطلاق قوانین میں فراہم کی گئی ہوں۔

139۔ معینہ مدت کی ملازمت کے معاہدے کی تجدید اور مدت:۔ (1) معینہ مدت کے ملازمت کے معاہدے کی مزید دو مسلسل مدتوں کے لیے تجدید کی جا سکتی ہے۔ تاہم، شرائط و ضوابط گزشتہ معاہدے سے کم نہیں ہوں گی۔(2) معینہ مدت کے ملازمت کے معاہدے اس صورت میں مسلسل تصور کیے جائیں گے اگر وہ ایک معاہدے اور دوسرے کے درمیان بغیر تعطل کے یا ایسے تعطل کے ساتھ کیے جائیں جو تین ماہ سے زیادہ نہ ہو۔(3) ایک عمومی معینہ مدت کے ملازمت کے معاہدے کی زیادہ سے زیادہ مدت تین ماہ ہوگی:مگر شرط یہ ہے کہ تین مسلسل عمومی معینہ مدت کے ملازمت کے معاہدوں کی مجموعی مدت نو ماہ سے زیادہ نہ ہو۔(4) کسی خصوصی منصوبے کے معینہ مدت کے ملازمت کے معاہدے یا مسلسل خصوصی منصوبے کے معینہ مدت کے ملازمت کے معاہدے کی زیادہ سے زیادہ مدت پانچ سال سے زائد نہ ہوگی۔

140۔ معینہ مدت کے معاہدۂ ملازمت والے افراد کے ساتھ مستقل معاہدۂ ملازمت والے افراد کی نسبت کم تر سلوک نہیں کیا جائے گا:۔ ملازمت کی شرائط کے حوالے سے، معیّنہ مدت کے ملازمت کے معاہدے پر کام کرنے والے ملازمین کے ساتھ صرف اس بنیاد پر کہ ان کا معیّنہ مدت کا ملازمت کا معاہدہ یا تعلق ہے، ایسے قابل موازنہ ملازمین کے مقابلے میں جو مستقل ملازمت کے معاہدے پر کام کرتے ہیں، کم موافق سلوک نہیں کیا جائے گا، الا یہ کہ مختلف سلوک کی کوئی معروضی بنیادوں پر معقول وجہ ہو۔

141۔ ملازمت کے معاہدے کی صورت:۔ (1) ملازمت کا معاہدہ زبانی یا تحریری ہو سکتا ہے۔(2) اگر ملازمت کا معاہدہ زبانی یا جزوی زبانی اور جزوی تحریری ہو، تو ملازمت کی کسی مبینہ شرط کے موجود یا غیر موجود ہونے کا ثبوت دینے یا اس کی تردید کرنے کی ذمہ داری آجرپر ہو گی۔(3) ملازمت کا معاہدہ تحریری ہوگا، سوائے اس کے کہ یہ ایک مہینے سے زائد مدت کے لیے نہ ہو:بشرطیکہ اگر ملازمت کا معاہدہ تحریری صورت میں نہ ہو، تو اس سے معاہدے کی قانونی حیثیت متاثر نہیں ہوگی۔(4) ملازمت کا معاہدہ دو نقول میں تیار کیا جائے گا، جن میں سے ایک آجر اور ایک ملازم کے لیے نقل ہو گی۔(5) آجر ملازمت کے آغاز سے قبل ملازم کو ملازمت کے معاہدے کی ایک نقل فراہم کرے گا۔(6) اگر آجر ملازمت کا معاہدہ تحریری صورت میں فراہم کرنے میں ناکام رہتا ہے، تو اس سے معاہدے کی موجودگی اور قانونی حیثیت متاثر نہیں ہوگی۔(7) آجر کسی بھی تبدیلی کو ملازمت کی شرائط میں ایسی تبدیلی کے سات دن کے اندر تحریری طور پر ملازم کو مطلع کرے گا۔

142۔ معاہدۂ ملازمت کے مندرجات:۔(1) ملازمت کا معاہدہ ایسے تمام نکات پر مشتمل ہوگا جو فریقین کے حقوق و فرائض کی وضاحت کے لیے ضروری ہوں، اور ہر حال میں اس میں درج ذیل شامل ہوں گے:(اے) آجر کا نام، پتہ، اور وہ مکمل نام اور عہدہ جس شخص نے آجر کی طرف سے معاہدہ کیا؛(بی) ملازم کا مکمل نام، تاریخ پیدائش، جنس، رہائش، کمپیوٹرائزڈ قومی شناختی کارڈ نمبر یا پاسپورٹ نمبر؛(سی) کام کرنے کی جگہ؛ اگر کوئی مقررہ یا بنیادی جگہ نہ ہو تو کاروبار کی رجسٹرڈ جگہ؛(ڈی) ملازمت کا عنوان، کام کی نوعیت یا کیٹیگری جس کے لیے ملازم کو رکھا گیا ہو، اور ملازم کی انجام دہی کے لیے دیے گئے کام کی تفصیل؛(ای) ملازمت کے رشتے کے آغاز کی تاریخ؛(ایف) اگر معیّن مدت کا روزگارمعاہدہ ہو، تو اس کی اختتامی تاریخ یا متوقع مدت؛(جی) آزمائشی مدت کا دورانیہ اور شرائط؛(ایچ) کام کے اوقات اور آرام کے وقفے، بشمول ہفتہ وار تعطیل؛(آئی) ملازم کو دی جانے والی سالانہ تنخواہ والی چھٹیاں، اتفاقیہ اور بیماری کی چھٹیاں؛(جے) آجر اور ملازم کی جانب سے ملازمت کے تعلق کے خاتمے کی صورت میں اپنایا جانے والا طریق، بشمول رسمی تقاضے اور نوٹس کی مدت؛(کے) معاوضہ، جس میں بنیادی رقم، دیگر اجزاء (اگر قابل اطلاق ہوں) کو علیحدہ علیحدہ ظاہر کیا جائے، اور تنخواہ کی ادائیگی کا طریق اور وقفہ؛(ایل) اگر آجر اور ملازم پہلے سے سوشل انشورنس، سوشل سیکیورٹی اور ای او بی آئی میں رجسٹرڈ ہیں، تو ان کی رجسٹریشن کی تفصیلات؛(ایم) معاہدے کے خاتمے سے متعلق کوئی شق جو اس پنجاب لیبر کوڈ کے علاوہ ہو؛(این) انٹرنل ورک ریگولیشنز اور ڈسپلنری قواعد کا حوالہ جو ملازم پر لاگو ہوں۔

(2) ملازمت کا معاہدہ کچھ نکات کے لیے دیگر دستاویزات کا حوالہ دے سکتا ہے، لیکن ایسی دستاویزات ملازم کو دستیاب کی جائیں گی۔(3) ملازمت کے معاہدے کے مندرجات کو ہر ملازم کو سادہ مقامی زبان میں زبانی طور پر سمجھایا جائے گا۔(4) آجر ملازم کی ملازمت کے دوران ملازمت کے تحریری معاہدے کی ایک نقل اپنے پاس رکھے گا۔

143۔ ملازمت کا کارڈ:۔ ہر ملازم کو ایک ملازمت کارڈ دیا جائے گا جس میں نام، پرسنل نمبر، تصویراور عہدہ درج ہوگا، اور ملازم اسے کام کے اوقات میں نمایاں رکھے گا۔

144۔ آزمائشی مدت:۔ (1) ملازمت کے معاہدے میں آزمائشی مدت کی ایک شق شامل ہو سکتی ہے جو کسی بھی صورت میں تین ماہ سے زیادہ نہ ہو۔(2) اگر ملازمت کا معاہدہ معیّن مدت کے لیے کیا گیا ہو، تو آزمائشی مدت کی مدت معاہدے کی متوقع مدت اور ملازم کے کام کی نوعیت کے مطابق متناسب ہوگی۔(3) آزمائشی مدت کے دوران، ملازمت کا معاہدہ کسی بھی وقت بغیر نوٹس کے کسی بھی فریق کی جانب سے ختم کیا جا سکتا ہے۔(4) اگر آجر آزمائشی مدت کے دوران واضح طور پر معاہدہ ختم نہ کرے اور مدت ختم ہو جائے بغیر کسی نوٹس کے، تو یہ اخذ کیا جائے گا کہ ملازم نے آزمائشی مدت کامیابی سے مکمل کر لی ہے۔(5) جس معاہدے میں آزمائشی مدت کامیابی سے مکمل ہو چکی ہو، اس کے ختم ہونے کے بعد، آجر اسی کام کے لیے نئے معاہدے میں دوبارہ آزمائشی مدت کا تقاضا نہیں کر سکتا۔(6) اگر آزمائشی مدت کامیابی سے مکمل ہو جائے تو وہ ملازم کی کل ملازمت کی مدت کا حصہ سمجھی جائے گی۔

بی۔انٹرنل ورک ریگولیشنز

145۔ انٹرنل ورک ریگولیشنز:۔ (1) ذیلی دفعہ (4) کے تابع، آجر معاوضہ، کام کی تنظیم، پیشہ ورانہ حفاظت اور صحت، اور دیگر ملازمین کے لیے اہم امور کو منظم کرنے کے لیے انٹرنل ورک ریگولیشنزاپنا سکتا ہے اور شائع کر سکتا ہے۔(2) انٹرنل ورک ریگولیشنزکا مواد درج ذیل کے منافی نہیں ہوگا:(اے) پنجاب لیبر کوڈ اور اس کے تحت بنائے گئے کوئی بھی قواعد؛(بی) کوئی قابل اطلاق اجتماعی معاہدہ؛(سی) پنجاب لیبر کوڈ کے تحت متعلقہ اتھارٹی یا عدالت کا کوئی بھی فیصلہ یا ایوارڈ؛ اور(ڈی)یا دیگر متعلقہ قانونی دفعات۔

(3) انٹرنل ورک ریگولیشنزمیں دیگر امور کے علاوہ درج ذیل اہم نکات شامل ہوں گے:(اے) کام کے اوقات، آرام کے اوقات، تعطیلات، اور ادائیگی کے دن؛(بی) کام کی جگہ پر انضباط، بشمول حاضری اور دیر سے آنے جیسے افعال اور غفلتیں؛(سی)شفٹ ورک؛(ڈی)پیشہ ورانہ حفاظت اور صحت کے ساتھ حفاظت اور صحت کے نمائندوں اور کمیٹی کے انتخابات؛(ای)کام کی جگہ پر تشدد اور ہراسانی کے خلاف اقدامات؛(ایف)آجر کے اثاثوں، ٹیکنالوجی اور کاروباری رازوں اورانٹلکچوئل پراپرٹی کی حفاظت؛(جی) انٹرنل ورک ریگولیشنزکی خلاف ورزیاں اور انضباطی اقدامات؛(ایچ) مال کو نقصان یا اس کے ضیاع کی صورت میں مادی ذمہ داری؛(آئی) وہ شخص جس میں انضباطی اقدامات کرنے کی اہلیت ہو؛ اور(جے) ناکارہ، سست، لاپرواہ یا فضول کام کرنا۔

(4) آجر انٹرنل ورک ریگولیشنزکا مسودہ دفعہ 100 کے تحت منتخب اجتماعی سودا کاری کے ایجنٹ یا ایجنٹس کو مشاورت کے لیے ارسال کرے گا، اور اگر اجتماعی سودا کاری کا ایجنٹ موجود نہ ہو تو آجر ورکس کونسل سے مشورہ کرے گااور مشاورت مسودے کی وصولی کے 21 دنوں کے اندر مکمل کی جائے گی۔(5) جب آجر اور اجتماعی سودا کاری کے ایجنٹ یا ورکس کونسل کے درمیان معاہدہ ہو جائے یا 21 یوم گزر جائیں، جو بھی پہلے ہو، آجر چیف انسپکٹر کو انٹرنل ورک ریگولیشنزمنظوری کے لیے بھیجے گا، ساتھ ہی اس معاہدے کی نقل بھی بھیجے گا۔ اگر انٹرنل ورک ریگولیشنز کا کوئی حصہ ذیلی دفعہ (2) کے خلاف پایا جائے، تو انسپکٹر تیس یوم میں آجر کو اطلاع دے کر قواعد میں ترمیم اور دوبارہ جمع کرانے کی ہدایت دے گا:مگر شرط یہ ہے کہ اگر آجر چیف انسپکٹر کی رائے سے متفق نہ ہو تو آجر تیس یوم کے اندر لیبر کورٹ میں اپیل دائر کر سکتا ہے۔(6) ملازمین کو انٹرنل ورک ریگولیشنزسے آگاہ کیا جائے گا، اہم نکات کام کی جگہ پر لگائے جائیں گے، اور قواعد کی نقل کاغذ پر یا الیکٹرانک ذرائع سے فراہم کی جائے گی بشرطیکہ معلومات ملازم کے لیے قابل رسائی ہو، محفوظ کی جا سکے، پرنٹ کی جا سکے، اور آجر کے پاس اس کے ثبوت ہوں۔

سی۔ ملازمت کا خاتمہ اور تادیبی اقدامات

146۔ ملازمت کے معاہدے کا خاتمہ:۔(1) روزگار کا معاہدہ مندرجہ ذیل طریقوں میں سے کسی ایک طریقے سے ختم کیا جا سکتا ہے:(اے) دونوں فریقوں کا روزگار کے معاہدے کو ختم کرنے پر اتفاق؛(بی)معینہ مدت کے روزگار کے معاہدے کی صورت میں:(i)معاہدے میں متعین مدت پوری ہو جائے؛(ii) وہ مخصوص کام جس کے لیے ملازم کو ملازمت دی گئی تھی مکمل ہو جائے؛(iii) کسی مخصوص واقعہ کا وقوع پذیر ہونا جیسے غیرحاضر ملازم کا واپس آنا، جس کی جگہ پر معین مدت کا روزگار معاہدہ کیا گیا تھا؛(سی)کسی فریق کا انتقال یا عدالت کی طرف سے اسے قانونی طور پر ناتواں قرار دینا؛ اور(ڈی)ملازم کا استعفیٰ دینا۔

(2) ذیلی دفعہ (1) کے علاوہ، اور ذیلی دفعات (3) سے (6) کے تابع، اگر ملازم کی کام کرنے کی اہلیت، برتاؤ، یا ادارے کی آپریشنل ضروریات کی بنیاد پر جائز وجہ ہو تو آجر ملازم کا معاہدہ ختم کر سکتا ہے۔ جائز وجوہات میں شامل ہیں:(اے) ملازم کا 10 دن سے زیادہ بغیر کسی اطلاع کے غیرحاضر رہنا؛(بی)ملازم کا کام اب کسی کو کرنے کی ضرورت نہ ہو، جیسے کہ غیر ضروری ہونے کی صورت میں، جیسا کہ ذیلی دفعہ ‎149 میں بیان کیا گیا ہے؛ یا(سی)سنگین بدعملی، جیسا کہ دفعہ ‎151 میں بیان کیا گیا ہے؛(ڈی)ناقص کارکردگی؛ یا(ای)آزمائشی مدت کی ناکام تکمیل۔

(3) روزگار کا معاہدہ ختم نہیں کیا جائے گا، نہ ہی کسی ملازم کو ملازمت سے ہٹایا جائے گا، اس کی چھانٹی کی جائے گی، اسے فارغ کیا جائے گا یا برخاست کیا جائے گا، سوائے ایک تحریری حکم کے جس میں کی گئی کارروائی کی وجہ کو واضح طور پر بیان کیا گیا ہو۔

(4) ملازم کے رویے یا کارکردگی سے متعلق وجوہات کی بنا پر ملازم کا روزگار کا معاہدہ ختم نہیں کیا جائے گا جب تک کہ ملازم کو ان الزامات کا دفاع کرنے کا موقع نہ دیا جائے، سوائے اس کے کہ آجر سے یہ توقع کرنا معقول نہ ہو کہ وہ یہ موقع فراہم کرے۔

(5) ناقص کارکردگی کی وجہ سے معاہدہ تبھی ختم کیا جا سکتا ہے جب آجر نے ملازم کو مناسب ہدایات اور تحریری وارننگ دی ہو اور بہتری کے لیے معقول وقت گزرنے کے بعد بھی کارکردگی ناقص رہے۔

(6) کسی بھی وجہ سے معاہدہ ختم ہونے پر، ملازم کی کمائی ہوئی تنخواہ اور دیگر واجبات، بشمول غیر استعمال شدہ سالانہ رخصت کی ادائیگی، معاہدے کے ختم ہونے کے دن سے دوسرے کام کے دن ختم ہونے سے پہلے ادا کی جائے گی۔

(7) اگر کسی ملازم کو معاہدۂ ملازمت کے خاتمے، یا ملازمت سے ہٹائے جانے، چھانٹی، فراغت یا برخاستگی سے متاثر ہو، تو ملازم دفعہ ‎335 کی ذیلی دفعہ (6) کے مطابق داد رسی حاصل کر سکتا ہے، اور اس کے بعد دفعہ ‎335 کی ذیلی دفعات (6) تا (9) کے احکامات کا اطلاق ہو گا۔

(8) اگر آجر کسی ملازم کو کام کی انجام دہی کے لیے کام کی جگہ تک رسائی اور اس میں داخل ہونے سے یا کسی بھی طریقے سے حاضری لگانے سے روکے، سوائے سنگین بدسلوکی کے، تو ملازم اس واقعے کے پانچ دن کے اندر علاقہ انسپکٹر کے دفتر میں تحریری طور پر شکایت درج کر سکتا ہے اور اس صورت میں آجر کسی بھی کارروائی سے باز رہے گا۔ انسپکٹر کو اس شکایت پر 21 دن کے اندر کارروائی کرنی ہوگی جیسا کہ قواعد میں متعین ہے:مگر شرط یہ ہے کہ انسپکٹر کے سامنے کارروائی کا وقت دفعہ 335 کے تحت شمار نہ کیا جائے۔

147۔ روزگار کے خاتمے کے لیے ممنوع وجوہات:۔(1) مندرجہ ذیل، اور دیگر ایسی وجوہات، روزگار کے خاتمے کے لیے جائز نہیں ہوں گی:(اے) ٹریڈ یونین کی رکنیت یا غیر رکنیت؛(بی)کام کے اوقات کے علاوہ یا آجر کی رضامندی سے کام کے اوقات میں یونین کی سرگرمیوں میں شرکت؛(سی)ٹریڈ یونین یا ورکر کے نمائندے کے طور پر دفتر کے عہدے کے لیے درخواست دینا یا اس عہدے میں کام کرنا یا کام کر چکا ہونا؛(ڈی)شکایت درج کرانا یا کسی آجر کے خلاف کارروائیوں میں حصہ لینا جس میں قوانین یا ضوابط کی خلاف ورزی کا الزام ہو یا کسی مجاز انتظامی اتھارٹی سے رجوع کرنا؛(ای)کسی بھی ممنوعہ امتیازی وجوہات کی بنا پر، جیسا کہ پنجاب لیبر کوڈ کے باب 2.4 میں بیان کیا گیا ہے؛(ایف)قانونی چھٹیوں کے دوران کام سے غیر حاضری بشمول عِدت کی چھٹی اور دوران زچگی چھٹی؛(جی) قانونی بیماری کی چھٹی کے دوران کام سے عارضی غیر حاضری؛(ایچ) دفعہ ‎67 اور دفعہ ‎153 کے تحت حقوق کا استعمال؛ اور(آئی) قانونی ہڑتال میں شرکت۔

(2) ملازم کے خلاف اس مدت کے دوران کوئی انضباطی اقدام نہیں کیا جائے گا جب:(اے) ملازم بیماری یا صحت یابی کے حوالے سے چھٹی پر ہو؛ یا آجر کی رضامندی سے کسی اور قسم کی چھٹی پر ہو؛(بی)ملازم حاملہ ہو یا حمل سے متعلق کسی پیچیدگی میں مبتلا ہو، یا وہ دوران زچگی چھٹی پر ہو، یا ملازم پدری چھٹی پر ہو۔

148۔ جبری برطرفی کے مترادف صورتِ حال:۔ (1) ملازم اس وقت بغیر نوٹس کے یا اس مدت سے کم نوٹس کے ساتھ، جس کا آجر کو کسی قانونی شق یا معاہدے کی شرط کے تحت حق حاصل ہو، ملازمت کا معاہدہ ختم کرنے کا مجاز ہے جب آجر کے طرزِ عمل نے ملازم کے لیے ملازمت کا رشتہ جاری رکھنا غیر معقول بنا دیا ہو۔

(2) ملازم پر لازم ہو گا کہ وہ وجہ بیان کرے جس کی بنا پر ملازمت جاری رکھنا غیر معقول ہو گیا۔

(3) جبری برطرفی کے مترادف ملازمت کے خاتمے کی شکایت پر کسی بھی سماعت یا کارروائی میں، لیبر کورٹ ملازم کے طرزِ عمل اور اس بات کو مدِنظر رکھے گی کہ آیا ملازم نے آجر کے طرزِ عمل کا معاملہ آجر کے ساتھ حل کرنے کی کوشش کی تھی یا نہیں، قبل اس کے کہ وہ ملازمت چھوڑے۔

149۔ ضرورت سے زیادہ ملازمین ہونے کی بنیاد پر ملازمت کا خاتمہ:۔ (1) دفعہ ہذا میں:

"بندش" میں ملازمین کو 28 دن سے زائد مدت کے لیے لے آف کرنا شامل ہے، جس کے نتیجے میں کسی ادارے کی بندش ہو، لیکن وہ لاک آؤٹ شامل نہیں جو پنجاب لیبر کوڈ کے باب 2.6 کے مطابق اعلان کردہ، شروع کیا گیا یا جاری رکھا گیا ہو؛

"اضافی "سے مراد ایک یا ایک سے زیادہ ملازمین کی ملازمت کا خاتمہ ہے، جو ملازمین کی تعداد میں کمی، کاروبار کی تنظیمِ نو، منتقلی، بندش یا کاروبار میں کمی کی وجہ سے ہو۔ اس میں معاشی، تکنیکی، یا سٹرکچرل وجوہات شامل ہیں، جیسے کہ دیوالیہ پن، تحلیل، بندش، یا کاروبار کا خاتمہ۔(2) دفعہ ہذا اُن آجرین پر لاگو ہوتی ہے جو 50 سے زائد ملازمین کو ملازمت دیتے ہیں۔

(3) ذیلی دفعہ (6) کے تابع، اگر کوئی آجر ملازمین کی دس فیصد یا اس سے زائد تعداد کو اضافی ملازم کی بنیاد پر ملازمت سے نکالنے کی تجویز رکھتا ہو، تو اُسے چاہیے کہ وہ ملازمت ختم کرنے سے پہلے متعلقہ ادارے یا اداروں کے اجتماعی سودا کاری کے ایجنٹس، یا ان کی غیر موجودگی میں ورکس کونسل کو بروقت مطلع کرے اور ان سے نیک نیتی سے مشورہ کرے۔ اس مشورے کا مقصد ان ملازمین پر اثرات کو کم کرنا ہے جو اس ریڈنڈنسی کا نشانہ بننے والے ہوں۔

(4) ملازمین کے نمائندوں کو تعمیری تجاویز پیش کرنے کے قابل بنانے کے لیے، آجرین کو مشاورت کے دوران بروقت:

(اے) ان کو تمام متعلقہ معلومات فراہم کرنی ہوں گی؛ اور

(بی) بہر صورت تحریری طور پر درج ذیل امور سے مطلع کرنا ہو گا: (i) متوقع ریڈنڈنسیوں کی وجوہات؛

 (ii) ان ملازمین کی تعداد اور اقسام جنہیں اضافی قرار دیا جانا ہے؛

 (iii) عام طور پر ملازمت میں موجود ملازمین کی تعداد اور اقسام؛

 (iv) وہ مدت جس میں یہ متوقع ریڈنڈنسیاں عمل میں لائی جائیں گی؛

 (v) اضافی ملازمین کے انتخاب کے لیے تجویز کردہ معیار؛ اور

 (vi) ریڈنڈنسی کی ادائیگیوں کے حساب کا طریق۔

(5) وہ آجر جو ذیلی دفعہ (4) کے تحت ملازمین کو ملازمت سے نکالنے کی تجویز رکھتا ہو، اُس پر لازم ہو گا کہ پندرہ دن کے اندر، مگر ہر صورت ملازمین کی برطرفی سے پہلے، محکمہ کو مطلع کرے۔

(6) اگر کسی شدید صوبائی بحران کی صورتحال پیدا ہو، جیسے کہ وباء، قدرتی آفت، شدید معاشی گراوٹ، تو ایسا آجر جو ملازمین کے 25 فیصد تک کو برطرف کرنے کا خواہاں ہو، اُسے اس مقصد کے لیے مجاز انسپکٹر سے اجازت حاصل کرنا لازم ہو گا اور اگر آجر ملازمین کے 25 فیصد سے زائد کو برطرف کرنے کا ارادہ رکھتا ہو، تو اُسے لازماً لیبر کورٹ سے پیشگی اجازت حاصل کرنی ہو گی۔

(7) لیبر کورٹ ذیلی دفعہ (5) کے تحت ریڈنڈنسی کا مقدمہ موصول ہونے کے تیس یوم کے اندر، مکمل انکوائری کے بعد فیصلہ کرے گی۔

(8) اگر کوئی آجر دفعہ ہذا پر عملدرآمد میں ناکام رہے، تو کسی ورکر کا نمائندہ دفعہ 349 کے تحت صنعتی تنازعہ کا آغاز کر سکتا ہے۔

(9) جب کسی ملازم کو نکالاجانا ہو، اور وہ کسی مخصوص درجہ بندی سے تعلق رکھتا ہو، تو آجر اُس ملازم کا معاہدہ ختم کرے گا جو اس کیٹیگری میں سب سے آخر میں ملازمت پر رکھا گیا ہو یعنی "آخر میں آنے والا، پہلے جائے"۔

(10) اگر کسی ملازم کی برطرفی کے ایک سال کے اندر دوبارہ کوئی نئی ملازمت کا موقع پیدا ہوتا ہے، تو آجر ان افراد پر غور کرے گا جنہیں پہلے اضافی قرار دیا گیا تھا، اور انہیں اس ملازمت کے موقع سے مطلع کرے گا، جیسا کہ قاعدے میں بیان کیا گیا ہے۔ اگر آجر ایسا کرنے میں ناکام رہے، تو یہ پنجاب لیبر کوڈ کی خلاف ورزی شمار ہو گی۔

(11) سیزنل اداروں کے معاملے میں، اگر کوئی ورکر ایک سیزن میں فارغ کر دیا گیا ہو اور اگلے سیزن میں کام کی بحالی کے دس یوم کے اندر دوبارہ ڈیوٹی پر حاضر ہو جائے، تو آجر اُسے ملازمت میں ترجیح دے گا۔ آجر ایسے ملازم کو ذیلی دفعہ (9) کے تحت مطلع کرنے کا پابند ہو گا۔

150۔ ملازمت کے معاہدوں کے خاتمے کا نوٹس:۔ (1) وہ ملازم جس کی ملازمت ختم کی جا رہی ہو، اسے تیس یوم کا تحریری نوٹس دیا جائے گا یا تیس دن کی آخری تنخواہ بطور معاوضہ ادا کی جائے گی، بشرطیکہ وہ سنگین بدعملی کا مرتکب نہ ہو۔

(2) ملازم بھی اپنے استعفیٰ کے ذریعے ملازمت کا معاہدہ ختم کر سکتا ہے، بشرطیکہ وہ آجر کو تیس دن کا تحریری نوٹس دے یا اس کے بدلے میں تیس دن کی آخری تنخواہ ادا کرے۔

(3) نوٹس کی مدت کے دوران، ملازمت کا تعلق اپنی اصل حالت میں برقرار رہے گا، جب تک کہ نوٹس دی گئی پارٹی نوٹس کی مدت کو ختم کرنے یا کم کرنے کی خواہش ظاہر نہ کرے۔

(4) نوٹس کی مدت کے دوران، ملازم کو دوسری ملازمت کی تلاش کے لیے ہفتہ وار آرام کے دن کے علاوہ، ہر ہفتے ایک دن کی تنخواہ کے ساتھ چھٹی حاصل ہو گی، جس کا وقت دونوں فریقین کی سہولت سے طے ہو گا۔

(5) مائیکرو انٹرپرائز میں، آجر اور ملازم، ملازمت کے معاہدے کو ختم کرنے کے لیے چودہ دن کا تحریری نوٹس دیں گے یا اس کے بدلے میں چودہ دن کی آخری تنخواہ بطور معاوضہ ادا کریں گے۔

151۔ سنگین بدعملی:۔ (1) ذیلی دفعہ (2) کے تابع، درج ذیل افعال اور کوتاہیاں بطور سنگین بدعملی تصور کی جائیں گی:(اے) کوئی ایسا حکم جو ملازمت کے معاہدے، پنجاب لیبر کوڈ، یا کسی قابلِ اطلاق اجتماعی معاہدے کے مطابق قانونی اور معقول ہو، اُس پر عمل کرنے سے جان بوجھ کر اور بلاجواز انکار کرنا؛(بی) آجر کے کاروبار یا املاک سے متعلق چوری، فراڈ، یا بددیانتی کرنا؛(سی) آجر کی اشیاء یا املاک کو جان بوجھ کر نقصان پہنچانا یا ضیاع کرنا؛(ڈی) رشوت لینا یا دینا، یا کسی بھی غیر قانونی فائدے کا لین دین کرنا؛(ای) بغیر چھٹی کے عادتاً غیر حاضری، یا مجموعی طور پر دس یوم سے زائد بغیر اجازت غیر حاضری؛(ایف) کام کے دوران ادارے میں ہنگامہ آرائی یا بدنظمی کرنا؛(جی) نشے یا کسی نشہ آور شے کے زیرِ اثر کام پر آنا، اس حالت میں کہ ملازم کے حواس اس حد تک متاثر ہوں کہ وہ اپنی ذمہ داریاں نبھانے کے قابل نہ رہے؛(ایچ) کسی ایسی ہڑتال کو جاری رکھنا جسے لیبر کورٹ غیر قانونی قرار دے چکی ہو؛(آئی) کسی بھی سنگین فعل یا کوتاہی کو بار بار دہرانا، جیسا کہ انٹرنل ورک ریگولیشنز میں بیان کیا گیا ہو۔

(2) دفعہ 147 میں بیان کردہ کسی بھی امر کو سنگین بدعملی تصور نہیں کیا جائے گا۔

152۔ کام کی بندش:۔ (1) آجر کسی بھی وقت، باب 2.5 میں بیان کردہ ذمہ داریوں کی تعمیل کے لیے، یا آگ، سانحہ، مشینری کی خرابی، بجلی کی بندش، وبائی امراض، فسادات یا کسی اور ایسے سبب کی صورت میں جو آجر کے قابو سے باہر ہو، ادارے کے کسی سیکشن یا تمام سیکشنز کو مکمل یا جزوی طور پر، کسی بھی مدت کے لیے، بغیر اطلاع کے بند کر سکتا ہے۔(2) اگر ایسی بندش کام کے دوران ہو تو متاثرہ ملازمین کو جلد از جلد مطلع کیا جائے گا کہ کام کب دوبارہ شروع ہو گا اور آیا اُنہیں کام کی جگہ پر موجود رہنا ہے یا چھوڑنا ہے۔ اگر ملازمین کو کام کی جگہ پر موجود رہنے کی ہدایت دی جائے، تو وہ اس مدت کے دوران پوری تنخواہ کے مستحق ہوں گے، جس حدتک ممکن ہو، معمول کے کام کی بحالی کے لیے معقول پیشگی اطلاع دی جائے گی۔(3) اگر ملازمین کو پلانٹ کی ناکامی، پیداوار کی عارضی کمی یا ذیلی دفعہ (1) میں بیان کی گئی وجوہات کی بنا پر کام سے فارغ کیا جائے تو انہیں آجر کی طرف سے پہلے چودہ دنوں کے دوران روزانہ اجرت کا پچاس فیصد معاوضہ کے طور پر دیا جائے گا:مگر شرط یہ ہے کہ یہ فارغ کرنے کی مدت صرف دو بار لگاتار ہو سکتی ہے اور اگر آجر کو اس مدت سے تجاوز کرنا ہو تو آجر کو اس کے لیے چیف انسپکٹر سے اجازت حاصل کرنا ہو گی۔(4) اگر ملازمین کو غیر معینہ مدت کے لیے فارغ کیا جائے، تو ان کی خدمات کو معقول نوٹس دے کر یا اس کے بدلے معاوضہ دے کر ختم کیا جا سکتا ہے، بشرطیکہ لیبر کورٹ کی منظوری ہو۔

153۔ آجر کی جانب سےمعاوضے کی عدم ادائیگی پر کام کی انجام دہی:۔ (1) دفعہ ہذا اس صورت میں لاگو ہوتی ہے جب آجر باب 3.3، یا کسی ملازمت کے معاہدے، اجتماعی معاہدے، یا ایوارڈ کے تحت ملازم کو واجب الادا معاوضہ چودہ دن سے زائد عرصے تک ادا کرنے میں ناکام رہے۔

(2) وہ ملازم جسے ذیلی دفعہ (1) کے تحت معاوضہ موصول نہ ہوا ہو، یا اُس کی ٹریڈ یونین یا اجتماعی سودا کاری کا ایجنٹ، دفعہ 338 کے تحت "ادائیگیِ اجرت اتھارٹی" سے رجوع کر سکتا ہے یا انسپکٹر کو عدم ادائیگی سے متعلق اطلاع دے سکتا ہے۔

(3) اگر کوئی ملازم:(اے) ذیلی دفعہ (1) کے تحت معاوضہ حاصل نہ کر سکے؛ اور(بی) ذیلی دفعہ (2) کے تحت ادائیگیِ اجرت اتھارٹی سے رجوع کرے یا انسپکٹر کو مطلع کرے؛ اور(سی) درخواست یا اطلاع کے بعد چودہ یوم سے زائد معاوضہ بقایا رہے؛تو ملازم کام بند کر سکتا ہے جب تک کہ بقایا معاوضہ ادا نہ کر دیا جائے۔

(4) کوئی ایسا ملازم جو ذیلی دفعہ (3) کے تحت کام بند کرے، اُسے آجر ملازمت سے فارغ نہیں کر سکتا اور نہ ہی اسے ملازمت میں کسی اور طرح نقصان پہنچا سکتا ہے۔

(5) کوئی بھی ملازم جو ذیلی دفعہ (3) کے تحت کام بند کر دے، اُس کی سروس کا تسلسل اور کوڈ کے تحت ملازمت کے حقوق کا حصول اس مدت کے دوران غیر منقطع تصور کیا جائے گا جس میں اسے ادائیگی نہ کی گئی ہو۔

154۔ تادیبی اقدامات کے اصول اور طریق کار:۔(1) دفعات ‎154 اور ‎155 کے احکامات ان آجرین پر لاگو ہوتے ہیں جو بیس سے زیادہ ملازمین کو ملازمت دیتے ہیں۔

(2) کسی ملازم کے خلاف تادیبی کارروائی درج ذیل طریقے سے عمل میں لائی جائے گی:(اے) مبینہ بدعملی کا تحریری نوٹس یعنی چارج شیٹ ملازم کو ایسی بدعملی کی تاریخ سے، یا اس تاریخ سے جب مبینہ بدعملی آجر کے علم میں آئے، ایک ماہ کے اندر دیا جائے گا؛(بی) ملازم کو ان الزامات پر جواب دینے یا وضاحت پیش کرنے کا موقع دو ہفتوں کی مدت کے اندر فراہم کیا جائے گا؛(سی) اگر ملازم کی وضاحت تسلی بخش نہ ہو، تو ملازم کو معطل کیا جا سکتا ہے اور آزادانہ انکوائری کے لیے انکوائری آفیسر یا انکوائری کمیٹی مقرر کی جا سکتی ہے تاکہ غیر جانب دارانہ انداز میں یہ تعین کیا جا سکے کہ آیا ملازم قصوروار ہے یا نہیں؛(ڈی) اگر انکوائری رپورٹ میں ملازم کو قصوروار پایا جائے، تو آجر دفعہ 156 کے تحت سزا دے سکتا ہے۔

(3) ذیلی دفعہ (2) کے تحت کی جانے والی تادیبی کارروائی کو تحریری صورت میں ریکارڈ کیا جائے گا، اور تادیبی اقدام کا کوئی حکم ذیلی دفعہ (2) کے احکامات کے برخلاف جاری نہیں کیا جائے گا۔

(4) اگر ملازم چاہے تو، وہ انکوائری کے دوران اپنی معاونت کے لیے اسی کام کی جگہ کے کسی دوسرے ملازم یا ٹریڈ یونین کے نمائندے کو نامزد کر سکتا ہے، اور آجر اُس نامزد شخص کو انکوائری میں شریک ہونے اور ملازم کی مدد کرنے کی اجازت دے گا، اگر انکوائری کام کے اوقات میں ہو تو اس معاون ملازم کی تنخواہ میں کوئی کٹوتی نہیں کی جائے گی۔

(5) انکوائری کے مقاصد کے لیے، آجر ملازم کو ایک وقت میں زیادہ سے زیادہ سات دن کے لیے معطل کر سکتا ہے، بشرطیکہ مجموعی مدت چار ہفتوں سے زیادہ نہ ہو، سوائے اس صورت کے جب معاملہ ثالث، لیبر کورٹ، ٹربیونل، میڈی ایٹر (مفاہمت کار) یا مصالحت کار کے سامنے زیرِ التواء ہو۔ معطلی کا حکم تحریری ہو گا اور ملازم کو دیا جانے کے ساتھ ہی مؤثر ہو گا، معطلی کے دوران ملازم کو وہی معاوضہ دیا جائے گا جو اُسے معطلی نہ ہونے کی صورت میں ملتا۔

155۔ انکوائری اور حتمی حکم کا طریق کار:۔ (1) انکوائری آفیسر یا انکوائری کمیٹی، جیسا بھی معاملہ ہو، آجر سے تحریری حکم ملنے کے تین یوم کے اندر درج ذیل اقدامات کرے گی:(اے) ملزم ملازم کو الزامات کی تفصیلات اور ان کے ثبوت مہیا کیے جائیں گے، اور ان کا تحریری وصولی اقرار حاصل کیا جائے گا؛(بی) ملزم ملازم سے کہا جائے گا کہ وہ سات یوم کے اندر تحریری دفاع جمع کرائے، اور اگر ملازم بغیر کسی معقول وجہ کے جواب نہ دے، تو انکوائری آفیسر یا کمیٹی یکطرفہ کارروائی کرے گی؛(سی) انکوائری کے دوران، الزامات اور دفاع میں زبانی یا دستاویزی شواہد ریکارڈ کیے جا سکتے ہیں، اور ہر فریق کو گواہوں پر جرح کرنے کا حق حاصل ہو گا۔

(2) ملزم کو یہ حق حاصل ہو گا کہ وہ انکوائری کے دوران پیش کیے گئے زبانی یا دستاویزی شواہد کا معائنہ کرے، اور اپنی صفائی میں ایسے شواہد پیش یا طلب کر سکے۔

(3) کوڈ اور اس کے تحت بنائے گئے قواعد کے تابع، انکوائری آفیسر یا انکوائری کمیٹی کو یہ اختیار حاصل ہو گا کہ وہ انکوائری کا اپنا طریق کار، جگہ اور وقت خود مقرر کرے۔

(4) انکوائری کے حوالے سے انکوائری آفیسر یا کمیٹی درج ذیل طریق کار پر عمل کرے گی:(اے) انکوائری کے دوران حاصل کیے گئے بیانات اور دیگر ثبوت رازدارانہ طور پر زیر غور آئیں گے؛(بی) ملزم ملازم کو دفاع کے دوران اسی کام کی جگہ پر کسی دوسرے ملازم کی معاونت کی اجازت دی جائے گی؛(سی)انکوائری افسر یا کمیٹی اپنی رپورٹ تحریری طور پر پیش کرے گی اور اس کے فیصلے کی وجوہات بھی درج کرے گی؛(ڈی) انکوائری کے آغاز سے چالیس دن کے اندر، انکوائری آفیسر یا کمیٹی اپنے نتائج اور سفارشات آجر کو جمع کرائے گی۔

(5) انکوائری رپورٹ موصول ہونے کے ایک ہفتے کے اندر، آجر معاملے پر غور و فکر کرے گا اور مناسب حکم جاری کرے گایا تو الزامات کو خارج کرے گا یا دفعہ 156 کے تحت سزا عائد کرے گا، اور یہ فیصلہ تحریری، وجوہات پر مبنی ہو گا جس سے ملازم کو مطلع کیا جائے گا۔

156۔ سزائیں:۔ اگر ملازم پر عائد الزامات ثابت ہو جائیں تو آجر، بدعملی کی نوعیت اور سنگینی کو مدنظر رکھتے ہوئے، ملازم کو درج ذیل میں سے ایک یا ایک سے زائد سزائیں دے گا:(اے) سرزنش؛(بی) پنجاب لیبر کوڈ کے تحت مقررہ طریقے کے مطابق جرمانہ، جو ملازم کو ماہانہ ادا کی جانے والی تنخواہ کا تین فیصد تک ہو سکتا ہے؛(سی) انکریمنٹ یا ترقی کو روک لینا، ایسی مدت کے لیے جو دو سال سے زائد نہ ہو؛(ڈی) مخصوص مدت کے لیے جو دو سال سے زائد نہ ہو کسی نچلے عہدے پر تنزلی؛(ای) تمام مالی فوائد سمیت، جن میں گریجویٹی بھی شامل ہے، ملازمت سے برطرفی؛ یا(ایف) نوٹس کے عوض کسی معاوضۂ کار کی ادائیگی کے بغیر ملازمت سے برخاستگی۔

157۔ سزاؤں کے خلاف اپیل:۔اگر کسی ملازم پر آجر کی جانب سے کوئی سزا عائد کی گئی ہو اور وہ اس فیصلے سے مطمئن نہ ہو تو وہ اس فیصلے کی تحریری اطلاع ملنے کے تیس دن کے اندر آجر کے پاس شکایت درج کروا سکتا ہے، جیسا کہ دفعہ ‎335 میں بیان کیا گیا ہے۔

158۔ روزگار کا سرٹیفیکیٹ:۔ (1) ملازمت کے معاہدے کے کسی بھی وجہ سے خاتمے کی صورت میں، آجر پابند ہوگا کہ ملازمت کے خاتمے کے دسویں ورکنگ دن کی مدت ختم ہونے سے پہلے، ملازم کو ایک سرٹیفکیٹ جاری کرے جس میں درج ذیل معلومات شامل ہوں:(اے) آجر کا نام اور پتا؛(بی)آجر کے کاروبار کی نوعیت؛(سی) آجر کے ساتھ ملازم کی مسلسل روزگار کی مدت؛(ڈی)ملازم کا عہدہ یا ذمہ داری جس پر وہ کام کر رہا تھا، اس کے ختم ہونے سے پہلے؛(ای)روزگار کے خاتمے کی وجہ۔

(2) مذکورہ بالا ذیلی دفعہ (1) میں جس سرٹیفکیٹ کا ذکر کیا گیا ہے، اُس میں ملازم کی کارکردگی کا کوئی تجزیہ شامل نہیں ہوگا، جب تک کہ ملازم خود اس تجزیے کی درخواست نہ کرے۔

ڈی۔ گریجویٹی اور ریڈنڈنسی کی ادائیگیاں

159۔ ملازمت کے خاتمے پر ادائیگیاں:۔ (1) دفعہ ہذا ان اداروں پر لاگو نہیں ہو گی جن میں بیس سے کم ورکرز ملازم ہوں۔

(2) ایک سال کی مسلسل ملازمت کے بعد، اگر ملازمت کا معاہدہ کسی بھی فریق آجر یا ملازم کی جانب سے ختم کیا جائے، سوائے"سنگین بدعملی"کی صورت کے، تو ملازم یا، اُس کی وفات کی صورت میں، اس کے ورثاء، ہر سال کی ملازمت کے عوض تیس یوم کی اجرت کے برابر گریجویٹی کے حق دار ہوں گے، جب تک کہ اس سے زیادہ سازگار شرائط پہلے سے طے نہ کی گئی ہوں:مگر شرط یہ ہے کہ گریجویٹی کی رقم کے حساب کے لیے، ایک ہی ادارے کے ساتھ پہلے سال کی ملازمت مکمل ہونے کے بعد، سروس کی جو مدت چھ ماہ سے تجاوز کرے، اسے مکمل سال شمار کیا جائے گا؛مزیدشرط یہ ہے کہ اگر ملازم "مقررہ اجرت" پر کام کر رہا تھا تو گریجویٹی کی رقم اس کی آخری ماہ کی تنخواہ کی بنیاد پر، اور اگر وہ "فی کام اجرت" پر کام کر رہا تھا تو گزشتہ بارہ ماہ کے دوران حاصل کردہ سب سے زیادہ اجرت کی بنیاد پر ادا کی جائے گی۔(3) ایسا سیزنل ملازم جس نے کسی سیزنل ادارے میں پورے سیزن کے دوران کام کیا ہو، اسے، اس کوڈ یا فی الوقت نافذ العمل کسی دیگر قانون کے تحت حاصل ہونے والے کسی بھی دوسرے فائدے کے علاوہ، سیزن کے اختتام پر، اس کی آخری ماہ کی تنخواہ کے برابر رقم سیزن ختم ہونے سے پندرہ دن قبل ادا کی جائے گی:مگر شرط یہ ہے کہ سیزنل ملازم کی سروسز میں سیزن کے دوران اگر کوئی تعطل یا رکاوٹ، بیماری، حادثے، رخصت، لے آف، ہڑتال، لاک آؤٹ یا کام کی بندش کی وجہ سے آئی ہو، تو وہ اسے اس کوڈ کے احکامات کے فائدے سے محروم نہیں کرے گی؛

مزید شرط یہ ہے کہ یہ بھی فرض کیا جائے گا کہ اگرسیزنل ملازم سیزن کے دوران کم از کم پچھتر فیصد دنوں میں کام کر چکا ہو، تو وہ پورے سیزن کے دوران کام کرنے والا متصورہو۔

(4) کسی بھی ملازم کے ورثاء کو گریجویٹی کی ادائیگی براہِ راست نہیں کی جائے گی بلکہ یہ رقم"ایمپلائز کمپنسیشن کمشنر" کی عدالت میں جمع کرائی جائے گی، جو حصہ پنجم کے باب 5.6 کے احکامات کے مطابق، اس رقم کی ورثاء میں تقسیم کرے گا۔اگر آجر مقررہ گریجویٹی کی رقم جمع نہ کرائے، تو متوفی ملازم کے ورثاء کمشنر کے سامنے اس رقم کی وصولی کے لیے درخواست دائر کر سکتے ہیں۔

160۔ گریجویٹی کی حد بندی:۔(1) دفعہ 159 کے تحت کسی ملازم کو ملنے والی گریجویٹی کی ادائیگی کو درج ذیل کیٹیگریوں کے مطابق محدود کیا جائے گا: